Read Lamnso Aysaya 15 Bible Online

Aysaya 15 - Lamnso bible

Aysaya 15

¹Sáʼ Nyùy yee kùm kinyo ke kí wíy koóy wír veé Moavi rə̀ne. Á lò ne vitsə́ʼ vimòʼón, e laàr ŋkàlaʼ yee Ar, Moav kpú, e rə̀. Á lò ne vitsə́ʼ vimòʼón, e laàr ŋkàlaʼ yee Kir, Moav kpú, e rə̀.

²Wír veé Dibone kòʼ ne aáwuné kirə̀ʼ ké cù. Á dù ne fo anyùy véví wùn ji á du, e dìy. Wír veé Moavi waáme tóŋ, diy laar ye á laàrìn ŋkàlaʼ yee Nebo wùn à yee Medeba. Wìr dzə̀m kwaày ne kitú, a dzə e nsòv, vilum adzə̀me kwaáy kighev.

³Áwune màʼ ne ndzə̀y sé kpu, a ghan sho e dzəə. Áwune sí dzə́tin e kirəsí, ghán e wáynjáŋ, kù waáme a dzə̀ tóŋ, diyì. Á tòŋ ne e ŋàŋ, mensíy mè wáa sù sí súun.

⁴Wír veé Heshbon wùn à veé Elealèe fúŋ tóŋ, tóŋ ji á ku sə̀ áwune. Á yú tóŋ yév, du mee e ŋkàlaʼ Jahas. Vé rər veé Moavi tóŋnin, a melív mev mè yaʼà.

⁵Mo woo Aysaya, m tóŋ bìʼ kitúm kee Moav. Wíri sàm ne nsàm, a dù e ŋkàlaʼ yee Tsoar, a dù e Eglat‑Shelishiya. Áwune kóʼ gwan, du e Luhit, tóŋninè. Á du e dzəə yeé Horonayim, tóŋ vifá vév ve aŋgàa vibàné bivirin.

⁶Ndzə́v seé Nimrim si yùmkír ne, viŋgà ví yóvrí, vifá veé sum ví sə́ʼsí, a bó kifá ke kí teʼ ki yòʼ kfə̀n dzə̀ə́.

⁷Á bèy, wíri bèʼèy ne vifá ve á yuun fóo jòn, a beʼ, a liysín kiwoóy ké vici vee *wilo sho.

⁸Rúrú, tóŋ wìr veé Moavi lìysín ne bìíy, wír vée Eglayime yú, veé Beer‑Elime yú sá.

⁹Ndzə́v yee Dimone kù sí baŋ bàŋèn, a dzə̀ mensə́ me wìr ve á yuyrin. Yii bèy, Nyùy yíi dzə̀sì ŋgeʼ e wír veé Dimoné kitu. Wìr túmnin fo Moav, é wù ku tò a dzə̀ e bvərə̌ʼ wùn. Wìr goʼ e bàm, é bvərə̀ʼ ku mèʼ sá wun.