Read Lamnso Yòv Viŋgér 8 Bible Online

Yòv Viŋgér 8 - Lamnso bible

Yòv Viŋgér 8

¹Tàr à wíri, éè mò, wìr ku lì ji wò‑oò dzə̀ lúmér yem, lúmér yem ye yè wor‑iì nyoorin e víne. Bo wòsò‑oò yíi lòo tarnín e wírí si, é m wáa baamé wò, a sir e mǒ wùn,[12] é la wìr wùmòʼ yòʼ a yu ntéŋ.

²Bo mò‑oò tsəə̀né wò, e wìy sho e yè wór lav, yè wor wo wù‑uù lo, wù wàa tir mo. Bo mò‑oò yiì, à nó meluʼ me á bìŋrìn e vifá ve rəʼtìn ví. Meluʼ, aá fér a dzə̀ e mendzə́v me tútúʼ *grenadin woo woóm mè.

³À yíi soór kóy wó ŋkoòvìi e mǒ sar kitu, a ŋèv mo e kóy wó yìyí.

⁴Ké ru kí, wónlě vikìy veé Jerusalem, m lón ven lónén, vèn kuúmé mo ŋgav wùn à njà yii laayì. Vèn kan ó ji vèn yòʼ yíi jivír kikoŋnìn kér, a bó vèr bónén, e kòm wún ben, e yù.

⁵Yímóy, kóʼ la fó kirə̀ʼ ké woʼ, kóʼ bèn, kóyti ŋkar rə tìm? Tàr à wíri, mò‑oò nyànyày wò e sar kici ké baŋ se nyomèn sí. Dzə̀ fó, fo yè won‑eè boŋen bvəm yé, a kù dzə̀ fó, fo wù‑uù lumen, e bóo dzəə́ wò.

⁶Kii wò tàr à wíri, ku wày mo e wò shiliv moo kifin, e wày moo mbàm se nsoʼ see wáy é koy. Mo kpúu kér vitaáví é ŋàŋ, bo dzə̀ sá mo kikoŋnìn kesò ki dzəə̀n, a bó jìŋ ye yì yár ŋgaà ŋkòŋmé bìʼ wùmòʼ yòʼ fó sa shiŋkfəŋ, réŋréŋ mo woŋ aŋkfəə yòʼ fó sa e wìr msòŋ. Rúrú, koŋ ye tàr à wíri koŋ mo shóo baári moo kiliímé ke və̀y, baári, koóme virə́ʼ moo və́y wo wú ghàmsìn.

⁷A mendzə́v mè fə̀m kùʼ e le, bo bó yòʼ dzə̀ mè ndzə̀mér, a bó yòʼ dzə̀ sá kúŋ lèér, e dù sho. A wìr fə̀m lò, a mùm ji wun yún koŋ yúnén, bo á kù yíi a ŋway bùʼ və ŋwáyín, e ŋway feyì, a wù fə̀m fò kéŋ rə́ e dzə̀m.

⁸Vèr kér jemèr yer ye terí, a bó víne yóʼ ne tùʼ e nsaŋ wo. A dzə̀ vèr wìy yèe le, e jèmèr yer rə̀n? A dzə̀ vèr yèe é ghan se á wíy a tàʼ wun ji wiíy?

⁹A wù wìy a dzə kilor moo kirə́v ké lav, bo vèr wíy shèŋrì vikàkàŋ və́ e vifá vee kisha ke mbàm ke fəvír kí. Wù wìy kfə̀n kfə́ ji shúu lav wo wú tíy e rə́, bo vèr kù wíy sətí, e laŋ e kicí ké *sidar ki.

¹⁰Dzə̀ rú, mò‑oò dzə̀ kilor moo kirə́v ké lav, lèn, a vikàkàŋ vém ví tíynin moo virùmèn, a ŋgaà ŋkòŋmé wom leey mo, koŋ e ŋàŋ.

¹¹Fòn Solomon‑eè kér súm vitiír vé vayin e Baal‑Hamon, e wày wíri shó, á wáa kav, a làʼ wun, é wo mòʼón woo wír wáa làʼ wun *ashekel nsə̀kì, a dzə̀ shekel woo kisha ke mbàm ke fəvír kí.

¹²Ŋwaày, Solomon, ku sə̀ mbàm see nsə̀kì sìy si e wún wóo, e fò see ghii baà e wír ve á géʼsin e báŋ se sí koom vitiír sí. M kér wóm woo súm vitiír, a yìy à wíri wom tsə́ŋ sho, a kù kér mo wun feyì feyì.

¹³Á bèy shilìv shem, wo à dzə́ e kiboo fen, aŋgaà vém ŋgoo sí yuúri ji á yú jí yè, ku sùŋnín é m yú ke à lo, a yòŋ.

¹⁴Tàr à wíri, ŋgaà wom ŋkòŋmé, wìy e mǒ wùn cér. Ku càʼcàʼ, e lèʼ, e wìy moo ŋgav. Ku càʼcàʼ moo wan njà woo lumèn, njà wo wù ghán aàŋkoŋ, taʼ vikwiíy ve rəʼtìn ví.