Read Lamnso Aysaya 2 Bible Online

Aysaya 2 - Lamnso bible

Aysaya 2

¹Vinyo ve Nyùy‑iì ghemen ndzə, e dìn e Aysaya woo wan Amot kùm wír veé Juda, bo taaka veé ŋkàlaʼ yee Jerusalem vi vìne. Ví dzə̀ jii:

²Wíy lòo dzə e ghan se sí wiyì, é gwan wo lav cù NYÙY TÀR tíy sho, wáa dzə gwan wo wù shaàn agwan adzə̀m. Wù wíy a tiy e yuv, a shaà virùmèn vidzə̀m, a vitúm vidzə̀m vi wíy a mèʼèm, a wìy fo.

³Vitúm vi wíy a wìy fo vinín, a suúy jii, «Vèn wáa wìy, é vèsən wáa koʼ e NYÙY TǍR gwan, gwan, a dzə̀ lav Nyùy wo Jakov ghvə́mé. Nyùy yíi a yeʼéy vèsən kinyo ke wù taʼ ji vèsən wáa yiì, a vèsən kù yíi a ghan a dzə̀ e wun mbòv.» Kí dzə̀ jii, ntir se NYÙY TÀR sí kù wíy a lò a dzə̀ fó Sion, a wù kù wíy a suŋnín e wíri, a dzə̀ fó Jerusalem foo fèy.

⁴NYÙY TÀR wíy saʼ nsaʼ se vitúm vi tsə́ynin vitú sho, e tinén vinyo ve wìr anín. Wù tínenè, aáwune li nyùy sév sé rər, e fèr a dzə̀ visoó ve kwaʼ sho, e lì kòŋ sév, e fèr a dzə̀ akòómèntá shó. Bó kitúm ki yòʼ dzəə́ wìy a màʼ rə́r wùn à kímóʼ kí, a bó á yòʼ kfə̀n dzəə́ wìy a yeʼéy mo á yii maʼ rə́r.

⁵Ven vee rám Jakov, vèn wáa wìy, é vèsən wáa jùmrì rán ye ntir se NYÙY TÀR sí fó.

⁶Rúrú, NYÙY TÀR, à màʼày ne wír vé. À màʼày ne wír vé vee rám Jakov, bìʼ fo á bìʼnìn ne liì vitum veé mbìv yee fo shùy yii tó. Áwune sì moo vé fù veé Filistia, suúsin a dzə̀ wùn à vitúm vi, jumrì liì wov.

⁷*Kisha ke mbàm ki rùn ne rúnén aáwuné wòŋ, à ke fəvír kí, à ke baar kí, a bùʼ wov dzə̀, a bó yòʼ dzə̀ á tàŋ. Nyám se ŋkoʼ si sén senén aáwuné nsay, a bó yòʼ dzə̀ wìr yù fóo taŋ *viténtén vév vé rər.

⁸Woŋ wóví kù dzə̀ mebvə̀m mebvə̀m, aáwune cu vifá, a dzə̀ ve kù fèrìn áwune. Vifá, aá ku fèr a dzə̀ e wó yéví.

⁹Á bèy, wìr msòŋ kfə̀n ne ji kifá ke kisaŋ ki. Wìr dzə̀m sèn ne kitú kfə́, a neŋ neŋén é nsay. NYÙY TÀR, lá à yòʼ kfə̀n nàn áwune.

¹⁰È wìr msòŋ ey, vèn nyéŋ, e shèmkír e mbvə̀ʼ si. Vèn túŋ bií sí, e lìr sho. NYÙY TÀR wiyì, a wù wiy e ŋgeʼ ye beemén. NYÙY TÀR kùʼ e ŋàŋ, e kfə̀n a dzə e gháʼtín, a bó yòʼ dzə̀ vèn tìím é si wo.

¹¹Wù wiy, e sèn wír wo wù li kitú kfə́ ji Nyùybomkpù, e dìn kisáŋ ke vé kiŋkoʼòrwùné adzə̀m. Á bèy, é kú a dzə NYÙY TÀR cáʼ wo á wíy a koʼór yír rə́ é kishiíy fóo fèy.

¹²NYÙY TÀR woo Taà Mànjòŋ shòʼ ne kishiíy, kishiíy ke kinyo ki wíy koóy wír ve á kóʼor wún, kóʼor, yén ji moo áwune yòʼ dzə̀. Wù wíy sèn wir dzə̀m wo wù kóʼor kitú kfə́,

¹³réŋréŋ mo á bàʼtì a dzə̀ vicí vé *sidar veé Lebanon ve darkìn ví, e sə̀ʼə́r vicí vee *oak veé Bashan[4] e nsay.

¹⁴NYÙY TÀR wíy sèn vé kiŋkoʼòrwùné adzə̀m, kù moo ji wù ketì a dzə̀ agwan wùn aàŋkoŋe.

¹⁵Wù wíy səʼə́r áwune é nsay, kù moo ji wù sə́ʼər a dzə̀ virùmèn ve bomén ví, ketì virə́v ve á bomen, e kìŋsìn ŋkàlaʼ sho.

¹⁶Wù wíy sèn vé kiŋkoʼòrwùné, kù moo ji wù fə̀ə́r kinsəm, kí sáʼtí amàkìkoŋ, á láy é ndzəv, amàkìkoŋ ve á kávnin wáy, du mee e ndzəywoŋ[5] à ve á fèrìn, e bònen nàŋsín, á tó síi.

¹⁷Wù wíy dìn kisáŋ ke wìr ve á li vitú vév ji Nyùybomkpù, e sèn wír ve á tíy tiyín aámóʼó kitu, é kú a dzə NYÙY TÀR cáʼ wo á wíy a koʼór yír rə́ é kishiíy fóo fèy,

¹⁸a bó á yòʼ dzəə́ wìy yen kifá kímóʼ kí ji mebvə̀m e ghan see shooy.

¹⁹Kishiíy ke NYÙY TÀR wíy jevrí, a màʼ ŋgeʼ e kitu ke nsay, wíri wíy a nəəkír e mbvə̀ʼ si, a lìr e bii sí, bìʼ fo NYÙY TÀR wiy e ŋgeʼ ye beemén, a wúnwun kùʼ e ŋàŋ, e kfə̀n a dzə e gháʼtín, a bó yòʼ dzə̀ wìr msòŋ yù fóo tiím e si wo.

²⁰Wíy lòo dzə e kishiíy fóo fèy, é wìr dzə̀m maʼay mebvə̀m mev, mebvə̀m, a vé‑eè fer e kisha ke mbàm ke fəvír wùn à ke baar kí, fer ji anyùy vév, nèn ghvə́mé. Á kù wíy màʼày a dzə̀ e virònnsay wùn à vilíim ví.

²¹Ghán sin se Nyùy wíy jevrí, a màʼ ŋgeʼ e kitu ke nsay, wíri wíy nəəkír e mbvə̀ʼ vilan, e nəəkír e nsàn se vilan veé kitu ke vilála, bìʼ fo NYÙY TÀR wiy e ŋgeʼ ye beemén, a wúnwun kùʼ e ŋàŋ, e kfə̀n a dzə e gháʼtín, a bó yòʼ dzə̀ wìr msòŋ yù fóo tiím e si wo.

²²Vèn kù yàr rì fó a way vifií a dzə̀ e wìr msǒŋ wùn. Wír, a là kiyoy, bo wù kù sì é ŋòròʼ. Bo kinyè kí dzə̀ ka e wun?