Read Lamnso Aysaya 12 Bible Online

Aysaya 12 - Lamnso bible

Aysaya 12

¹Ghán see shooy si wíy gheén, é vèn wáa burí Nyùy, é wìr wáa suúy jii, «M beerì wò NYÙY TÀR, fə̀m mo wò‑oò shwiiy kilòŋ wòsò, dòʼshwiíy wò‑oò mày ne, à rəə́r shilív shém.

²Rúrú, Nyùy dzə̀ ŋgaà wo wù luŋèr mo. M yíi a yeʼtí a dzə̀ e wun wùn, e làa yòʼ a fàn kifá. Feyì feyì, dzə̀ wun woo NYÙY TÀR wo wù távir mo, a kù dzə̀ wun wo m yov, suyrì. Wù dìn ne rú ji wun dzə̀ á ŋgaà wo wù luŋèr mo.»

³Wír veé Isray, vèn wíy a sheʼrí boyìr ye Nyùy bòyìrìn ven, a yu vijuŋ feyì moo wír wo kilòŋ kí lòo yum, wù koóy mendzə́v.

⁴Ghán see shooy si wíy gheén, é vèn wáa yòv jii, «Á wáa burí NYÙY TÀR, a yòŋ yír rə́ ji wù sə́ ven. Vinyo ve NYÙY TÀR yii, á kú a fìʼtì e vitúm vi, a fìʼtì ji yír rəə́ dzə̀ e gháʼtín, e shaà yír e dzə̀m.

⁵Á kú a yòv, a burí NYÙY TÀR. Wù yiì ne vinyo ve ghaʼtín ví, vinyo, a wìr yòʼ‑oò ghàn ne mùm. Vèsən samer kee shoon e wìr dzə̀m woó kitu ke nsay.

⁶Wír veé Sion, vèn wáa ndzəʼ, a yòv e kishéʼrì ki. Nyùy woo Ŋgaà wo Ranén woó Isray dzə̀ vèn áwune. Wù dìn ne ji wun dzə̀ e gháʼtín.»