Read Lamnso Ŋgaà Tàrvìnyò 4 Bible Online

Ŋgaà Tàrvìnyò 4 - Lamnso bible

Ŋgaà Tàrvìnyò 4

¹M kfən lèéy, e yèn mo á nəʼsì wíri é sar shùy fèn. M yén, aàghéʼnceyí tóŋé, a bó ŋgaà sə̀mér yòʼ dzə̀, bìʼ fo vitaáví ví kù siìn áàŋgàa vibàn véví wo, aá táy áwune, a bó yòʼ dzə̀ wìr mùm fóo tom áwune.

²M leéy, e yèn kém ji bòŋ a ké ŋkfə, e shaà ké wìr wo wù dzəə̀n e tin, aá nyavrì sho.

³A ke kí bòŋèn, e shaà kidzə̀m ki kù dzə̀ ké wìr wo á yòʼ fə̀m‑eè lo dzə̀ə́, a bó wù yòʼ‑oò lo yèn yii ye bi ye wíri yii e sar shùy fèn.

⁴M kfən yèn ji wíri lo, á gìsín é lìm, lo, á wày vifií ji á kiíy á kiwó ke lìm ke juŋ ki. Aá kù yii bèy, a dzə̀ bìʼ fo wìr lo, wù wàa tàʼ mbǒv ŋgaà shweèsí və ntéŋ, a lìm ji wun ku shaà wun. Kin ki kù dzə̀ sá kinyo kisáŋ, a dzə̀ moo ji wìr jum shwér ji wun koó.

⁵Yii bèy, kiyúŋ kí lóo jiíy e wóo, kí kfə̀r kitú kfə́.

⁶Kí bòŋ ji à lim ji weè, e kòóy séʼ shishàr, e shaà fóo lìm, e sòrkìr ji à koóy séʼ e kuʼùn. Sorkìr yee béne kù dzə̀ kinyo kisáŋ, a dzə̀ moo ji wìr jum shwér ji wun koó.

⁷M kfən yèn kinyo kímóʼ kí é sar shùy fèn ke kù dzəə̀n sá kinyo kisáŋ.

⁸Kí dzə̀ ji wìr lo, a wù dzə̀ là wír, là wán, là fə́r, wù kù a gisín e lìm ghán sidzə̀m là meemè, a bó wù yòʼ yén kifá ke wù káví, a kí gheen wun. Bó yòʼ dzə̀ wù mèé é kiliŋ kée dzər jii, «M lim a dzə̀ fo la? Yé a lìm, a bó yòʼ dzə̀ m dzə̀ʼə̀m, a yu vijuŋ.» Kin ki dzə̀ kisáŋ, a dzə̀ lim vishi ve bi ví.

⁹Kí bòŋ ji wíri wáa lìm lim abaà. Á lóo lìm bèy, é wùmòʼ nèn a koóy fo wùmòʼ.

¹⁰A wìr gbù, wùmòʼ nèn tòm wun. Mendzən mè dzə̀ me wìr wo wù gbu, a bó wù yòʼ kér ŋgaà ntom.

¹¹Wíri yii neem abaà, á wàa yu lum. Wìr wáa neŋ wùn mòʼón, wù kfə̀n a yu lum e le?

¹²A wìr fùnèn wír e mòʼón, bo a dzə̀ wù kù sò. Wìr wáa fùnèn wír abaà, bo dzə̀ á kù sò wun. Kfəə̀ wo á toyin ŋgay sitaár yòʼ dzə̀ wù tìnén cér.

¹³Bòŋ a ker wánlè, a wù kér vifií, tanè, e shaà fó a ker fon woo ránsisi, a dzə̀ kiyúŋ, a bó wù yòʼ yú ntir.

¹⁴A dzə̀ wánlè woo bey fəə́ fó sháŋ, wù yì vifon, fə̀m mo vé‑eè dzəən wun a dzə̀ é kfəə kitàne.

¹⁵Kù dzə̀ mo mò‑oò yenen, a wánlè yí vifon, a màŋgòŋ woó sar shùy tíy e wun bàm, bínsi sáʼ rə́.

¹⁶Wù wáa saʼ wíri nyanyày. Yii bèy, ŋgwàʼ ye yì‑iì kóʼ fo bàm nèn lò, a tàʼ kinyè kfə́ ntéŋ. Rúrú, kin ki kù dzə̀ sá kinyo kisáŋ, a dzə̀ moo ji wìr jum shwér ji wun koó.