Read Lamnso Yòv Viŋgér 5 Bible Online

Yòv Viŋgér 5 - Lamnso bible

Yòv Viŋgér 5

¹Shilìv shem, yeè lav wòm, m nə̀ə́ ne e mǒ kiboo, a m sí kéŋ vikwiíy ve rəʼtìn ví. M sí kéŋ *nard wom, kéŋ *mer. M sí lá vilu vém ve ví koon shuu wóm, nyoóŋe gham, a m sí nó meluʼ mem, nyóŋ vín yém. Kweʼfèné, vé kikòŋnìne, vèn ku yì kikoŋnìn kén kí, e yù. Vèn ku nò kikoŋnìn kìn e njà melùʼ, e shaàsìn.

²Yì‑ii dzə̀, a m néŋ e kikun, buúne, a shilív shém shí kù tar vinyo, m yú jí tàr à wíri woo ŋgaà ŋkòŋmé wom. M yú, a wù kum nshìy, yoŋrì mo yóŋrin. Yeè lav fo mò, shilìv shem, kibìŋ kém, ŋgaà wo m shavin shávín, ku mvə̀ʼ lav, é m nəə́ shó. M tìím ne e ndzə, ŋwéʼe gbú e mǒ kitu. Wuú vitsəʼə́ fə̀fə̀ ne, nə́ŋ si rə́ fo mǒ kitu sidzə̀m.

³Éè mò, m shòʼtí ne ndzə̀y, m ló ghan e le, e bóo kfən màʼ? M sù ne wúu yém, m ló ghan e le, e bóo kfən laʼ e nsay.

⁴M ku nèn yù, a tàr à wíri, woo ŋgaà ŋkòŋmé wom láʼ kiwó e mfìn shuù lav, shilív shí nén a buʼ mo búʼún, a yár jíŋ rə mo.

⁵M ŋáʼáy ji m sí mvəʼ shúu lav, é wù nəə́, kirə̀ʼtìn ke bìʼ ki wáa shemkír fo mǒ wo, meŋgvə́r me rəʼtìn mè wáa jiíy fo mǒ wo, a shem shém e mfìn shuù lav.

⁶M wáa jì ji m mvəʼ shúu lav, é ŋgaà ŋkòŋmé wom nəə́, a wù kì dù ne fo ŋgùʼ. Éè mò, kee jíŋ ye mò‑oò yuun jí rə, yì wáa yar mo, m fəə́, a tàʼ wun, e tàʼ ntéŋ, e jàŋ wun ntéŋ ntéŋ, e làa yòʼ yu kikwe.

⁷Anshìyvìtsə̀ʼ ve vé‑eè ghán e mvə̀mlaʼa yén mo, e koò mo, e nyèr bèn kijuŋ, e lèmér, e sùn ndzə̀y se mò‑oò wovin. Éè mò, anshìy veé shùu kàyi sùn ne ndzə̀y sém, e dù sho.

⁸Éè wónlě vikìy veé Jerusalem, m lón ven lónén, vèn kuúmé mo ŋgav wùn à njà yii laayì. Éè mò, a vèn lòo dzə, e yèn ŋgaà ŋkòŋmé wom, kii vèn, vèn kù sùúy sho ji m sí joy a yàsí kikòŋnìn.

⁹Òó mbaà, wánlè ŋgòn, wò wo à bòŋèn, e shaà wónlě ŋgòn adzə̀m, ŋgaà ŋkòŋmé wò və̀n shaà ámóʼó a dzə̀ é gha, é bo à ku lìʼ lìʼìn ji lá vèr yòʼ yiì jìvír vèn wun?

¹⁰Vikìy veé Jerusalem, ŋgaà ŋkòŋmé wom və̀n kér nshòm ye baar, a wù kfə̀n kiʼ e távín ji ŋkǒŋ, aá tìír vilum nsə̀kì e ghvə̀m, la wùmòʼ yòʼ dzə̀v kiwó kfə́.

¹¹Síi kiʼ fo fo e lerìsìn moo *kisha ke mbàm ke baar ke á shèŋrìn. Nə́ŋ si káv fó kitu wo, a səəné moo váv kiŋaʼ.

¹²Wón sii rán fo fo moo vibìŋ ve ví dzəə̀n é shùu ndzəv. Vibìŋ, a ví fə́r ji páv, kiʼ mo á sù e vín nyàme.

¹³Vijeʼ və́ ví kiʼ virəsìn, rəsìn moo kiboó ke vifá ve rəʼtìn ví teʼ sho ji bòʼrì bòʼrì. Ntù shuù rə kiʼ e rəsìn, rəsìn moo kibuushì ke kí shémer meŋgvə́r me rəʼtìn mè.

¹⁴Kóy sə́ sí dzə̀ sifur sifur mo á fèr e kisha ke mbàm ke baar kí, a wù wáyrí wún áàndzə̀ŋgwáŋ sùsù veé kilùme. Wún vəə́ dzə̀ e lerìsìn moo sóŋ kitàm ye seméné, aá kfə̀n nàŋsín e *síbaŋ yee safirìi.

¹⁵Shwín sə́ sí dzə̀ moo vitóm ve á fèrìn e tíy ye á sém, fer vifá shoo, vitóm, aá fér, e tìír e viyìy vee *kisha ke mbàm ke baar kí. Wù kiʼ fo si bèn ji ŋkǒŋ moo Gwan Lebanon, tíy e yuv ben moo vicí vé *sidar vee fó.

¹⁶Jí se sí fəə́ fo wun shuù si nyom moo shiŋgwáŋ. Rúrú, m leey wun, e kèʼ fo kitu, e meé e wuù, koŋ e ŋàŋ. Éè vikìy veé Jerusalem, á wun woo ŋgaà ŋkòŋmé wom, á wun woo ŋkar yem tìm.