Read Lamnso Ŋgaà Tàrvìnyò 12 Bible Online

Ŋgaà Tàrvìnyò 12 - Lamnso bible

Ŋgaà Tàrvìnyò 12

¹Éè wánlè nsùm, kú a kuumé Ŋgaà Mbom wò, aà dzə̀ə́ e wò vinsùm. Á kuumé, é bo vishiíy ve bi ví wìy a wìy. Viyá ve mendzə̀n ve à wíy a suuy jii, «M yòʼ dzəə́ yú fó a yi dzəʼə̀m.»

²Dzə̀ ghán se à wíy a leéy virə́ʼ, a yen ji bó shùy yòʼ dzəə́ báné, a bó ŋwee wùn à mejiy mè yòʼ dzəə́ fó rán, a ndzə kù sí kiʼ fo wò mo sə́ti a mbàʼ wuù bey.

³Rúrú, wánlè nsùm, kú a kuumé ŋgaà mbom wò, é bo shwín sé si wìy a yàʼ, é lav yè gbu. Kù dzə̀ ghán se ntav wíy kivín a ŋgòʼ se kiban si yòʼ dzə̀ə́ sinín, a vileèy vi sí leékirì.

⁴Dzə̀ ghán se vituʼùr ví səə́ri, a bó tíy kibane yòʼ dzəə́ súŋnin, a ví yú, wónlèé lóo yòv e maàndzə, ví wàa yu jí bǎm gwan. Yii bèy, shinə́n shí lóo gáʼ tóŋ gaʼán, mbuùné sí nèn kàŋ fó si.

⁵Kù dzə̀ ghán se wìr yòʼ dzəə́ yú fó a gwàmrì kiŋgwàmrì, lóo shur kiwuú, wù wàa fàn fó gbù. Wír, a wù sí dzən fúv, ŋaŋrì e njà ŋguùmé, a buù viŋgér kpú ne, kù dzə̀ mo wìr lo, wù wàa ghaà sə́r sày, a dù, vindìykpu vi wàa fəəkír fo virə̀ʼ.

⁶Kú a kuumé ŋgaà mbom wò, é bo kfəə̀ wò wáa tinén, aá yúy ne kighín, kitém ki bvə́ʼə́m é shùu dàn fo dzəʼə̀me lo.

⁷Á bèy, é wúné kfə́n é bàm é nsay fo wú‑uù loòn, é kiyoy ki kfə́n e Nyùy wo wù‑uù foon.

⁸Ŋgaà Tàrvìnyò yoŋ ji ke a dzə̀ wìr wàa yòŋ ki dzə̀ jii, «Kisáŋ fo kisáŋ ki, a kidzə̀m ki kù dzə̀ kisáŋ.»

⁹Yòʼ kù‑uù jòʼsì fiír ye Ŋgaà Tàrvìnyò və̀n‑eè fiirin, wù‑uù yéʼey wíri mo á wáa kiíy jeéyjeéy fó vinyò. Wù‑uù lì ghán, e kàʼày, e kfə̀n sìysì ŋgàn sinín.

¹⁰Wù‑uù wày féyì ji wun tar á jí se gheenén sí, e bóo fíʼ saŋ vinyo ve wù sáŋé a dzə̀ mo ví yii dzə́.

¹¹Jí se fiì sí dzə̀ moo mbàŋ ye nshìy danèr nyám sho, a ŋgàn se á baʼtin sí dzə̀ moo mban se sí njímé.

¹²Wan wòm, á yen, kú a kiíy jii, ŋwàʼ wo saŋéné yòʼ kér fo wú seeyin, a ŋwàʼ woo yéʼéy é ŋàŋé reŋèr wún wìr.

¹³Kimaysì kí nén a dzə jii, wìr wáa ghvəm Nyùy, a yunín nsər sə́, bìʼ fo kù dzə̀ kinyo kìn ke wìr kér fó a yiì.

¹⁴Kinyo kidzə̀m ke wìr yii ki dzə̀, a Nyùy wíy tàr kidzə̀m, kìn dzə̀ ke juŋ ki, kìn ke bi kí, kìn ke á yiìn é kilìtì.