Read Lamnso Aysaya 17 Bible Online

Aysaya 17 - Lamnso bible

Aysaya 17

¹Sáʼ Nyùy yee kùm Damaskusi rə̀ne.[31] Yí dzə̀ jii: Vèn leéy, e yèn, bó Damaskus yòʼ dzəə́ wìy a dzə ji ŋkàlaʼ. Fóo sí wìy kfən ji kirə́ʼ ke kí keèsìn ne, e mày.

²Á wíy màʼtì ŋkà se laʼ seé ghaa Aror[32], é sí kfə́n é vifə̀m, a dzə ji kirə́ʼ kee fo á yíi a lèm njiì wùn à nyám si, a nyám si wíy a neŋ fo ji dèʼ, é la kifá ki yòʼ a bemér.

³Kù dzə̀ sá mo virə́ʼ ve tavkín vé wìr veé Isray[33] vi wíy ŋeemé, e lày, réŋréŋ mo bó sáʼ yeé kitum kee Siiriàa yòʼ dzəə́ wìy a lò fo Damaskus. Kù sí wìy ber ashàr wìr e Siiria, aá wáa kuumé vikuʼùy vév kuúmén, réŋréŋ mo á kuúme vé Isray woo rám Jakov. Á kinyo ke NYÙY TÀR woo Taà Mànjòŋ suuyin.

⁴Wíy lòo dzə e kishiíy fóo fèy, aá sə́ kifá kidzə̀m ke wír veé Israyi kóʼor wún shó, é vikuʼùy vév ví lay kisáŋ.

⁵Kí wíy a dzə moó ghan se á yii káv vifá, ghán se vé lìme yii tín saár, báʼti e vikfər vikfər, ramsì kóy, tín vitú ve saàr. Kí wíy a dzə moo vé kitàn ve á síy saár ye vé lìme shaàn é Kiwoóy ké Refayim.

⁶Wíri wíy ber e Isray ashàr, é fóo wáa dzə moo kicí ké *oliv ke á siyin ne báŋ fo fo síyín. Kicí, aá síy ne, ku bèr mebabàŋ mebaà, kìn metaár fo yuv, kìn memoʼ mè‑eè lo tùmkír sa mekweè, kìn metàn. Suuy NYÙY TÀR woo Nyùy wìr veé Isray vinyo vìn.

⁷Wíy lòo dzə e kishiíy fóo fèy, é wíri binkir, e kìʼ Ŋgaà Mbom wov ji wù ku sə̀ aáwune. Áwune wíy a yeʼtí a dzə̀ e wun wùn, wun woo Ŋgaà wo Ranén woó Isray.

⁸Áwune yòʼ kfə̀n wíy a tiír vifií a dzə̀ é virə̀ʼ vé anyùy, ve fèrìn áwune e wó yéví. Á yòʼ kfə̀n wíy a yòy, a tiír e vifa ve áwune fèrìn férin, a fə̀m dzə̀ wúr se vé‑eè tuyin, a cù ji nyùy woo *Ashera, kìn vitaàtì ve anyùy ve vé‑eè tuyin, a tòn kiláy fó.

⁹Wíy lòo dzə e kishiíy fóo fèy, é ŋkà se laʼ se tavkín seé Isray si kfə́n é vifə̀m, e kfən ji vilála, kìn kóv wo bó wìr yòʼ shaa sho, a dzə moo virə́ʼ ve wír veé Israyi‑iì tònèn vé nsayi, á léʼ, e màʼày. Á mo fóo kù wíy kfən kfənén ji vifə̀m.

¹⁰Kí wíy koóy bèy, bìʼ fo ven veé Israyi làysìn Nyùy wo wù luŋèr ven. Vèn yòʼ kfə̀n kuúme ŋgaà wo dzəə̀n Kirùmèn kén ké nsàm. Kí nén a dzə jii, vèn gísin kisáŋ, táy vifá tayín, e bó a bìy e sum, taʼ run se vifa se wiyìn sí, e bó a bìy.

¹¹Aá fə̀m bìy, ví lo é kishiíy, yì wáa ran, a ví saám ne, bo wíy lòo dzə e ghan sé ŋkav vifa, é vèn fəə́ e wóo, bìʼ fo siìn kiyá ke jiŋ, a yàsí wùn à nyári nəə́ ne.

¹²Yímóy, vitúm vi sí kóʼor kiyor ke rər, a kí kóʼ moo ké rìbà ndzə̀v wo wù líy, kóʼó, tsə́y meshávtí. Vitúm vi sí kóʼor kiyor ke rər, a kí kóʼ moo ké ndzəv ye yí kúŋ virə́ʼ, du.

¹³Kiyor ke kí kóʼ fo vitum ki sì moo ke kí kóʼ fo ndzəv ye kuʼùné. Yii bèy, NYÙY TÀR yíi suŋnín, é vitúm vìn vi léʼkír. Ví yíi ŋeemé, e lày moo vishaárín ve shwéri feer fo agwan, e lày moo beʼmàʼ wo kìrkir shoʼoyin, a kuúr, a dù sho.

¹⁴Lóo dzə e ŋkuùr, é ví wáa bemér vèsən, ndzə bvəə́shi lóo kaʼ, a ví ŋeémé ne, e lày. Á kinyo ke kí lo, e koóy wír ve á shóŋ vèsən, wáy kilày e vèsə́n wùn.