Read Lamnso Ŋgàn 9 Bible Online

Ŋgàn 9 - Lamnso bible

Ŋgàn 9

¹Vifií ví bàʼrì ne lav rə, e tùúy vitóm saàmbà e wùn wó.

²Ví seèrí ne nyám sə́ sé kiŋkàʼ, e bìŋrì meluʼ, e bàʼtí kidàŋ ke viyikìr,

³e tsə̀nsí və́ vé lìm vee vikìy ji á du, e kòʼ é kitar keé ŋkàlaʼ a fuŋ jii,

⁴wìr woo njìʼ e dzə̀m kú a wìy a e wun lav. Á ku sùúy aàlàvìfií adzə̀me ji vifií ví suuy a jii:

⁵«Vèn wiy, e yì vifá vém vé yi vi, vèn wiy, e yì vifá ve m baʼtin ví. Vèn wiy, e nò meluʼ me m bìŋrìn mè.

⁶Vèn tín kiwúu kén kí fo anjìʼí bàm, é vèn wìy shìíy. Vèn wáa ghan e vifií ví mbòv, é vèn wìy a kiíy jeéyjeéy fó vinyò.»

⁷A wìr tír wír wo wù shéʼ Nyùy, bo wù kù ló kuù ŋgaàŋ, wìr wáa dìn jay wìr wo wù méŋ Nyùy, bo ŋwèrín kù lo lemér wun.

⁸Lá à yòʼ a tir wír wo wù shéʼ Nyùy, fo wù wáa bàn wò. Aà din jay a dzə̀ wo fiì, bo wù yíi a kòŋ wò kóŋen.

⁹Á fo ntir a dzə̀ e fiì, é wù ku yiì màysì fìír. Á yeʼéy wír a dzə̀ wo wù yúnin Nyùy, é wù ku yiì dzə̀sì kiíy rə́.

¹⁰Wìr lóo yunín NYÙY TÀR, bo ŋgaàŋ kèʼ ne, a ker vifií. Wù lóo kiíy wun woo Ŋgaà wo Ranén, bo wù sí kiiy mvə́m se vinyò.

¹¹Aà suúsin vèn à vifií ví, bo ví yíi dzə̀sì vishiíy vé. À ghár, bo ví darìr dzəʼə̀m yé.

¹²Rúrú, aà jumrì vifií, bo ví yíi làʼ wò, à wáa ŋway ké ŋwayín, bo ŋgeʼ kù dzə̀ ye.

¹³Kiyúŋsì ki dzə̀ moo wiíy wo wù yor kfə́ yórin, a bó wù yòʼ kiiy fo kí binè, yii kinyo là dzə̀rkìtu.[10]

¹⁴Wù lo, wù màʼ ntaʼ, a yeʼ e wun shùu lav, lo, wù fəə̀sín é kitar keé ŋkàlaʼ.

¹⁵Fəə́sin, jaŋ wír ve á shaasìn fo, tiir vifií a dzə̀ fo á du, nèn yoŋ aànjìʼi jii,

¹⁶«Vèn ku wìy e mǒ lav.» Wù yén woo là vifií, wù yòŋ shó jii:

¹⁷«Mendzə́v me shoŋén mè nyòm jeéy, a viyíkìr vee yí é kilìr vi rə̀ʼtìn sa kfə́ jeéy.»[11]

¹⁸Yii bèy, a bó ŋgaàŋ yòʼ fə̀m kiiy ji kpúu dzə̀ á fo, a wù yòʼ yén ji və́ vé kiŋgàné kù sì a dzə̀ é sày.