Read Lamnso Aysaya 18 Bible Online

Aysaya 18 - Lamnso bible

Aysaya 18

¹Haà, ké nsay yee fo vintàn ví féŋ, dzəvtì vav, nsay yeé mbìv kùy ndzə̀v seé Etiopia.[34]

²Dzə̀ fo vé saʼa lo, á tsə̀nsí aŋkùvtu vév é vitum vímóʼ ví, á wàa səy e ndzəv yee Naay, aá ghán e vikoŋ ve á fèrìn e ŋkiʼ. Ven ve vèn lo ntum si cér, vèn du é kitum ke wír vee fóo dzəə̀n adarkìn adarkìn, a jav wùn foóme bèn, rəsìnè. Dzə̀ kitúm, a kí bémer vímóʼ ví, à vee fó mentsə̀m ví, à vee kwaʼda vi. Kitúm, a kí tàv é ŋàŋ, nəʼsì vímóʼ ví é dzəə̀ kisaŋ. Wír, aá dzə́ e nsay ye ndzə́v sí toʼnin sinín.

³Á bèy, vitúm vidzə̀m, à wìr dzə̀m wo wù dzəə̀n é kitu ke nsay, á lóo koʼór cícíwàr e yuv é gwan ji á tooy vé rərí, vèn wàa yen, lóo toŋ sóŋ yee loŋ kiyaʼ ji rə́r sí tsə̀ŋén ne, vèn yuùrí, é wìr wáa tiy e wun shwin.

⁴NYÙY TÀR‑iì sùúy e mò mo wù yíi yiì. Wù‑uù sùúy jii, «Vinyo vi yíi a koóy, é wun kú a dzə kfə́ e wun kirə̀ʼ ké dzə, a leéy. Wun kù yíi a dzə kfə́ ji nyaáŋ, kù mo virə́ʼ ví lo, ví kèʼ, a lùm ji weè e kishiíy ke ndzə bòŋèn, a lò ji weè, kù moo ŋweʼ ye yí lo, yí wàa gbù ji weè e ghan sé ŋkav vifa.»

⁵Wù‑uù suuy bèy, a kí wíy a dzə jii, vitiír ví wíy saàm, koomè, a ví yóʼ ne tàvkír ye á káv, é NYÙY TÀR nèn shètì tám se sí tókirì e shwàʼ, e kaàŋè se darkìn sí.

⁶Dzə́n sé wíri sí kù wíy a neŋnín moo tám se vici sin, a neŋ, é menə́n wùn à nyám se kwaʼ si wáa wìy, a sàʼ, a kfər bèn kiyá kifur, a kfər e lùm, a kfər e bìŋ.

⁷Wíy lòo dzə e ghan fóo fèy, é wíri wáa wìy aàfómoó e NYÙY TÀR woo Taà Mànjòŋ si. Wír ve á wíy a wìy sho vìne dzə̀ wír adarkìn adarkìn, wír, a jàv wùn foóme bèn, rəsìnè. Dzə̀ kitúm, a kí bémer vímóʼ ví, à vee fó mentsə̀m ví, à vee kwaʼda vi. Kitúm, a kí tàv é ŋàŋ, nəʼsì vímóʼ ví é dzəə̀ kisaŋ. Wír, aá dzə́ e nsay ye ndzə́v sí toʼnin sinín. Áwune wíy a wìy aàfómo vine é Gwan Sion. Dzə̀ fó, fo á cu NYÙY TÀR woo Taà Mànjòŋ, kóʼor yír rə́.