Read Lamnso Ŋgàn 19 Bible Online

Ŋgàn 19 - Lamnso bible

Ŋgàn 19

¹Bòŋ a tàn, a ker liì wo juŋ, e shaà ké a boʼtí kimboʼtì, a yiì kiyúŋ.

²Kí yoʼ bòŋ ji wìr wáa ker shilív, a buŋ vifií. Wìr girì, wù tò é kinyò ke bi kí.

³Wìr yúŋsi, wù bìvír dzəʼə̀m rə́, lo, wù nèn a shwiíy kilòŋ, a bashí NYÙY TÀR.

⁴À kuʼ e kav, à kùʼ é ŋkar si, buu káv, à bùú ŋkar.

⁵Wìr wo wù tíy vinjen ve kisaŋ vi yòʼ wíy dù là ŋgeʼlàʼ, a wo wù bóʼti kimboʼtì yòʼ wíy bòy.

⁶Kùʼùn wìr kù yii diy ji wìr wo kuʼùn wáa kòŋ áwune, à lóo fo fómo, wìr dzə̀m wàa dzə ŋkar yè.

⁷À tanè, afə́rí wàa leéy wò ntéŋ, bo a dzə̀ ké ŋkar si kí fòy fóyin. À fə́m lóo tàʼ ji à bí wír e kinyò, wù wàa ŋway wò ŋwáyín.[21]

⁸Wìr wo wù kér vifií koŋ kitú kfə́, wìr yéʼey, kiiy jeéyjeéy fó vinyò, wù wàa kuy.

⁹Wìr wo wù tíy vinjen ve kisaŋ vi yòʼ wíy dù là ŋgeʼlàʼ, a wo wù bóʼti kimboʼtì wíy nəə́ e ŋgeʼ yee là may.

¹⁰Kí yoʼ ghèén ji kiyúŋ kí wáa dzə dzəʼə̀m vé mbàme, tìtìka, é bo kwàné wáa saʼ wón ntoʼ.

¹¹Wìr fiirì, wù wàa kfəmén e dòʼshwiíy, ŋwáy kitáŋnìn, wù wàa ker ghvə́m.

¹²Dòʼshwiiy fòn beéme moo tóŋ bvərə̀ʼ, a koŋ rəə́ rəsìnè moo ŋweʼ ye yí gbu e viŋgà.

¹³Wàn yúŋsi wù sə̀ʼsí kéŋ tàr wov, wiíy lóo nyàm, bo wù sì moo wuú ye yí shémshem e lav.

¹⁴Láʼ wùn à vikuʼùy ví dzə̀ vitsə́ʼ ve atàrí lem e wóné, a kù fó NYÙY TÀR wiíy woo fií.

¹⁵Wìr lóo dzə njoó, wù wàa buuné, a tonén, lóo dzə e làa yòʼ a lìm kifá, wù kpù jíŋ.

¹⁶Wìr yúnin nsər, wù kìŋsìn kitú kfə́, ŋwáyí, wù dù é sày e kiwuú kí.

¹⁷Wìr wo wù shám ŋgaà kitàn, maʼ a dzə̀ NYÙY TÀR ŋgwáʼ, a wù wíy kòr mo wù‑uù màʼàn.

¹⁸Kú a sə̀r wan wò, aà dzəə́ yoy, tiir e wùn wó, aà leey leèyín, bo à yúyri wun yúyrín.

¹⁹Wìr lóo nyarnín ŋkóŋkóŋ, wù kù wìy a ker ŋgeʼlàʼ, aà fə̀ə́r wun fo ŋgeʼ, bo wù kù dzəə́ yiì bùʼ kímóʼ kí.

²⁰Yuúrí ntir, e səə̀sí naarìi, à wíy lóo dzə̀n, áà wáa dzə fií.

²¹Wìr lo, wù bà antaŋ aneénín, yii bèy, a kù yíi a tiy wo NYÙY TÀR.

²²Kinyo ke á shií fo wìr msòŋ kí dzə̀ ji wù din á koŋ ye ruú, a ŋgaà kitàn bòŋ, e shaà ŋgaà kimboʼtì.

²³Wìr yúnin NYÙY TÀR, wù wàa dzə dzə́ ye juŋe, ŋgaàŋ wàa yikír, a neèm là kinyo ké a fàn.

²⁴Njoó wáy kiwó e kighin, kí ghàʼ, fə̀m à fo wù fəə́r, e wày é shuù.

²⁵Á dzəv ŋgaà jàʼ, anjìʼi yèʼéy vinyo fo fo, naarì wír wo wù kiiy jeéyjeéy fó vinyò, wù keèrí vifií.

²⁶Wàn faasì kéŋ tàr wov, jum yè wov, wù wìy e woómé si é laʼ, e shòór wíri.

²⁷Wan wòm, tén ri fó a yu ntir, áà yén mo kiyúŋsì ki yíi sùm wò.

²⁸Njen woo là mbòv yii shéʼ suuyrú shéʼén, a vé yiì ye bií səv wó, nəə nə̀ə́n é kinyò ke bi kí.

²⁹Wír ve á shéʼ Nyùyi kù wíy a ker ŋgeʼlàʼ, é ŋgwàne shóʼ ndzə̀m viyùŋ.