Read Lamnso Ŋgaà Tàrvìnyò 11 Bible Online

Ŋgaà Tàrvìnyò 11 - Lamnso bible

Ŋgaà Tàrvìnyò 11

¹Ku lì vifá vé ve yi vi, e tsə̀nsí e ndzə̀n ndzə̀v, ntàm lóo dàr, áà koóy séʼ.

²Ku jàv kéŋ yée, e tìír e wíri jeéy jeéy, bìʼ fo bó à yòʼ kiìn kinyo ke a dzə̀ kí kòóy é wòŋ.

³A wuú kòʼkír e yuv, bo yí kù‑úù ló. A kicí kí gbù, kìn dzə̀ é mbìv rəné, bo kù dzə̀ fo kí yíi a neŋ.

⁴A wìr lò, a shìy kfə́ ji ndzə wáa dzə mo taʼ wun, bo bó yòʼ dzə̀ wù wày kifá, a bó yòʼ dzə̀ sá wù kàv.

⁵Mo bó yòʼ dzə̀ à kìíy mo wàn ghanen, e bó a ŋèʼ e wiíy bvə̀m, bo kù dzə̀ sá réŋréŋ mo bó yòʼ dzə̀ à kìíy mo lím Nyùyi dzəə̀n, wun wo wù bomen vifá vidzə̀m.

⁶Wáy ŋgoòy se vifa si jeéy jeéy, bìʼ fo bó à yòʼ kiìn ke a dzə̀ kí kùy, a tàm é ghan símóʼ sí, vidzə̀m vi kùy.

⁷Rúrú, kí bòŋ e le féyì ji wìr wáa dzə sho, a yen mo ndzə rán kishiíy kidzə̀m.

⁸A wìr shìíy rú viyá vinín, kí bòŋ é wù wáa sheʼrí viyá vee shooy. Wù lóo sheʼrí, wù wàa kuumé ji ndzə ye sənér kù dzə̀ fó mbìy, a viyá vee fó vi dzə̀ vinín, a vinyo vee fó mbìy vidzə̀m vi kù dzə̀ là nsàv.

⁹Wánlè nsùm, yuúrí. Á yu vijuŋ vé vi lèn wo à dzəə́ yii vinsùm. Mo à yii vinsùm, kú a sàvnìn kishiíy kidzə̀m. Á yiì kinyo ke à kwàʼtìn kí, a yiì ke shilív shé shi báŋri ki. Yii bèy, kú a kiíy ji Nyùy kù wíy tiír wò e kibàʼ ke nsaʼ fo vinyò vidzə̀m ve à yiìn.

¹⁰Á bèy, kú a sàvnìn, e làa yòʼ a rə̀m ndzə, a nə̀ʼsì wún wó, bìʼ fo dzəʼə̀m yé vinsùm rə̀ne kù lo, e nèn shaà shaàn ji ghaàr.