Read Lamnso Ŋgàn 22 Bible Online

Ŋgàn 22 - Lamnso bible

Ŋgàn 22

¹Bòŋ kée shoʼ yír ye juŋe, e shaà vikuʼùy veé ŋàŋ. Bòŋ keé shoʼ koŋ ye wíri wáa kòŋ wò, e shaà mbàm.

²Ŋgaà mbàm wùn ŋgaà kitàn, á kù kér kiyoy a dzə̀ kee shó. A kù dzə̀ NYÙY TÀR wo wù bomen áwune adzə̀m.

³Wìr fiirì, wù bàʼàr kileémé, kiyúŋ kí nə̀ə́ shó nəə́n, a yen ŋgeʼ.

⁴A wìr kfə́menè, ghvə́m NYÙY TÀR, bo vilaʼày və́ ví dzə̀ vikuʼùy, ghvə́m, wùn à dzəʼə̀m ye dáa.

⁵Dzə́ə sé ayìíkum sí dzə̀ vitám vitám, a dzə njoŋ njoŋ, wìr kim kitú kfə́, wù bàʼàr.

⁶Ku mèrìr wán a dzə̀ e liì wo juŋ, wù wíy kúyí, é la wù yòʼ màʼtì liì woo shooy.

⁷Mo ŋgaà mbàm kù yii kóʼ ŋgaà kitàn kóʼón, bo kù dzə̀ sá réŋréŋ mo ŋgaà mfoòmé kù dzəə̀n sá kwǎn ŋgaà foòr.

⁸A wìr wày kinshwìv, bo wù kù wíy kav a dzə̀ lòn, é táy ye wù táy wírií nèn mày.

⁹Wìr lóo ker wó rə́ tèéter, Nyùy wàa səə̀vì wun, bìʼ fo wù jav vifá ve yi e vé kitàne.

¹⁰Aà jùm ŋgaà jàʼ, bo à jùm ne kitáŋnìn, kinyam wùn à liy si nèn sèéy.

¹¹A wìr kér shilív she juŋ shi, shám wíri, bo dzə̀ fòn koò wun e viŋkar.

¹²NYÙY TÀR yii shiy wir dzə̀m wo wù kér vifií, bvəər antaŋ vé kimboʼtìi.

¹³Wìr njoó, wù gòʼ ji bvərə̀ʼ dzə̀ é ndzə, a m fəə̀ é dzəə, é wù yúyrí mo.

¹⁴Jí se wiiy viŋkar si dzə̀ bií ntùr, a wìr wo wù nyárir shilív shé NYÙY TÀR yíi gbù sho.

¹⁵Kiyúŋ kí rùn ne e wǎn kitu, aá kù yíi sə̀r e ŋgwàne, é kí du kwaʼda.

¹⁶Aà nyavrì e ŋgaà kitàn ji à dzəsi káv wó, kìn à fó fómo e ŋgaà mbàm, bo à kù yíi a ghiy ghiyín.

¹⁷Fó vituʼùr ví, e yuùrí jí se afiì sí, e tìír vifií ví e mǒ yeʼéy.

¹⁸À yíi a yu vijuŋ ji à kìíy ne jí sìn, aà fey kìíy mó a yòŋ fo kitu.

¹⁹M sí yéʼey wò lán ji à fíʼ a yu a dzə̀ fo NYÙY TÀR.

²⁰M sàŋ ne vinyo mtaár, e fò e wò. Kù dzə̀ jí se ntir wùn à sé vifii sí sidzə̀m.

²¹A m sàŋ ji à fiʼ kìíy a kinyo ke dzəə̀n ke ru kí, kiiy feyì kijuŋ, áà fiʼ kfə̀n fo wìr wo wù tumen wò, e naàrì vinyo ve réŋ ví shó.

²²Lá à yòʼ shwìv ŋgaà kitàn ji bìʼ fo wù tanè, kìn ji à nyavrì e ghéʼncey é lav nsaʼ.

²³NYÙY TÀR yíi sə nsaʼ yev, e saʼ, e nyàvrì e wír ve á nyavrì aáwuneé.

²⁴Lá à yòʼ shèm ŋgoo vèn wìr wo wù shwiiy kilòŋ, kìn ji à shém ŋgoo vèn wìr wo wù yòʼ kúʼti dòʼshwiíy.

²⁵Ku bàʼàr ŋgaàŋ, fóo bìʼnìn liì və, e to e kitam.

²⁶Lá à yòʼ kàʼ ŋkàʼmé, e tìím mbìy ji wìr foo kifá.[23]

²⁷A kí wìy kòóy ji á búŋ kifá kée làʼ kaá rə́ shó, bo á yíi koo kifá ké kidzə̀m, à kikún kí shó.

²⁸Lá à yòʼ kùvsín bìíy ŋgvən, kù dzə̀ bìíy mo atàr vée‑eè sanen fó yàŋgùʼ.[24]

²⁹À yén wír wo wù kiìn lim rə́ á? Wù wíy a lìm a dzə̀ fo afone, wù yòʼ wíy a lìm fo wír vee víyi.