Read Lamnso Aysaya 14 Bible Online

Aysaya 14 - Lamnso bible

Aysaya 14

¹Kí dzə̀ jii, NYÙY TÀR wíy sham mendzən me rám Jakov, e kfə̀n lì áwune vee wír veé Isray ji wír və́ ve wù shoʼon. Wù wíy siìr áwune é bàm, aá kfən tùúy aáwuné nsay. Vitúm vi wíy a wìykìr, a tatí áwune vee rám Jakov, é wùn áwune wáa dzə wír amòʼón.

²Wír veé Israyi wíy kfən e bàm aáwuné wòŋ, a wíy lì vitúm áwune, e bóo kfən sho. Á kfə́n e nsay ye Nyùy‑iì foon aáwune, aá nèn yòv vitúm vìn, à wiíy, à lùmèn, aá wáa dzə fo ji wír vév kibàm. Á bèy, é wír veé Israyi nèn yòv lèn wír ve vé‑eè koorin áwune fó mbìy, a fo sáʼ lèn e wír ve vé‑eè rə́si nəʼsì áwuneé.

³Wír veé Isray, wíy lòo dzə e kishiíy fó, NYÙY TÀR boyìr ven fó ŋgeʼ ye vèn yéné, à fó vikwàn ve vé‑eè sə̀ŋèn ven, e wày shó,

⁴é vèn wáa te lám e Fòn woó Babilon wùn jii: «Rìʼí gbù ne, e sə̀tí shúu gáʼ wo wù‑uù rə́si yii ŋgeʼ e vèr, wú gbù ne, ŋgeʼ si máy.

⁵NYÙY TÀR bèʼ ne mbàŋ wìr ve á méŋ wun, mbàŋ, ye yì‑iì dzəə̀n ji kitoómé ké vé saʼa,

⁶a kí távir áwune, aá sáʼ vitúm, a dzə̀ e sáʼ ŋgwàne, kù nyoorì áwune nyóorin, là mendzən.

⁷Lèn və̀n, kitú ke nsay kidzə̀m ki sí néŋ ji dèʼ, là rə́r, a wìr dzə̀m kù sí ndzə́ʼ ndzəʼə́n, séŋ, savnìnè.

⁸A fə̀m dzə̀ vicí vé dzəʼə̀y, à vé *sidar veé Lebanon vi, bo ví kù sí yú sa vijuŋ ji á sù a ne fon woó Babilon. Ví séŋ jii, ‹Lèn wo sáʼa yòʼ dzə̀ə́ e wò kiwo, bó wìr yòʼ kfə̀n dzəə́ bav ji wun baʼ ver.›

⁹«Wóŋ aŋkfəə shiy wò, njeʼ feyì mo wú yíi səəsí wò. Wú yimrì aŋkfə adzə̀m ve yì‑iì dzəə̀n atǎr saʼ veé kitu ke nsay. Wú yimrì afon vìn ji á ku lòkìr a fo áwuné akàvàʼ, e səə̀sí wò.

¹⁰Áwune yíi a jàʼ wò adzə̀m, a suúy jii, ‹Woó Babilon, yí gèr ne sa wò mo yí‑iì gerin ver a? À kù sì sá ŋkfə moo ver.›

¹¹Wò‑oò yú vijuŋ moo wír wo kuʼùn, kóʼor wún, á lóo kùm lúŋ nshì fó ŋkàʼ, vijuŋ vi wàa neŋ. Vèn à vifá vìn vi tàtí ne, e sə̀y áàŋkfəə́ wòŋ fèn. Dzə́r si sì gham ye à sàŋrìn, a neŋ sho, a séʼ si kù sì wo woo bvə̀ràŋgí.

¹²«Á jaʼ wò bèn, a wò‑oò lì kitú ké ji sàŋ tsə̀n.[23] Ku yèn búʼú mo à gbuùn ne fo yuv, wò wo wò‑oò dzəə̀n ji kintoshùy. À gbù fo kàvàʼ moo kicí ke á bàʼàn, kí gbú é nsay ji rìŋ, wò wo wò‑oò ton vitúm, baʼtì sáʼ yév.

¹³Wò‑oò dzəʼə̀mè, à wàa kwàʼtì fo mvə̀m bvə̀m jii, ‹Sáʼ yémé wíy koʼ, e kùm mbàʼ. Kóʼó, é m maʼ é kitu ke mejìy me wiy mè. Anyùyi wíy tar aáwuné kitu ke gwan,[24] é m maʼ kàvàʼ wom, a dzə áwune kuy.›

¹⁴Wò‑oò sévti jii, ‹M wíy tosín mbàʼ se sí dzəə̀n é ntoò yùv, tósinè, é m maʼ kàvàʼ fo, a dzə fo moo Nyùy woo Taà Vitu.›

¹⁵Yii bèy, á sèn ne wò, aà yíi səy a dzə̀ áàŋkfəə́ wòŋ, kirə́ʼ féyì, a kí dzə̀ a dzə̀ é loònsay.

¹⁶«Aŋkfəə wíy yen wò aáwuné wòŋ, aá bónén ben, a kiy, a rə̀m kfə́ə kinyò ke kí kooyin wò, a ghaynín jii, və̀n sà kù dzə̀ wír wo wù‑uù səʼsì kitú ke nsay, səʼsì vitúm a?

¹⁷Á wíy a dzər jii, və̀n sà kù yòʼ dzə̀ ŋgaà wo wù‑uù bìnèrìn kitú ke nsay, kí kfə́n ji wóʼ, e tàtí ŋkà se laʼ, e laàr sidzə̀m a? Sà kù yòʼ dzə̀ wun wo wù‑uù koorin wíri, e tèn fóo màʼtì a?

