Read Lamnso Ŋgàn 5 Bible Online

Ŋgàn 5 - Lamnso bible

Ŋgàn 5

¹Wan wòm, sə́ʼə́m, e yuùrí ntir sém sí. Fó vituʼùr ví, é m tír wò moo fií,

²áà bóo fíʼ kiíy mó a kìŋsìn kitú ké, a kiíy jeéyjeéy fó vinyò, é vinyo ve ví fəə́ fo wò shuù vi wáa dzə ve ví kér vifií.

³Sàkì lo wù wàa leèrì wír e kiláyláy ke juŋ ki, a jí sə́ sí rəsìn moo meŋgvə́r.

⁴Fo bàm, kinyo ke à kì duùn kí kfə̀n ji lúylúy, a njim moo shwàʼ rə̀r wo á baàyìn mbìv sidzə̀m.

⁵A wìr ghár kóy və́, bo ŋgaàŋ kpú, yéné. Wù tsəə́ne ŋgaàŋ e dzəə ye yì joʼsì a dzə̀ áàŋkfəə́ wòŋ.

⁶Wù yòʼ tíy e dzəə ye a wìr ghán sho, wù wàa ker dzəʼə̀m ye juŋe. Wù shwèy ne dzə́ə yee shooy, a bó wù yòʼ fə̀m gwarìrì.

⁷Wòn vem, ké lèn ki, vèn fó vituʼùr vén ví e mò, e yuùrí. Lá vèn yòʼ ŋwày ntir se m tír ven shó.

⁸Kíŋrí fo kfə́ə wiíy woo bey ghaŋ, a yen fóo meʼ mentsə̀m me lav rə,

⁹fóo yiì màʼ kitú e wírí si, e fiìnè dzə̀ʼə̀m yé e wìr woo là mendzən, e lày kéŋ ye wò‑oò rəsin, e kèŋ viyá vinín.

¹⁰Aà mùm, bo wír ve sən‑éè saʼ vifá ve wò‑oò gisin, e kèŋ vidzə̀m, e yòv ndzəʼnìn sé.

¹¹À yií lo, a yàsí réŋér ne wò, áà wáa sòv kitú, a dìy,

¹²a ghay wún é kinyò ke kí‑iì yiìn, é bo à tén ntir, e tèn à naarìi shó.

¹³À wíy a dìy wún jii, «Yì‑iì yiì ka mo, fo m yúnín aŋgàa yeʼéy vém, e yuùrí ntir sév.

¹⁴M bìr ne lèn fo woŋe, e bìr ben ŋkuuŋkùŋ.»

¹⁵Kú a bvə̀r kifú kí, a dzə̀ ké ke Nyùy‑iì kurin, a no mendzə́v, a dzə̀ fo wò mbìʼ.

¹⁶A dzə̀ à lì ŋgoòy ŋgwàsáŋ, e dù, a waŋ e dzəə é le? Lá à yòʼ lì kitú ké, e fəə̀ kinseŋ sho e wáynjáŋ.

¹⁷Wìr kú a ker və́ə woo wiíy, a yen fóo màʼ kiwó e ghányúv wùn.

¹⁸Nyùy ku səə̀vì kóy wó ŋkoòvìi, áà bónén, e lèŋrí wiiy wò vinsùm e mbòómbòŋ.

¹⁹Mo lúm njàá lo, wú wàa leŋrí woo wiíy, vikàkàŋ ve wo woo wiíy vi ku yiì, áà wáa neŋ bèn ji dèʼ, a yaŋrí a dzə̀ wun.

²⁰Wan wòm, à ghàn é le, e bó a yaŋrí wiíy wo wù yii joonè, é bo kí koóy ji à ghár kóy sàkì.

²¹Kiíy jii, NYÙY TÀR kù leey njiìn wìr dzə̀m, kaʼày mo ghán yéví dzəə̀n.

²²Vinyo ve wìr wo wù méŋ Nyùy yii vi dzə̀ kitám kfə́, a wù kù yíi bìnkìr, e lì e wun vinyò ve bi ví.

²³Mo á sər, a bó wù yòʼ yú, bo kù dzə̀ fo kpú rəə́ yíi lò, é kiyúŋsì kfə́ ki yii, é wù bívír kitú kfə́, e bìr ŋkuuŋkùŋ.