Read Lamnso Yòv Viŋgér 4 Bible Online

Yòv Viŋgér 4 - Lamnso bible

Yòv Viŋgér 4

¹Yìy à wíri, rúrú, ŋgaà ŋkòŋme wòm, à bòŋ e ŋàŋ. Ké ru kí, à bòŋ feyì. À kwéner sí fo mvə̀m ndzə̀y se à sùmèn kitú sho, a dzə̀ ji yé kibìŋ ŋkuuŋkùŋ. Nə́ŋ see wò kitu si səə́ne moo wúy ŋgoo bvəy ye yì sə́y fo Gwan Gilead.[6]

²Sóŋé bavkìr fo wò shuù moo wón njiì ve á komen wuy, e sù. Njiì, a wù kù sán wón sanén e dzə̀m, a woo kár yòʼ dzə̀ é mvəm wó.

³Ntùshuù baŋ fo wò moo làv wo á baàrsìn, à lóo suŋnín, shúu wàa kìʼ fo wò bèn e juujùŋ. Vijeʼ vé vi yénsin fo bǎm ndzə̀y se à sùmèn kitú sho virúnkín virúnkín.

⁴Kilòŋ kí rùn fo wò moo kirùmèn ke Davir ke á liìn ghán, e fiì e vilán vi, aá keérí aŋkèe rər shó nsə̀kì. Aŋkeè, a dzə̀ vé ve rər ve tavkíné.

⁵Loŋ se vin si tíynin e wò nsaŋ sifur sifur moo wón njà, wón njà, a dzə̀ vé nsane, aá yíkir e mvə̀m vibuùshì.

⁶Mo‑óò kóʼ áàgwan vee shoon. Agwan ve kiláy kee *mer wùn à kee *frankinsen ki rəʼtìn sho rə́ʼtin. M yíi koʼ, a dzə fo bèn, e meé mo yì yíi ran.

⁷Yìy à wíri, ŋgaà wom ŋkòŋmé, à bòŋ e ŋàŋ, bó shinsem shi yòʼ dzə̀ e wò wùn.

⁸Yeè lav wom woo shilív shém, ku sə̀ʼə́y fo agwan veé Lebanon. Sə́ʼə́y, e wìy é wòsò wáa dzə. Éè mò, kii wò, ku sə̀ʼə́y fo fo, e wìy. Ku sə̀ʼə́y fo loò Gwan Amana, sə́ʼə́y fó kitu ke Gwan Senir. Lò fó Gwan Hermon fèy. Mbvə̀ʼ se abvərə̀ʼ sí dzə̀ fó. Kii wò, ku lò fo agwan ve abáa dzəə̀n shó vìn, e wìy.

⁹Yeè lav wom woo shilív shém, à nyòŋ ne vifií vém. Sí ye à kív, leey mo shó rə̀ne nyòŋ ne vifií vém. Vifá ve à wayin é kilòŋ ví nyòŋ ne dòŋ fo mǒ kitu.

¹⁰Yeè lav wom woo shilív shém, à maʼ wó e mǒ wùn, la m yòʼ kìíy fo m dzəə̀n. Nyomèr ye à nyomèr shilív shémé boŋ shaa meluʼ, a kirəm ke kí fəə́ fo wò kiyoʼóy ké bìʼ ki shaà ké kfəə kilay e dzə̀m.

¹¹Yeè lav wòm, m nyóŋ shuu wó, wàa dzə mo shèm vilu e mǒ shuù. À lóo suŋnín, jí sé si wàa nyòm moo vilu, a nyòm moo vín nàʼ. Kirəm ke kí kóʼ fo wò ndzə̀y kí rəʼtìn moo ké vici vé *sidar veé Lebanon.

¹²Abày, yeè lav wom woo shilív shém dzə̀ ji kiboó ke á tsəmen kay, e gìŋ sho, kiboó ke m koon ne ntoò ndzə̀v ye á gìŋèn, e shìvìr ji yéem.

¹³Yìy à wíri, à dzə̀ moo kiboó ké vici vé *grenadin, kiboó ke á lìmèn báŋ se vici se sí nyom sho. Kiboó, a vifá ve rəʼtìn ví teʼ fo.

¹⁴Ŋgaà wom ŋkòŋmé, à nyom, rəʼtìn moo vikwiíy vee nard, à vee safiron vi. À rəm, rəʼtìn moo *kalamus, rəʼtìn moo sinnamon, e lì sa kfə́ə kici e dzə̀m ke kí fəər kiláy moo frankinsen. Kikwiíy ké mer ki teʼ e wò kiboo, à ké *alo wùn à vifá ve rəʼtìn ví vidzə̀m.

¹⁵À dzə̀ dàn wo wù fəə́, léŋ e kiboo. Ntoò ndzə̀v ye yì fəər mendzə́v me rəə̀n mè. Rúrú, à rəsìn moo ndzə́v se sí léŋ, sə́y fo agwan veé Lebanon.

¹⁶Éè shwer woó kùy, á feè virə́ʼ ví. Shwér woó tsən, kèʼ a feè, a wìy. Kú a wìy, a sàmèr kirəm ke kiboo kém kí. Ku yiì, é ŋgaà wom ŋkòŋmé wiy e wun kiboo, wiyì, é wù yú vijuŋ ve kiboo, a yi báŋ se vici see fó, a sí gburìn e shuù.