Read Lamnso Ŋgàn 18 Bible Online

Ŋgàn 18 - Lamnso bible

Ŋgàn 18

¹Wìr lóo ker shií a dzə̀ e wun kinyò, la wù yòʼ a tàʼ ŋkar sinín, ŋwáy kinyo ke Nyùy tinen ŋwáyín.

²Kiyúŋ kí yòʼ kér shií ji wun kiíy jeéyjeéy fó kinyò, kí kù yáŋri, suuy kinyo a dzə̀ ke kí gheen wun.

³Wìr lóo yiì yii ye bií, yí wìy e nshéʼmé, wù buu ghvə́m, wù shòór kitú.

⁴Jí se sí fəə́ fo wìr shuù si dzə̀ moo ndzə́v ye yí shoon. Shúu wìri lóo fəə́r jí se sí kér vifií, wú wàa rə̀sìn moo ntoò ndzə̀v ye yì meé fo lòo nsay, léŋé.

⁵Dzə̀ kinyo ke bi kí fóo bìn nsaʼ, e fo e ŋgaà jay, e bvəʼ ghay wìr woo là jay.

⁶Kisúŋnìn ke kiyuŋ kí wiy a dzə̀ e kitáŋnìn ki, a jí sə́ sí kù taʼ ji á shóʼ wun e ŋgwàne.

⁷Kiyúŋ kí lem shuu e rə́, kí bìvír kitú, kóʼor kitám kfə́, a kù dzə̀ e shuu vəə́.

⁸Jí se ŋgaà kinsuʼ si nyom moo viyíkìr ve juujùŋ vi, nyom bèn, nəə́kir e wìr wùn.

⁹Wìr woo njoó kù dzə̀ fər ŋgaà kimbivìr.

¹⁰NYÙY TÀR dzə̀ kirə́ʼ ké kilìr ke tavín kí, wìr wo wù yú Nyùy, léʼ tó fo, wù bòy.

¹¹Ŋgaà mbàm yén kfə́ ji káv vəə́ kiŋsìn wun, moo kay ye á bomen e da, e kaàrí lá sho, e tàr.

¹²Wìr lóo koʼór wún, Nyùy sèn wun, li kitú kfə́ shishàr, á wàa ghvəm wun.

¹³Wìr binèr kinyo là yú, kí dìn kiyúŋsì kfə́, e shòór wun.

¹⁴Shilív she wìr wayin ji wun yíi lùŋ shi fəər wun fo yàsí, a she weeyìn shí wáy ŋgaà yàsí wáyín é sày.

¹⁵Wìr woo fií kù yii diy a dzə̀ ji wun yéʼéy kinyo, kér shií a dzə̀ ji wun kiíy kinyo.

¹⁶Wìr fó fómo, wù mvə̀ʼ dzə́ə sə́, e kòóy dzə́ə sé a suŋnín wùn à wír ve kuʼkìné.

¹⁷Wìr neer nsaʼ rə fó mbìy, yì wàa dìn suuyrú, e meé mo ŋgaà və nsaʼ yíi dzətí wun vinyo.

¹⁸Melaà mè yii gháʼá, á màʼ sí mbàm, e lì mbìv ye yì fəəsin, kí tìnén melaà, e jàvsìn vindzəʼ ve antav.

¹⁹A dzə̀ wìr tàv, e tò kay yeé ŋkàlaʼ ye tavíné,[20] a bó yòʼ dzə̀ wù kòʼtí e fə̀r wo á tinsin ne ghaŋ. Melaà mè yii javsìn ŋkar si moo visha ve ví sə́ti shúu kày fo wìr nəə́.

²⁰Wìr kiiy lám, wù yìkír, jì yee réŋ fəə́ fo wun shuù, wù yìkír, e kùr.

²¹Kisúŋnìn ke wìr ki fó dzəʼə̀m, kìn kpú, é wír ve á súŋnin e ŋàŋé ku nèn a kiíy.

²²Wìr wáy wiíy e lav, bo wù yiì kinyo ke juŋ ki, NYÙY TÀR kfə̀n a leéy wun, a kòŋ.

²³Ŋgaà kitàn lóo suŋnín kfə́, wù wàa lon ji weè. Yii bèy, ŋgaà mbàm kù a bìnèr kfə́ kinyo ji shwǎŋ.

²⁴Wìr lóo ker ŋkar sinín, wù kpù kitan, yii bèy, a ŋkar yìmòʼ bòŋ, e shaà fə́r.