¹⁸«Afon vitum adzə̀m ve á làykìné néŋ a dzə̀ é kirə̀ʼ ké ghvəm ki, a woo shó kù néŋ e wun fəm ji dèʼ mo vé‑eè lìtìn.

¹⁹Yii bèy, à yíi lày ké, é la á yòʼ lìtì wò. Á yíi màʼày dzə́n yé máʼayin moo tám kici wo á faàn, e màʼ. Dzə́n yée kù yíi a neŋ e shùu rər, a neŋ wùn à sé wìr ámóʼó sí mo á gwàtìn fó. Dzə́n se wíri shaa, nyeŋrì, aá kù yíi kuusí a dzə̀ é bií vilan.

²⁰Á yòʼ yíi lìtì wò kijuŋ mo vé‑eè lìtìn afon ve vé‑eè làykìn, bìʼ fo à laàrìn ne kitúm ké, e yùyrí wír vé.» Á ku làysìn rám wìr ve bií láysin ŋkuuŋkùŋ.

²¹Á ku bàʼtí mo á lo, e seerí wón fòn və̀n mo á seè nyám. Á ku seèrí, bìʼ kinyo ke atàr véví‑iì bùʼùn. Á seérí, fo áwune kfən lò, e tàʼám, e tòn kitú ke nsay, e bàʼrì ŋkà se laʼ kitú ke nsay kidzə̀m.

²²NYÙY TÀR woo Taà Mànjòŋ suuy jii, «M wíy ŋaʼáy, e sə̀r wír veé Babilon, e laàr yír ŋkàlaʼ yee yéev ye yí dùnìn ne, e laàr wir dzə̀m wo wù berin, à wóné, à wón woné, é la wìr yòʼ fə̀m bèr e mòʼón. Kù suuy mo woo NYÙY TÀR.

²³M wíy siìr Babilon, é wù kfə́n ji kirə́ʼ ké viŋgùm vé mboò, e siìr, é fóo kfə́n é kishàʼshaʼ. M wíy laàr Babilon, kù mo á tàʼár kifá e kiyér ki. Kù suuy mo woo NYÙY TÀR woo Taà Mànjòŋ.»

²⁴NYÙY TÀR woo Taà Mànjòŋ tòʼ ne kinyo ke wù kér fó wìy yiì, a wù lìʼ ne jii: «Kinyo ke m kwaʼtì ki kù dzə̀ ke kí kér fó yìi koóy, a ke m wayin kí dzə̀ ke kí kér fó yiì a tiy fo.

²⁵Ntaŋ wom dzə̀ ji mànjòŋ Assiriya wo wù nəən e mǒ nsay, m kù yíi laàr a dzə̀ fó, e nyèŋrì ve á saŋrin áàgwan vee mǒ kitum. Á bèy, é wír vémé boy fó vikwàn ve á reŋ fo Assiriya, kù moo ji á bvə̀r a dzə̀ fáŋ fo áwuné kilòŋ, e sə̀ʼə́r kimbùŋ fo áwuné mbèʼ.»

²⁶Á kinyo ke NYÙY TÀR wayin ji wun yíi yiì e kitú ke nsay ki kidzə̀m. Dzə̀ ŋkùm ye wù kamen, a taamé vitúm vidzə̀m sho.

²⁷Ke kí dzəə̀n kí dzə̀ jii, NYÙY TÀR woo Taà Mànjòŋ bà ne ntaŋ və, a dzə̀ kòr la? Wù nàn ne kiwó, a shìvìr ji kí kù‑úù gheén e kfə́ kí. Wìr wo a dzə̀ wù sə̀r wun dzə̀ la?

²⁸Yì‑iì dzə̀ é kiya ke Fòn Ahas‑iì làyìn, NYÙY TÀR fəə́r sáʼ, a yí dzə̀ jii:

²⁹Ven vee wír veé Filistia, lá vèn yòʼ a sheʼrí ji ŋkoó wo wú‑uù wúŋ vené shèsìn ne.[25] Á sə̀m ne mfǐŋ yò, a kù yíi mee búv fo fo.

³⁰Fə̀m wír wo vèn yén ji ŋgaà kitàn, wù kù wíy a yiír njiì və, áàghéʼnceyí wáa neŋ bèn ji dèʼ. Yii bèy, fo kén kí, m wíy màʼ jíŋ, é yì laar ven, à rune shó, a m wíy yuyrí wir dzə̀m fo vèn, wo wù wíy ber.

³¹Wír veé Filistia, ven ve á tár e shùu kibùʼ, vèn wáa dìy. Ven ve vèn dzə́ e ŋkàlaʼ, vèn wáa toŋnín. Ven adzə̀m, vèn wáa fàn, a yàʼ. Kindzə́ʼ ki sí dzəm, sə́y fo mbìv yee kuy. Sì shúu rər mo wú sí meʼèm, sə́yí, a bó wìr rə̀r e mòʼón yòʼ sim kiwuú é bàm.

³²Á bèy, a vé ntume wìy fo Filistia, a dzər kinyo, á bìnèr jii, «NYÙY TÀR lèm ne Isray ji kitúm, a mvə̀mlaʼ yee fó dzə̀ Sion.[26] Dzə̀ fó, fo wír və́ ve vé‑eè rə́si yén ŋgeʼe wíy a dzə, a neŋ ji dèʼ.»