Read Lamnso Yòv Viŋgér 6 Bible Online

Yòv Viŋgér 6 - Lamnso bible

Yòv Viŋgér 6

¹Yìy à wíri, wiíy wo wù bòŋèn, e shaà vikìy adzə̀m, ŋgaà ŋkòŋmé wò dù a dzə̀ feé? Suúy e vèr, é vèsən wáa tàʼ.

²Ŋgaà ŋkòŋmé wom dzə̀ vèr wun, wù wìy ne e wun sum, kiboó ke vifá ve rəʼtìn ví teʼ fo. Wù kár fo, káv vifá və́, cee vibuushì ve ví kúy fo bèn e wun wùn.

³M dzə̀ wìrkóyti ŋgaà ŋkòŋmé wom, a wù dzə̀ wóom woo wìrkóytí. Wù lóo nyoŋrí kibuushì kém, é bo wù kiíy fo wù dzəə̀n.

⁴Yìy à wíri, shilìv shem, à bòŋ feyì moo ŋkàlaʼ yee Tirsa,[7] a dzə e juujùŋ moo ŋkàlaʼ yee Jerusalem, a viwìr vé vi dzə̀ moo vé rər ve á lév e cícíwàrí wo.

⁵Kii wò, ku rə̀ʼ síi, e làa yòʼ dzə́ə a leéy mo é dzəə fóo fèy. À leey mo, m nèn kù lì a dzə̀ kibaá e si. Nə́ŋ see wò kitu si səə́ne moo ŋgoo bvəy ye yì sə́y fo Gwan Gilead.

⁶Sóŋé bavkìr fo wò shuù moo wón njiì ve á komen wuy, e sù. Njiì, a wù kù sán wón sánén e dzə̀m, a woo kár yòʼ dzə̀ é mvəm wó.

⁷Vijeʼ vé vi yénsin fo bǎm ndzə̀y se à sùmèn kitú sho virúnkín virúnkín.

⁸A dzə̀ Solomon wàa ker vikǐy ntoʼ mntuùfú, a ker ve lemèné mwaamé, a ker wónlě ŋgòn[8] e mfòn,

⁹bo kibìŋ kém kin, wiíy wom ntay fo fo, bo wù kù dzə̀ jeéy. Wiíy, a dzə̀ jòʼsho wan woo wiíy fo wun kiyìy. Wán, a kiyìy kí lo, kí wàa ker moo wúm. Wónlě ŋgòne lóo leéy wun, á wàa shèŋ a dzə̀ kitú ji wù bòŋ a ŋàŋ. Vikǐy ntoʼ, à ve lemèné wàa burí sa vijuŋ və́, a ndzəʼ jii,

¹⁰«Yímóy, dzə̀ la wo wù rán moo ndzə ye yì sí javì, kiʼ e juujùŋ mo ŋwee yòʼ kirə́m, tókir moo sí shùy, kiʼ bèn viwìr viwìr moo vé rər ve á lév e cícíwàrí wo wo.»

¹¹Mò‑oò sə̀y é kiboo fo vicí ve ví koom báŋ si ví‑iì kúyí. M nəə́, e lèéy ji vifá ve ví kúy vi sà sí buyì a, e leéy ji vitiír vé *vayin vi sà kèʼ ne, a saàm a, a vicí vé *grenadin vi sá ne fə̀ʼ a?

¹²Bo vifií ví wáa mvə̀ʼkìr mo, a vijuŋ veé ŋàŋ ví yií ne, wúné wáa tekír mo tékín, tékir moo wó wìr wo wù nəən é kitentén wùn wìr wo kuʼùn.

¹³Éè wánlè ŋgòn woó Shulam, kfə́n é bàm, kii wò, ku kfə̀n é bàm, a cèŋ, é vèr wáa màʼ sí e wò wùn. Vèn diy ji á kú a màʼ sí e mǒ wùn ji ka? Mo woo wánlè ŋgòn woó Shulam, a m dzə́n kidzə́n, a wíri tíy mbìv sibaà, leeyì.[9]