Read Lamnso Ŋgàn 4 Bible Online

Ŋgàn 4 - Lamnso bible

Ŋgàn 4

¹Wòn vem, vèn ku yuùrí ntir tàr won. Vèn fó vituʼùr ví, e yuùrí jí sém sí,

²bìʼ fo ntò se yeʼéy se m lo, a fo e vèn sí dzə̀ see tìítiy. Lá vèn yòʼ ŋwày ntir sém. Mò‑oò kúy sa e tàr wór kiwo,

³a kù‑uù jòʼsì mo màyshó wàn wo yè wor‑iì kérí, a wù‑uù koŋ mo é ŋàŋ.

⁴Tàr wor nèn a tir mo, a sə̀ntì jii, «Lèm jí sém sí e wò kitu, a lèm nsər sém, e fíʼ wìy a ker dzəʼə̀m ye dáa.

⁵Lá à yòʼ làysìn, e bìn ndzə̀m e ntir sém sí. Kú a kiíy vinyo, a gwàrìr mo ví gháné.

⁶Aà ghàr a dzə̀ vifií, bo ví yíi a leéy fo wò. Kú a koytí, é ví wáa kìŋsìn wò.

⁷Bó kinyo kímóʼ kí yòʼ kfə̀n dzə̀ shó e shií, e shaà ji wìr keérí vifií ve ví lo fo Nyùy. A dzə̀ à wàa ker vifá vidzə̀m, yii bèy, a vifií ví shaà kidzə̀m.

⁸Aà kìíy shií wó a ker vifií ve ru ví, bo à yíi a dzə wír woo wír, à lúm, e kpù shó, bo à yíi a ker ghvə́m ye ghaʼáné.

⁹Vifií ví dzə̀ moo tán ye yí náŋsin kitú ké, a dzə moo ntáráʼ wo juujùŋ wo á sòvìn e wò kitu.»

¹⁰Wan wòm,[5] yuúrí, sə́ ntir sém sí, é dzəʼə̀m yée wìy dàr.

¹¹M tìr ne wò mo dzə̀ à wàa ker vifií kijuŋ, e kfə̀n a tiír kiwúu ké, a fìʼ.

¹²Vifií ví yíi sə wò, é kinyo ké kidzə̀m ki shémsín, à lóo ghan, é la à yòʼ bàyrìn.

¹³Ku ghàr kinyo kee ji ntir ki, e lùm, e kpù shó. Ku kòytí, bìʼ fo siìn dzəʼə̀m yé.

¹⁴Lá à yòʼ shèm ŋgoo wìr ve á méŋ Nyùy, kìn ye wìr ve á kér liì kisaŋ.

¹⁵Lá à yòʼ bìʼnìn liì wov kisaŋ, ku ŋwày ŋwáyín, e bìn ndzə̀m, a dù ye yee dzə́ə.

¹⁶Bó yòʼ dzə̀ áwune yù fóo cuʼ kinyè é nsay, a bó á búʼ rə́mrə́m kinyò. Á neemè, mbuùné sí kù a kaŋ fo si ji á ku wày wír e kinyò.

¹⁷Viyíkìr vév ví kù dzə̀ ji á buʼ kinyo, a meluʼ mev mè kù dzə̀ ji á maʼ melaà.

¹⁸Liì wìr wo wù yúnin Nyùy dzə̀ moo ndzə ye yì ráné, yì kù a ran, a dù duùn fó mbìy, a kàʼày wíri.

¹⁹Dzəʼə̀m wìr ve á méŋ Nyùyi dzə̀ moo ndzə vitsə̀ʼ ye yì sə́n ji cùm. Á lo, á gbù, e làa yòʼ kiíy kifá ke kí màʼàn áwune.

²⁰Wan wòm, fó vituʼùr ví é ntir se m fó e wò, e yuùrí kijuujùŋ.

²¹Lá à yòʼ màʼày jí sém. Ku lèm, a yen fo sí fəə́ fo wò kitu,

²²sí dzə̀ dzəʼə̀m ŋgaà yúlèm, yii, a wù boy fo ayàsí adzə̀m.

²³Kìm kitú ké ki fó yiì ye bií, ku kìm, bìʼ fo yíi wìri kù lo a dzə̀ fó kinyò ke wù kwàʼtìn.

²⁴Kiír kimboʼtì ki fo wò shuù, à kfə́ə lǎm kinshwìvi e dzə̀m.

²⁵Ku tùytí síi, a leéy a dzə̀ fó mbìy. Lá à yòʼ rə̀ʼ sí, e bìn fo səné.

²⁶Á tiír kiwuú ké ki, a fìʼ, áà bóo fíʼ a ghan kijuŋ.

²⁷Kú a ghan a dzə̀ e Nyùy mbòv, a yen fóo bìn, e koy yìyí, kìn wó ŋkoòvìi. Kú a bàʼàr dzə́ə sé kisaŋ si sidzə̀m.