Read Lamnso Ŋgàn 8 Bible Online

Ŋgàn 8 - Lamnso bible

Ŋgàn 8

¹Wìr dzə̀m yuúrí, e yù mo vifií ví fúŋé, e kfə̀n yuùrí mo kiíyi nan jí, fó yéʼéy.

²Ví fúŋ fo aŋkoŋ veé ghaŋ se dzəə, fúŋ moo wiíy wo wù nan jí e mentàrnín.

³Vifií ví kù tíy e dzəə se sí nəə e ŋkàlaʼ, fúŋ fo shùu kày yeé ŋkàlaʼ.

⁴Éè wìr msòŋ woó kitu ke nsay, m súŋnin a dzə̀ e vèn wir dzə̀m.

⁵Wòn vem, vee anjìʼ, vèn yéʼéy, a ker vifií ví. Ven vee viyúŋ, vèn kfə́n áàtòŋ.

⁶Vèn yuúrí, m yíi a suúy vinyo a dzə̀ ve ví kér gháŋ, vinyo ve ví yíi a fəə fo mǒ shuù vi dzə̀ ve ru ví.

⁷M kù yii suuy a dzə̀ suuyrú cáʼcáʼ, shuu wómé yii ban kimboʼtì feyì, du, joʼsì.

⁸Jí se sí fəə́ fo mǒ shuù si dzə̀ là nsem sidzə̀m, sí yòʼ litì kinyo fo bàm, a bó yòʼ dzə̀ sí bàʼ wír e koŋ.

⁹Sí kù dzə̀ tìítiy fo fiì sidzə̀m, a dzə̀ se ru sí fo wìr wo wù koŋ e kiíy.

¹⁰Shóʼ ntir sém sí, e shaà *kisha ke mbàm ke fəvír kí, shóʼ vifií ví e shaà kisha ke mbàm ke baar ké ntay ki.

¹¹Vifií ví bòŋ, e shaà vifá ve sùsù vidzə̀m, e bòŋ, e shaà kifá ke wìr yáŋri kidzə̀m, a bó kifá ki yòʼ dzə̀ ke dzə̀ á fìʼsìn shó.

¹²Dzə̀ mo vifií ve ví lo fo Nyùy, a kì mo móo baàmè vinyo, m fìír, kì mo móo tàr kinyo.

¹³Wìr lóo yunín NYÙY TÀR, bo wù sí ban kinyo ke bi kí. M ban kiŋkoʼòrwùn, ban lám woo baà.

¹⁴Tír mo wíri, a fó mo vifií ve ru ví. Yii mo, bo á wáa kiíy jeéyjeéy fó vinyò, a kiíy e ŋàŋ.

¹⁵Fó mo vifií áàfone, é bo á wáa saʼ kijuŋ, fó mo vifií e vé saʼa, é bo á wáa tinén vinyo e nsànloŋ.

¹⁶Vé wòŋe siysì woŋ, bee a dzə̀ mo. Vé ŋgvəne náŋsin nsay, mbaa a dzə̀ mo.

¹⁷M koŋ wir dzə̀m wo wù koŋ mo, a ve á taʼ mo é shií kù yíi yen.

¹⁸Vikuʼùy wùn à ghvə́me kù lo a dzə̀ fo mò, a bùʼ wo fó mo dzə̀, a bó yòʼ dzə̀ wù mày.

¹⁹Kifá ke kí lo fo mǒ kiwo kidzə̀m ki bòŋ e ŋàŋ, kí bòŋ, e shaà kisha ke mbàm ke fəvír kí, e kfə̀n bòŋ, e shaà ke baar ke á shèŋrìn.

²⁰M yii yii vinyo vém tìítiy là nsem, tínen ve tinén ví là kiloʼ.

²¹M fó vikuʼùy e wír ve á koŋ moó, rúner vitáv vév e vifá ve juŋ vi.

²²Rúrú, NYÙY TÀR‑iì yiì ne, m wáa dzə fo yàŋgùʼ, e bó a lìm lim se wù‑uù lìmèn.

²³Mò‑oò tùúy ne vèr wun fo yàŋgùʼ, é bo wù wìy a bom kitú ke nsay.

²⁴Bo rìbà ndzə̀v wáa dzə, é ntòŋ sé ndzəv sí keʼ, a meekír, a mò‑oò sì.

²⁵NYÙY TÀR‑iì tuuy virùmèn, lem agwan, a m kù‑uù sì.

²⁶M kù‑uù sì, é bo NYÙY TÀR wìy a bom kitú ke nsay, à ŋgvən se sí dzəə̀n shó si, à kibvər ke mbìy ki.

²⁷NYÙY TÀR‑iì lem yúv[8] fó, a m kù dzə̀, səŋ nsə̀ŋ, kaári rìbà ndzə̀v shó, a m kù dzə̀ fó si.

²⁸Wù‑uù ghàr mbàʼ, sí wáa səŋ e yuv, e mvə̀ʼtì ntòŋ sé ndzəv seé sar rìbà ndzə̀v.

²⁹Wù‑uù jàv bìíy se rìbà ndzə̀v, e kàntì ndzə́v fo yí wáa leŋ, a fəə e meshavtí. Kù‑uù sì kinsə̀ŋ ke nsay mo wù‑uù tamen.[9] Nyùy‑iì yii vinyo vìn, a m kù dzə̀ fó si.

³⁰Mò‑oò tíy e wun si ji wír və lìm woo jwáʼ, shéʼer wun kishiíy kidzə̀m, séŋ, yú vijuŋ e wun si ghán sidzə̀m,

³¹shéʼri yén ye m yenen kitú ke nsay, yú vijuŋ ve wìr msòŋ wo wù dzə́ sho.

³²Á bèy, wòn vem, vèn fó vituʼùr ví, e yuùrí. Bòŋ ké wìr ve á ghán e mǒ mbòv.

³³Vèn yuúrí ntò sém sé yeʼéy si, é sí yii, é vèn wáa dzə afií. Vèn wáa yen fóo ŋway.

³⁴Bòŋ ké wìr wo wù yú jí yem, dzə́ e mǒ shùu lav, shiy mo é shùu kày.

³⁵Wìr wo wù taʼ mo, yéné, ŋgaàŋ yíi a ker dzəʼə̀m ye dáa, é NYÙY TÀR wáa leéy wun, a kòŋ.

³⁶Yii bèy, wìr tén fóo tàʼ mo, bo wù kfə́r a dzə̀ kitú kfə́. Wìr wo wù ban mo kù taʼ a dzə̀ kpú.