Read Lamnso Aysaya 10 Bible Online

Aysaya 10 - Lamnso bible

Aysaya 10

¹Lòné kù dzə̀ wó atǎr saʼ ve á fəər nsər se kiloʼ si, áwune ve á fəər nsər a dzə̀ sé a nə̀ʼsì wíri shó.

²Á fəər nsər sìn ji á fíʼ a tinén kinyo ke aŋgàa ŋgeʼ e kiloʼ ki. Fəər ji á fiʼ sə̀r gháy vé kitàne. Aá kfə̀n yii bèy, ji á fíʼ a nə̀ʼsì vikǐy ŋkfə, a nə̀ʼsì sa wón tsə̀ mo dzə̀ akwàn vév.

³Ven vee vé saʼa, Nyùy wíy lòo màʼ ŋgeʼlàʼ e wòŋ, é vèn yée le? Wù wíy yiì, kitúm ki sasìn, ghíʼ ven e rə́r sí, kù mo shaa kinsəm, lóo laàr wíri, lóo bivír kifá kidzə̀m, é vèn léʼ, e beè a dzə̀ la? Vèn wíy lìtì bùʼ won, a dzə̀ feé?

⁴Bó wìr yòʼ wíy a ker fóo dù, e shaà ji á kù wíy yuyrí wun yúyrín é shùu rər, kìn ji á koó wun, a sə̀ŋ, a dù sho moo vé sháŋé. Fə̀m mo ŋgeʼ sìn sidzə̀m si siìn e wír veé Israyí kitu, NYÙY TÀR kù dzəə́ shwiiy kilòŋ wùn áwune, a wù dzə̀ kibáʼtín ji wun lo, e shaà fo mbìy, a dzə̀sì ŋgeʼlàʼ aáwuné kitu.

⁵NYÙY TÀR suuy jii, «Oomboò, fòn woó Assiriya, à sì mbàŋ, mbàŋ feyì ye m yíi shwiíy kilòŋ, a ndzən wíri shó, ŋkoó wo dòʼshwiíy yíi kiv mo, é m boó.

⁶M tsə̀nsí ne wír veé Assiriya ji á du, e fùnèn wír ve á méŋ yéʼéy yém. M tsə̀nsí ji á du, e ghìʼ wír ve á ŋáʼar dòʼshwíiy wom vin. M tsə̀nsí ji á du, e shòŋ áwune, e kfə̀n faàsì vifá vév, e nyèŋrì áwune mo á nyèŋrì mfəə̀rì si é dzəə.

⁷Yii bèy, fòn woó Assiriya bá və́ə woo ntaŋ jeéy. Kwaʼtì rəə́ dzə̀ jeéy fo yémé. Ntaŋ və kù dzə̀ ji á wáa laàr kitúm, a liysín e kímóʼ kí, ton, sə́ʼsi, é kí lay, à yírí shó.

⁸Wù kù dzəv nsaŋ, suuy jii, ‹Amfòómé vém rər adzə̀me kù dzə̀ afon afon.

⁹Bó kitúm kém kí yòʼ kù‑uù tòn ŋkàlaʼ yee Kalno mo kí‑iì tònèn yee Karkemish à? Bó kí yòʼ kù‑uù tòn sá yee Hamat mo kí‑iì tònèn yee Arpad, e tòn ŋkàlaʼ yee Samaria mo vé‑eè tònèn yee Damaskus à?

¹⁰M tòn ne vitúm ve ví‑iì ghvə́m mebvə̀m, mebvə̀m, a mè táv, e shaà meé Jerusalem, e tàv, e shaà meé Samaria.

¹¹Mo mò‑oò tònèn Samaria wùn à mebvə̀m mev mè medzə̀m, bo kù dzə̀ sá réŋréŋ mo m wíy tatí Jerusalem wùn à méev mè, e tòn.› »

¹²Fòn woó Assiriya raʼsì wún ben, a NYÙY TÀR wíy màysì vinyo ve wù yii e Gwan Sion, maʼ ŋgeʼ e Jerusalem kitu, é wù nèn màʼ ŋgeʼ e fòn woó Assiriya kitu bìʼ kiŋkoʼòrwùn kfə́.

¹³NYÙY TÀR wíy yiì bèy, bìʼ fo fòn woó Assiriya sév jii, «M tòn vitúm vìn a dzə̀ e vitaáví vém ví, a m tàv é ŋàŋ, e kfə̀n fìír. M faàsì nsay ye vitúm vi kérí a dzə̀ e kiŋkoòvì ki, e yiì ŋgeʼ aáwuné vitàv. M nə̀ə́ áwune moo lúm nyàm, e faàsì sáʼ fo afon véví.

¹⁴Mò‑oò tò é bùʼ woó kitum, kù mo wìr tò é laʼ shinə̀n. Mò‑oò tàtí kitú ke nsay, a saʼ, kù mo wìr bàʼtí wúm, ye shinə́n shí yaʼayin. Mò‑oò ton vitúm vìn, a ví dzə́ kév moo menə́n me mè boon vav, e mvə̀ʼ shuu, a bó dzəə̀ toŋ yòʼ dzə̀.»

¹⁵Yii bèy, NYÙY TÀR dzə́r kfə́ jii, «A wìr maʼ njàm, njàm wàa ràʼsì wún ji gwar wun kicí, a bó yòʼ gwar ŋgaà màʼ à? A wìr tóʼ kicí e sòó, sòó wàa dzə̀v nsaŋ ji tóʼ wun kicí, a bó yòʼ tóʼ ŋgaà toʼ à? Bó yòʼ dzə̀ ŋgwàne wàa rəvír wír wo wù kér wun, a bó yòʼ dzə̀ mbàŋ, a dzə̀ kicí fó kici, wìr gbu, yì nàn.»

