Read Lamnso Ŋgàn 26 Bible Online

Ŋgàn 26 - Lamnso bible

Ŋgàn 26

¹Ghvə́m yé a ghvəm kiyúŋé, kù dzə̀ moo kintòn ke kí koó e bìŋ, a dzə moo wuú ye yí ló e lùm.

²Aà shóv wír là njò, bo kí kù‑úù tsə́y kitú, moo shinə́n she shí ján janén, à shighaà she shí féŋ feŋén, e làa yòʼ koóy ghán sée bàʼrì láʼ.

³Mo ké nyàmŋkoʼ ki kù dzəə̀n sháŋ, a ké kimbèʼbìy kí dzə̀ ŋgwàn, bo kù dzə̀ mo ké kiyuŋ kí dzəə̀n ŋkoó.

⁴Kiyúŋ kí maʼ lám, lá à yòʼ bìnèr, fóo yiì kfən moo wun.

⁵Ku kòrìr kiyúŋ kí kórisin, fo wù wáa yen kitú kfə́ ji fií.

⁶Aà tùm kiyúŋ, bo ntum yè nò ndzəʼ.

⁷A kiyúŋ kí maʼ ŋgàn, bo yì dzə̀ moo shwín ntèŋ wo wú lév levín.

⁸Aà ghvə́m kiyúŋ, bo à dzə̀ moo wír wo wù liìn tíy, e kùr kúrín é kiŋkoʼ.

⁹Mo mfoòkìnó búʼ e njoŋ kifa e kiwo, bo kù dzə̀ sá réŋréŋ mo viyúŋ vi búʼ e ŋgàn e shuù.

¹⁰Wìr li kiyúŋ kìn nshaàdzəə̀ é lìm, bo wù taʼ kileémé,[30] kù moo wír wo wù maʼ mvən máʼan é kirə̀ʼ ke wíri shaa sho.

¹¹Mo jwi suʼ kifá, yì kfə̀n a yi, bo kù dzə̀ sá réŋréŋ mo kiyúŋ kí rúvti kiyúŋsì kfə́.

¹²A sì ji wìr wáa yen kitú kfə́ ji fií, a bó wù yòʼ kì kifá, bo bòŋ kiyúŋ kee kiyúŋ.

¹³Wìr njoó, wù gòʼ ji bvərə̀ʼ dzə̀ é ndzə, bvərə̀ʼ dzə̀ á e dzəə yeé nsàn se laʼ.

¹⁴Mo shúu lavi lévlev, binkìr e wun viŋgov, kù dzə̀ mo njoó yii binkìr e wun kikun.

¹⁵Njoó wáy kiwó e kighin, kí dzə̀r, e ghàʼ fo wù fəə́r, e wày é shuù.

¹⁶Njoó kù yii yén ji wun fìír, e shaà wír anín ve á suuy kinyo ke kí kér vifií.

¹⁷Wìr wo wù wáy shuu e kinyò ke kí yoʼ kùm wun dzə̀ moo wír wo wù yenen a jwi shaa, e bàm fó vitùʼùr.

¹⁸Wìr wo wù bóʼti ŋgaà shweèsí və, yoŋ ji wun səə́ri səə̀rín,

¹⁹dzə̀ moo ŋgaàbaá wo wù maʼ mvə́n ndzəʼ ye dzə̀ yí yùyrí wír.

²⁰Meŋkaʼ mè búŋ fo kiy, və́yí ndzə̀mén. Ŋgaà kinsuʼ búŋ fo kirə̀ʼ, kinyam ki mày.

²¹Mo á dzəy kikáysín, kí wàa ghèʼ ji káy və̀y, a meŋkaʼ mè shwí, dzə̀ réŋréŋ mo ŋgaà kinyàm kù yii keʼ melaà.

²²Jí se ŋgaà kinsuʼ si lo, sí wàa nyòm moo viyíkìr ve juujùŋ vi, a nyòm bèn, a nəəkír e wìr wùn.

²³A wìr sheŋrì lám ji wun téʼtín kwaʼtì ye bií, bo dzə̀ moo kíŋ mbóm ye á yoʼon, yí wáa shwinín kisha ke fəvír kí.

²⁴Wìr lóo ker vibàn, wù wàa teʼtín e kiláyláy ke juŋ ki, a wù kér a dzə̀ kimboʼtì e wun shiliv.

²⁵Wù lóo sùyrì wò e jí sí, lá à yòʼ biìmé, bìʼ fo yii ye bií runen e wun shiliv.

²⁶A wù fə̀m litì vibàn və́ e kimboʼtì ki, bo liì və kisaŋ kù wíy toʼór e wírí mvəm.

²⁷Wìr túŋ bií, bo kù yíi gbù wun sho, wìr dzəə́r tíy, bo yí kù yíi bìnkìr, e koo a dzə̀ wun.

²⁸Wìr bóʼti wír, bo wù ban ŋgaàŋ bánen, a leerì yee leèrì wír e shúu kù dzə̀ ji wù maʼ ŋgaàŋ máʼan.