Read Lamnso Ŋgàn 7 Bible Online

Ŋgàn 7 - Lamnso bible

Ŋgàn 7

¹Wan wòm, kú a kuumé jí sém sí, a ghar nsər sém kijuŋ.

²Á yunín nsər sém sí, e fíʼ wiy bonén e shiíy. Ku lì ntir yem é shií réŋréŋ moo wan si wò,

³e kfə̀n lì ji kifá ke à waʼrì ghárí, a mèrìr, é yì wáa lùm e wò shiliv ghán sidzə̀m.

⁴Ghár vifií ve ví tiimen ne vi moo jemèr yè bèy, a suusín vèn à kiíyi moo ŋkar yè tìm,

⁵é yí fíʼ kìŋsìn wò fo wiíy wo wù ghán viŋkar, leerì wíri e kiláyláy ke juŋ ki.

⁶Mò‑oò dzə́ e lav, maʼ sí, leey fo nsàn se vintaà,

⁷e yèn wánlè nsùm wùmòʼ, a dzə̀ə́ njìʼ e kiŋkàŋ ké wàʼbìn, a bó vifií ví yóʼ ne tìím, a bó wù yòʼ sí kiiy jeéyjeéy fó vinyò.

⁸Wù‑uù ghán e dzəə ye yì shaa e wiíy woo ghányúv ghaa lav. Wù nèn lò, e lì kiwuú ké dzəə ke kí‑iì bin e wiíy və̀y lav,

⁹a shùy tóŋrí ne, e shùu meraaràŋ, a ndzə sí sə́né.

¹⁰Mo wù sə́yí, wiíy və̀y nèn nyoòrì, wùn wun tárnín fó, a wù ku màʼ ndzə̀y sí wáa dìn ji sàkì və̀ne, a wù kiʼ bèn, kiʼsìn kiʼsìn.

¹¹Wiíy, a wù táv kitú, yii kinyo là dzə̀rkìtu, a bó wù yòʼ bésin e lav.

¹²Ghán sidzə̀m si kù dzə̀ se wù fəə́, tíy e dzəə, tíy e virə̀ʼ vé way, tíy bèy, kíy a dzə̀ ŋkiy.

¹³Wánlè nsùm və̀y bvə́y, wù màʼ wó, e baàmé sho fo vilòŋ là woómé, e tùytí sí e wùn wó, e sùúy sho jii,

¹⁴«M yiì ne cu kikòŋnìn lán, e kòóy nyám. M nàá ne, e bàʼtí ŋkàʼ shó fo laʼ.[6]

¹⁵M kì fəə̀ ben, a tàʼ a dzə̀ wò e shií, yii bèy, a m tàʼ ne, e yèn.

¹⁶M nàŋsín ne kikún kém, e sə̀tí e ndzə̀y sé nshòm seé Ejiv si.

¹⁷M nàŋsín ne kikún kém e vifá ve rəʼtìn ví vee *mer, wùn à vee *alo vi, à vee *sinnamon vi.

¹⁸Wìyi, é wòsò ku shìíy, é ndzə rán, a nyòmèr wún wòsò, a sheʼrí.

¹⁹Lá à yòʼ a fàn, lum wom yòʼ dzə̀ fó laʼ, wù dù ghán kwaʼda.

²⁰Wù yòʼ yíi tav kfən, bìʼ fo wù lòo dù, e lì mbàm nyanyày, a wù kù wíy kfən a dzə̀ é kishiíy ke wù‑uù kàʼàn.»

²¹Mo wiíy və̀y bìnèrìn kwaʼti wánlè nsùm e jí si, e sò wun e kiláyláy kfə́ kí,

²²wù nèn kù lò e bàm wó, a dù moo mbòŋ wo á du, e see, kìn moo njà wo wù léʼ e wun ŋwàn, aá téʼ ne fo mbìy.[7]

²³A bó wù yòʼ kiiy jeéyjeéy, e meé mo mvəne yíi koo wun, e tosín. Wù kù du moo shinə́n she shí jiŋkìr, du e shùu ntàŋkìr, a bó wù yòʼ kì ji wun sí du, e ran a dzəʼə̀m rə́.

²⁴Á bèy, wòn vem, vèn fó vituʼùr vén ví e mò, e yuùrí. Vèn wáy vifií vén ví e ntir ye m fó e vèn lèn.

²⁵Lá vèn yòʼ wìy biìmé, é kfə́ə wiíy woo ben lévtí ven. Lá vèn yòʼ wìy shèm ŋgoo rə.

²⁶Wù lèmér ne vilum anín, e yùyrí, à vintav ve wíri ví shó.

²⁷Du yee wun lavi dzə̀ dzə́ə ye yì li wír, du sho aàŋkfəə́ wòŋ, e kfə̀n a dzə kóʼtí ye wìr kóʼti e sə́r sày.