¹⁶Kí nén a dzə jii, mo fòn woó Assiriya kóʼor wún é ŋàŋ, bo NYÙY TÀR woo Taà Ndzə, wun woo Taà Mànjòŋ yíi tsəm wun, e tsəm wùn aàntav və́ rərí, a dzə̀ e yàsí wo biibí. Wù yíi laàr kifá kidzə̀m ke kí távir wùn à vé rər vəə́, e kù laàr moo ji laàr kiliímé ke və̀y.

¹⁷NYÙY TÀR woo kikaʼày keé Isray wíy wìy e njà və̀y, e tòn áwune. Wun woo Ŋgaà wo Ranén woó Isray wíy a dzə ji kiliímé ke və̀y. Wù wíy lò kishiíy kimòʼón, e laàr Assiriya, e laàr à vimbìn ví, à vitiír vé njoŋ vi, é ví kfə́n ji kiyúy.

¹⁸Fə̀m kóv woó Assiriya wo wú gháʼti ghàʼtín, e lì súm se sí borin, wù kù wíy tatí kifá kidzə̀m, e laàr laàrìn, réŋréŋ moo wír wo yàsí nəən é wùn wó, wù réŋ, e mày.

¹⁹Kóv sí wíy a dzə, a bér ne mecirìn sho, a fə̀m jòʼsì shiwánlè, shí kù tàŋ, e sàŋ é vav ŋwàʼ.

²⁰Wíy lòo dzə e kishiíy fó, é la kibér ke wìr veé Isray ki yòʼ dzə́ə a yeʼtí a dzə̀ e Assiriya wùn. Dzə̀ kitúm ke kí‑iì loòn, e tòn áwune tónen. Áwune vee rám Jakov ve á bòyìné kù wíy a yeʼtí lèn a dzə̀ e NYÙY TÀR woo Ŋgaà wo Ranén woó Isray wùn, là moonìn.

²¹Kibér ke wìr ve á wíy ber fo Jakov ram kin ki kù wíy kfən e bàm[18] fo Nyùy wov woo Ŋgaà Vitaàví Vidzə̀m wùn.

²²Rúrú, wìr veé Isray, mo vèn fə̀m sén moo síy seé ghaa rìbà ndzə̀v ben, ve á wíy kfən e laʼa wíy a dzə ashàr. NYÙY TÀR wày ne nsər ji á kù kér fó laàr kitúm kìn, a dzə̀ kinyo kee réŋ kí mo kí kér fó a dzə.

²³Á bèy, NYÙY TÀR woo Taà Ndzə, wun woo Taà Mànjòŋ wíy laàr woŋ və̀n e dzə̀m mo wù wayin.

²⁴Ké ru kí, NYÙY TÀR woo Taà Ndzə, wun woo Taà Mànjòŋ nén a yòŋ jii, «Wìr vem, ven ve á dzə́ e Sion, lá vèn yòʼ fàn wír veé Assiriya. Á lóo dzə̀v ven e ŋgwàne, lóo ndzən e vibur vi mo wír veé Ejivi‑iì yii, lá vèn yòʼ a fàn.

²⁵Dòʼshwiíy wo m kér bìʼ ven ló mày e bǎm shintàm, é m binkir, e laàr a dzə̀ wír veé Assiriya.

²⁶Mo woo NYÙY TÀR woo Taà Mànjòŋ wíy a wuŋ wír veé Assiriya e ŋgwàne, réŋréŋ mo mò‑oò wuŋen wír veé Midian e kirùmèn keé Orev.[19] M wíy nàn mbàŋ yem é kitu ke ndzəv, e lovtí aáwune réŋréŋ mo mò‑oò lovtin e wír veé Ejivi.

²⁷Ghán see shooy si wíy gheén, é m boyir ven fó kibèʼèy ke wír veé Assiriyàa rə́ʼəy ven shó, é kimbùŋ ké vikwàn kí béʼém fo věn mbèʼ, aá sánrí, bìʼ fo vèn siìn wír vee wír.»[20]

²⁸Vé rərí nə̀ə́ ne kitúm, e sùm ŋkàlaʼ yee Aiyat. Áwune tòsín dzə́ə fó Migron, e lèm vifá vév vímóʼ ví é Mikmash.

²⁹Á kòʼ ne kiŋgwàmrì, e bìʼír, aá sí bee vitsə́ʼ vé lán vi é Geba. Wír veé Ramàa sí yaʼ yàʼàn, a wíri sàm ne fo Gebea, ŋkàlaʼ feyì ye yì‑iì dzəə̀n ye Fòn Saul.

³⁰Ven vee wír veé Gallim, vèn búʼ shirəə́ shi. Wír veé Laisha, vèn yuúrí. Wír veé Anatot, á mendzən men a?

³¹Wír veé Madmenàa sàm ne nsàm, a veé Gebime sí leey kirə́ʼ kée lìr sho.

³²Vé rər vine yíi shaà, e dù, e tiím a dzə̀ é Nov lán. Á wíy a nàn wó yév, a kàʼtì wír ve á dzə́ e Gwan Sion sho, gwan, a dzə̀ fo á bomen Jerusalem.

³³Rúrú, NYÙY TÀR woo Taà Ndzə, wun woo Taà Mànjòŋ, wù wíy lì vitaáví və́ ve ghaʼán ví, e lovtí aáwune mo wìr sòóy vicí. A wíri fə̀m dàr moo vicí, a koʼór wún moó le, bo Nyùy kù yíi səʼə́r áwune é nsay.

³⁴Wù wíy bàʼ áwune e njàm, kóv vən, a wú kúy, e rə̀ŋsìn, é kimà ké kòv keé Lebanon ki sə́y é nsay kidzə̀m.