Read Lamnso Ŋgàn 27 Bible Online

Ŋgàn 27 - Lamnso bible

Ŋgàn 27

¹Lá à yòʼ a dzə̀v nsaŋ bìʼ kibvəə́shí, bìʼ fo à yòʼ kiìn kinyo ke kí yíi koóy.

²Lá à yòʼ a burí kitú ké, kí ghèén ji wáa burí wír wo sən wò. Bòŋ é wáa burí kiŋgwìy wò, e shaà fo kfə́n a fìʼtì wò kitú ké.

³Tíyí dzərì, a síy si dzər sa, yii bèy, a tínsín ye kiyúŋ kí tínsin wíri dzə̀r, e shaà vidzə̀m.

⁴Wìr woo ŋgaà dòʼshwiíy tínsin wíri tinsín là mendzən, yii bèy, a ké ŋgaà kighèʼ ki fòy kfə́ fóyin ji wòʼ.

⁵Kí bòŋ, e tir wír tèéter, e shaà koŋ yeé kilìtì.

⁶Ŋkar yè lóo naàrì wò, a kù a sheʼrí wun. Ŋgaà vibàn lo kfə́, wù baàmé wò, a nyòʼtì.

⁷Wìr yíkir, kúrí, wù tèn ghám vilù. Jìŋ lóo yar wír, wù wàa yi kifá kidzə̀m, là nyaʼ.

⁸Wìr maʼtì láʼ, lóo ghan ghanén, bo wù sì moo shinə́n she shí màʼtìn láʼ, a jan janén.

⁹À sor meŋgvə́r é si, yí wàa yaané. À yóʼ wún e biʼi, wú wàa yu vijuŋ. Ŋkar yè tír wò, à wàa sheʼrí.[31]

¹⁰Lá à yòʼ màʼày ŋkar sé, à sé tàr won sí, é la à yòʼ a dù e fər wò laʼ, a dzə̀ é ghan se à kér ŋgeʼ. Ŋkar yè shweèsí bòŋ, e shaà fə́r wò woo kwaʼda.

¹¹Wan wòm, á dzə fií, e yiì, é m wáa yu vijuŋ, é m bóo fíʼ sətí shúu wìr wo wù say mo.

¹²Wìr fiirì, yén kinyo ke bi kí, wù bàʼàr, njìʼ nə̀ə́ kfə́ shó nəə́n, a yen ŋgeʼ.

¹³A wìr lò, e tìím mbìy ji kiŋgwìy ki foo kifá, á kù sə̀ ndzə̀y sə́. Wù wáa tiím mbìy ji wiiy viŋkar foo kifá, bo wù kù‑úù tiír kitú kfə́.

¹⁴A wìr lò, a lò e yuv kijàvndzə kijàvndzə, a fuŋ ŋgaà və shweèsí kitávín ji wun shaʼtì, bo á lo, e lì yee shooy yee shaʼtì ji wù shóv wun shóvín.

¹⁵Wiíy woo ŋgaà kinyàm kù dzə̀ moo wuú ye yí shém là meemè e kishiíy ké wuu.

¹⁶A sì kée sə̀r wiíy kinyàm, bo kí dzə̀ cér móo koo shwér, kìn móo keerí meŋgvə́r é wo.

¹⁷Mo á li kisha, á sày kímóʼ kí shó, bo dzə̀ sá réŋréŋ mo wìr lo, wù yèʼéy wùmòʼ, wù kìíy vinyo.

¹⁸Wìr wo wù leey fo kicí ké *fig ki, kù yíi a kfər báŋ sə́, a wìr wo wù shiy tàr wov lìm, yíi a ker vilaámé.

¹⁹Mo à leey mendzə́v, à yèn sí yé, bo dzə̀ á kìíy mo wìr dzəə̀n, a dzə̀ fo wun liì.

²⁰Bvə́me yòʼ yii kúr woŋ aŋkfə, a bó nsay yòʼ yii rúné, a bó yòʼ dzə̀ wir msòŋ keèrí vifá, ví ghèén wun.

²¹Á kù yii ton *kisha ke mbàm e və́yí, é bo á yén wúntí kíwun, kù dzə̀ mo à yii kiiy wír mo wù dzəə̀n, a dzə̀ bìʼ búrí ye á búri wun.

²²Aá fə̀m lì kiyúŋ, a tsəy e kikoŋ, a tsəy mo á tsə̀y ŋgwàsáŋ bo bó yòʼ dzə̀ kiyúŋsì kfə́ kí mày.

²³Á leéy fo wò nyàm kijuŋ, a way vifií ví e wò ŋgoo se bvəy.

²⁴Mbàm si yòʼ wíy dù, e jòʼsì, a bó ntáráʼ yòʼ wíy shaàrì e ŋgwàʼ si sidzə̀m.

²⁵Aà shèr jíy, ye səné wáa to, e bàʼtí yeé aŋkoŋ,

²⁶bvə́y si lòo yí, bo dzə̀ à yiì kòóy wúy bvəy yée ba ndzə̀y sé sho, e fiìnè símóʼ sí, e yun kirə́ʼ,

²⁷e kfə̀n a ker vín bvəy nyanyày yé a no, é kfə́ə yée wáa no sa, à wón vee vikìy ve á lim e wò laʼa.