Read Lamnso Ŋgaà Tàrvìnyò 10 Bible Online

Ŋgaà Tàrvìnyò 10 - Lamnso bible

Ŋgaà Tàrvìnyò 10

¹Kimkpú ke shifarìn[4] ki lo, kí bìnèr kiyóʼóy ke bìʼ, kí wàa rə̀m, a bir, a kù dzə̀ mo shinyorìn she wìr yii, a wù yúŋsi yùŋsín shí lo, shí bìvír kinyo ke kí kér vifií, à ke kí kér ghvə́m ki.

²Fiì kù yii tíy kfə́ é yiì yee tìítiy, a kiyúŋ kí tíy e yee kintéŋe.

³Kiyúŋ kí fə́m lóo ghan e dzəə, kí kù a buú vifií, a dìn e wìr dzə̀m ji wun yùŋsí.

⁴A taà saʼ shwiiy kilòŋ vèn wun, lá à yòʼ tèn lim yé, bìʼ fo, aà néŋ e wun si, bo dzə̀ wù làysìn jay wò.

⁵M kfə̀n yèn kinyo ke bi kímóʼ kí é sar shùy fèn, a dzə̀ jay wo wù lo fo atǎr saʼa.

⁶Kinyo kìn ki dzə̀ jii, á sí kóʼor viyúŋ áàntaʼ ve á kér ghvə́m, sə́ʼər vé ghàyi, dzəʼə̀r aàntaʼ vee fó tèr.

⁷M yèn ne, aàkwàné ghán e vitu ve nyàm se ŋkoʼ, aàtǎr wòŋe ghán e wuú fó nsay moo akwàn.

⁸A wìr túŋ bií, bo kù yíi gbù wun sho, wìr wáa kiv kirə́v ké lav ji wun nəə́, bo yò kù‑úù té wun.

⁹Wìr wáa tuŋ tíy, bo a tàm yí lèmér wun, wù wáa lìm lím kicií, bo a tàm kí lèmér wun.

¹⁰A njàm sə̀r, la à yòʼ sày, bo à kér fóo famtí a dzə̀ sóŋ, e bóo lìm lim sho. Wìr fiirì, kinyo ke à kì taʼ, e yiì ki lìm.

¹¹A wìr kér nsə̀ŋ, e kfə̀n màʼtì yò té wun, é bo wù wáa tàʼ, bo yòʼ dzə̀ yì kfə̀n sə̀ wun.

¹²Fiì lóo suŋnín, wíri wàa ghvəm wun, kiyúŋ kí súŋninè, kí bìvír kitú kfə́.

¹³Kiyúŋ kí keʼ lóo suŋnín, kù a fəə kiyúŋsì fo wun shuù, súŋnin, lóo ndzəə̀r, kí kfə̀n ji ké ŋgaàbaá.

¹⁴Yii bèy, kiyúŋ kí kù a suŋnín, a tonén. Bó wìr yòʼ dzə̀ wo wù kiìn kinyo ke kí bvəə́shi, e koóy. A dzə̀ yòŋ la kinyo ke wìr wíy kpu, é kí wáa dzə.

¹⁵Lím kiyuŋé lo, yí rèŋèr wun, wù mèŋ mo wù yíi ghan, e bóo kfən fo laʼ.

¹⁶Éè wìr vem, lòné dzə̀ wó wòŋ wo fòn wov dzəə̀n wánlè wo terí, a vilìmbìy vév ví yí a dzə̀ ŋkàʼ vijàvndzə vidzə̀m.

¹⁷Wìr vem, vijuŋ vi dzə̀ vé wòŋ wo fòn wov fəən a dzə̀ fó kfəə wìr vee wír, a vilìmbìy vév ví yí ŋkàʼ é ghan see réŋ, yí, ji á wáa ker vitaáví, e làa yòʼ a no ji mè koó.

¹⁸Wìr njoó fóo naŋsín vitú ve lav, ví fòy, maʼ wún lóo dzə, ví wàa shem.

¹⁹Viyíkìr vi yii yii, a wìr yú vijuŋ, a meluʼ mè yii, a wúné tékir wír, yii bèy, a kù yii mbàm kinyo kidzə̀m.

²⁰Lá à yòʼ a roòmè fon, fə̀m e wò mvə̀m kwàʼtì. A fə̀m dzə̀ e wò wàn lav kishìíy, à wàa yen fó kuù ŋgaà mbàm. A tàm shinə́n shí yù, e lì jí yè, e dù sùúy e ŋgaàŋ.