Read Lamnso Ŋgàn 6 Bible Online

Ŋgàn 6 - Lamnso bible

Ŋgàn 6

¹Wan wòm, aà lòo dzə, e tìím mbìy ji ŋkar yè foo mbàm, e tìír kifá e wìr bìʼ wun,

²bo ŋkàʼmé wò wày ne wò e kitam, e yiì, à tó é kinyò wuu baà.

³Wan wòm, bo kinyo ke dzə̀ à yiì, e bóo bòy ki dzə̀ jii, mo ŋkar yè liìn ne wò e mbèʼ menjaar, ku dù, e neèm e si wo, a lon wun lónén ji wù fəə́r á wò fo fo.

⁴Kú a lon là meemè, a lon ghán sidzə̀m, là búʼúr.

⁵Wan wòm, sòsìn fó wo wo moo njà wo wù sòsìn fo ŋgaà jwim wo, à moo shinə́n she shí sòsìn fo ŋgaà kèr wo.

⁶Njoó ku lì mfìʼ fo vilií vi, e lèéy mo ví lo, ví wàa lìm, é ví yéʼéy wun.

⁷Ví yòʼ kér fon, kìn wír wo kuʼùn wo wù wáa kàʼày lim yév, kìn mfòómé.

⁸Á bèy, lóo dzə e sáné, ví bàʼtí nshamrì wov, e lèm e vitàv, á lóo kav vifá ve yi, áwune wàa baʼtí sa vév.

⁹Njoó və̀n, à yíi neèm e kikun, e dù meé e le? À yíi yìmèn e ghàn ka?

¹⁰Mo à yén ji wò‑óò neem, e yòyrì shishàr, a boŋ shimbuùné,

¹¹bo kitan ki kù lo, e sàsìn, e ghiʼ wò moo shóŋ, é kíghàʼ ghíʼ wò moo wir kimfaàsì.

¹²Rúrú, wìr liì kisaŋ lo, wù wàa ghan, a leèrì wíri e lám kinshwìvi.

¹³Wù lóo leèrì bèy, wù wàa bvəə sí, a ghan, a sə̀ŋ wuú nsay, a ròm virə́ʼ e wóo.

¹⁴Wù yii bèy, kwaʼtì a dzə̀ kinyo ke bi kí, báʼti ji wun yii kinyo ke kisaŋ ki, lo, wù nèn màʼ mbvəərì e wírí nsàn.

¹⁵Bìʼ bey, bó shintàm shi yòʼ‑óò dar, a bó kinyo ki súm wun, a bó dzəə̀ ye wù kúy yòʼ kfə̀n wíy a dzə.

¹⁶Yíi wìr msòŋé dzə̀ ntuùfú ye NYÙY TÀR banè, a yee saàmbàa kfə̀n dzə̀ ye wù yòʼ fə̀m taʼ e yu à yúu shó,

¹⁷a yí dzə̀ jii: Kiŋkoʼòrwùn, kimboʼtì, kinjuyrìwìr,

¹⁸kwaʼtì yee ji wìr yii kinyo ke bi kí, yáŋrí yee ji wìr ku dù, e bùʼ kinyo,

¹⁹tiím yée tiím vinjen ve kisaŋ vi, à mbvəərì wóo màʼ e wírí nsàn.

²⁰Wan wòm, kú a lèm nsər se tàr won sí, e làa yòʼ a ŋway yéʼéy yè won ŋwáyín.

²¹Wáy vinyo vìn vi é wùn moo vifá ve sùsù, e lèm, é ví wáa dzə e wò kwàʼtì ghán sidzə̀m.

²²À yií lóo ghan, é ví wáa dànèr wò, lóo buuné, é ví wáa kìŋsìn wò, yimènè, é ví wáa tir wò.

²³Nsər se tàr won sí dzə̀ kikaʼày ké, ntir yè won, rán ye yí kaʼày wuú yé, a naarì ye á naarì, kfə̀n sər wòo fó wò dzəʼə̀m.

²⁴Yì kiŋsìn wò fo wiíy wo bí wo, à fó kilayláy ke juŋ ke wiiy wìr wo wù ghán viŋkar ki.

²⁵Lá à yòʼ siìmé vijuŋ və́, kìn sí ye wù bvəə́, lévti wíri shó.

²⁶A dzə̀ wiíy woo sàkì, wù sù kibam ké. À ghár kóy wiiy wìr, bo à ràn ne dzəʼə̀m yé.

²⁷A dzə̀ wìr bèʼèy və́y é nsaŋ, la wú yòʼ tòn ndzə̀y sə́ á?

²⁸A dzə̀ wìr wàa ghan e kay və̀y, la wuú rəə́ yòʼ bùvrì à?

²⁹Kù dzə̀ sá réŋréŋ mo a wìr lì wiíy wìr, la wù yòʼ dù là ŋgeʼlàʼ.

³⁰Wíri yòʼ yii yám báshi shóŋ wo wù shoŋen kifá ke yi, a gháʼ jíŋ wun.

³¹Yii bèy, aá koò, wù kù làʼ kàŋ saàmbà, a fə̀m dzə̀ ji wù fiine vifá vee wun lav vidzə̀m.

³²Wìr wo wù li wiiy wìr yòʼ kér vifií, wù yii bèy, a wù kfə́r a dzə̀ kitú kfə́,

³³aá wáa dzə̀v wun, a shoór, a beèmè ji wir joònè, e dù, e mày.

³⁴Dòʼshwiiy lum ŋáʼay e kishiíy fó, é wù siir ŋkfə́tír là mendzən.

³⁵Wù yòʼ wíy biimé vilaʼày, a bó kifá ke a dzə̀ á nə̀ʼsín wun sho, kí ghèén wun ki yòʼ dzə̀.