Read Lamnso Ŋgaà Tàrvìnyò 7 Bible Online

Ŋgaà Tàrvìnyò 7 - Lamnso bible

Ŋgaà Tàrvìnyò 7

¹Liì wo juŋ wo wìr rə́si kérí bòŋ, e shaà biʼ yeé kilùm, a kishiíy kfə́ ké kpu ki bòŋ, e shaà kishiíy ke á dzəən wun.

²Kí bòŋ ji à du a dzə̀ kinsham ke kpu, e shaà fóo dù a dzə̀ kiŋkàʼ, bìʼ fo kinjòʼsì ké wìr dzə̀m ki kù dzəə̀n kpú. Wír ve á dzə̀ə́ atine ku lì kin e vifii.

³Mendzən mè bòŋ, e shaà shéʼ. Wìr sov kitú, wù yèʼéy vinyo.

⁴Fiì yii tiir vifií a dzə̀ é kinsham ke kpu, yii bèy, a kiyúŋ kí tiir kfə́ vifií a dzə̀ é kiŋkàʼ.

⁵Kí bòŋ, é wìr yuúrí ntir fiì, e shaà fó a koóy luŋ wo viyúŋ ví maʼà.

⁶Shéʼ kiyuŋé dzə̀ moo və́y viyaŋ wo á tònèn, wú wáa ghàghà e sar kìŋ. Kee shooy ki dzə̀, a bó nsàv yòʼ dzə̀ shó.

⁷Rúrú, fiì lóo kùvrì kiŋkùvrì, wù kfə̀n é kiyuŋ, a kòyàr bívir wír.

⁸Kimaysì ké kinyò ki bòŋ, e shaà keʼ, a lòweè bòŋ, e shaà kiŋkoʼòrwùn.

⁹Lá à yòʼ a tav, a shwiíy kilòŋ. Kù yii lem viyúŋ dòʼshwiíy e shiliv.

¹⁰Lá à yòʼ a sòv ji vinyo vi‑iì dzə́ fo ŋgùʼ vijuŋ, e shaà vee lán, bìʼ ka? Aà sov bèy, bo kí din ji bó à yòʼ kì vinyo.

¹¹Vifií ví bòŋ sa réŋréŋ moo vitsə́ʼ ve wìr yiin. Ví fó séʼ e wìr dzə̀m wo wù dzəə̀n é sar shùy.

¹²Vifií ví kiŋsìn wír, a mbàm si kiŋsìn wír. Yii bèy, a seʼ vifiì dzə̀ ji ví kiŋsin ŋgaàŋ, fo dzəʼə̀m rəə́ bír.

¹³Vèn shoóshí mo Nyùy yii vinyo və́. A wù bòm kifá, e gòór, a dzə̀ naàrì la?

¹⁴A ghán sí fəə̀, e bòŋ e wìr, wù wàa sheʼrí. Sí du, e bìr, wù kù a kuumé ji kidzə̀m ki lò fo Nyùy, a wìr yòʼ kì kibvəə́shí.

¹⁵M yèn ne vinyo vidzə̀m e mǒ dzə̀ʼə̀m yee là nsàv rə̀n. M yèn ne mo wìr woo là nsem lo, la wù yòʼ ndzə̀ytì e kitu ke nsay, a ŋgaà vinyò ve bi ví kù shiiy kfə́ kóŋri, kfə̀n buʼtì vinyo, du duùn fó mbìy.

¹⁶Lá à yòʼ a nyàvrì e kitú ké ki ji à fíʼ a dzə là nsem ŋkuuŋkùŋ, kìn ji à fiír é ŋàŋ. À taʼ ji à yúyrí kitú ké bìʼ ka?

¹⁷Lá à yòʼ fò sá kitú ké ji kwǎn vinyò ve bi ví. Lá à yòʼ fò ji kiyúŋ. À taʼ e kpu, a ghán sé si yoʼ ghèén bìʼ ka?

¹⁸Ku yiì vinyo vee vibaà vin vi vidzə̀m, e làa yòʼ yiì kímóʼ kí, e tonén. Aà ghvə́m Nyùy, bo vinyo vé vidzə̀m vi yíi a ker shintíy she juŋ shi.

¹⁹Wìr fiirì, wù kìíy sáʼ, e shaà atǎr saʼ e ghvə̀m ve á sáʼ ŋkàlaʼ.

²⁰Rúrú, bó wìr woo là nsem yòʼ dzə̀ shó e kitu ke nsay, wo wù kù yii vinyo a dzə̀ ve réŋ ví, a bó yòʼ dzə̀ wù jày kinyo.

²¹Lá à yòʼ a fo vituʼùr é kinyò kidzə̀m ke wíri suuyì, fóo yiì lòo yuurí, e yu liy se ŋgaà wò lìm kuu wò sho.

²²Wówò kitú ké, à kì ji à kuùrì ne sa wír ámóʼó akàŋ anín.

²³M tàr ne vinyo vìn vidzə̀m e vifií vém ví, wáy feyì ji m yíi fiír, yii bèy, kí ku ghàʼ mo gháʼán.

²⁴Kinyo kidzə̀m ke kí‑iì kooyin ne, e meé lèn ki dzə̀, a bó yòʼ dzə̀ wìr kìíy mo kí dzəə̀n. A dzə̀ tàr la, e kìíy jeéyjeéy?

²⁵A mómò kitú kém, m wày gháŋ féyì ji m tar, e kìíy mo vifií ví dzəə̀n, e kìíy dzə́ə yee réŋ yé a naàrì vinyo sho mo ví dzəə̀n. M nén a kòŋ ji m kiíy kinyo ke bi ke kiyúŋsì ki wiy sho, e kìíy kibaá ke wìr baá e kiyúŋsì ki.

²⁶M yèn ne kifá ke kí birin, e shaà kpú, a dzə̀ wiíy wo dzəə̀n kitám, a dzə̀ lálán, a wó rəə́ sì ji asháŋ. Wìr wo wù yii mo Nyùy taʼà yíi bàʼàr wun, é wù koó kfə́ ŋgaà jay koón e wun kitam.

²⁷Ŋgaà Tàrvìnyò suuy jii, «Rúrú, m tàr ne kinyo kimòʼón kimòʼón ji m kiíy mo kí dzəə̀n.

²⁸M kù dzəə́ tarì, a bó m yóʼ ne yèn. M lèéy vilum nsə̀kì, e yèn woo réŋ e mòʼón cáʼ. M leéy vikìy adzə̀m, e làa yòʼ yen woo réŋ koó e mòʼón.

²⁹M kù yèn kinyo kimòʼón jii, Nyùy‑iì bòm wír, a wù dzə̀ là nsem, wìr nen tàʼ dzə́ə sée bivír kitú kfə́ shó.»