Read Lamnso Ŋgaà Tàrvìnyò 6 Bible Online

Ŋgaà Tàrvìnyò 6 - Lamnso bible

Ŋgaà Tàrvìnyò 6

¹M lèéy, e yèn kinyo ke bi kímóʼ kí ke kí kooy e sar shùy fèn, a dzə̀ kinyo, a kí tíy e wìr msǒŋ wùn é ŋàŋ.

²Kí dzə̀ jii, Nyùy lo, wù fò káv, e kfə̀n fò bùʼ wùn à ghvə́me e wìr, a bó wù yòʼ kfə̀n buu kifá kímóʼ kí ke wù kér shií shó. Yii bèy, a Nyùy yoʼ yiì ji wù wáa yu vijuŋ ve vifa vee shooy, lo, nèn kù a yu viŋgwìy vijuŋ ve vifa vìn. A kin ki kù dzə̀ kinyo kisáŋ. Kinyo, a kí bìr féyì, kfə̀n wiy e nyári.

³A wìr dzə̀ə́ wón wií, e dzə̀ʼə̀m viyá vinín, á fə́m a taŋ viyá və́, e làa yòʼ a kiíy mo ví dzəə̀n, a bó wù yòʼ yú vijuŋ ve vifa ve wù kérí, kí kfən kòóy ji lá wìr yòʼ fə̀m a dzə wóo dzəə̀mè wun, bo m yèn kém ji ké wan wo á taŋen táŋén kí shaà a ké ŋgaàŋ.

⁴Á táŋ wán, la á yòʼ a way vifií shó. Á kù làysìn làysìn, e làa yòʼ shù yír.

⁵Wù yoʼ yèn sí shùy, a bó wù yòʼ kì kifá kímóʼ kí. Yii bèy, kfə́ kí bòŋ, e shaà ké ŋgaà bùʼ və̀n.

⁶Kfə́ kí bòŋ feyì. A ŋgaà mbàm fə̀m shìíy viyá ansə̀kì abaà, shiiy bèy, a bó wù yòʼ yú vijuŋ ve bùʼ və, kinjòʼsì kfə́ kí kù a dzə kpú, réŋréŋ moo wán wo wù tosin və̀y.

⁷Kifá kidzə̀m ke wìr gísin limè ki kù dzə̀ ji kifá ki du é shuù, yii bèy, a bó yòʼ dzə̀ buù və kpù.

⁸Bo fiì shaà kiyúŋ lèn, a dzə̀ é gha? Bo vijuŋ ve ŋgaà kitàn kér vi dzə̀ ka? Wun, a wù mérír ne dzəʼə̀m rə́, e fíʼ kiíy mó a dzə e wírí mvəm.

⁹Kù dzə̀ sá lím kisaŋe bey, a kù dzə̀ mo wìr wáa mùm ji wun bám shwér. Kí bòŋ a yu vijuŋ ve shifarìn she à kérí, e shaà fó a ker shií é kifa ke bó yòʼ dzə̀, à wìy a ker.

¹⁰Kifá kidzə̀m ke kí‑iì siìn kí dzə̀, aá yóŋ ne mo kí kér fó a dzə, a vèsən kì kifá ke dzəə̀n wir msòŋ. Vèsən kì ji bó yòʼ dzə̀ wìr bìʼ mbìʼ wùn Nyùy, e shaà wun.

¹¹À súŋnin ŋkóŋkóŋ, à tòvsìn vinyo. Bo seʼ mbìʼ dzə̀ ka lèn?

¹²A dzə̀ kìíy la kinyo ke dzəə̀n ke juŋ kee ji wìr wáa yen e vishiíy ve wù béʼri e nsay? Dzəʼə̀m wìri kù dzə̀ là nsàv, shaa moo kindzə̀ə́ndzəm. A bó yòʼ dzə̀ sá wìr sùúy kinyo ke kí wíy a koóy e sar shùy fèn, a wù bín ne ndzə̀m.