Read Lamnso Aysaya 20 Bible Online

Aysaya 20 - Lamnso bible

Aysaya 20

¹Yì‑iì dzə̀ é ghan se Fòn Sargon woo fon woó Assiriya‑aà tsənsin kitú kfə́ ké vé rər é Ashdod, kí dù, e ghìʼ ŋkàlaʼ rə̀n e rə́r sí, e tòn,

²kú a dzə e ghan fóo fèy, a NYÙY TÀR súŋnín ne e Aysaya woo wan Amot jii, «Shóʼ ndzə̀y sé kpu se à tìmèn sí, e shòʼtí alábáʼá fó wuù.» Á bèy, Aysaya ku nèn yiì mo NYÙY TÀR‑iì suuyin, e shòʼóy ndzə̀y fó wùn, a ghan kinshóʼ, e wuú nsay.

³Á bèy, NYÙY TÀR wìy lò, e sùúy jii, «Ŋgaà lìm wom woo Aysaya ghàn ne kinshóʼ, e wuú nsay viyá vitaár, a sì kisəəm ké kinyò ke m yíi yiì e wír veé Ejiv wùn à veé Etiopiàa.[39]

⁴Kù dzə̀ mo fòn woó Assiriya wíy koorí wír veé Ejiv wùn à veé Etiopiàa, e meér áwune, aá fəə́ nsàm, e dù, a dzə a dzə̀ é kitum ke sən kí. Á wíy meér áwune wir dzə̀m, à ŋgàywìr, à wánlè, aá wáa dù kinshóʼ, e wuú nsay, é ntuʼ se kinyè sí wáa yensín, é wír veé Ejivi fíʼ a woomé.

⁵Kindzə́m kí wíy gwàr vitúm ve ví‑iì yoy, tiir a dzə̀ e Etiopia wùn, wùn à ve ví‑iì leey sə́mo fó Ejiv vi, é ví wáa woomé.

⁶Wír veé Filistia wùn à veé Juda ve á dzə́ e ŋguùŋè rìbà ndzə̀ví wíy a ghay wún jii, ‹Vèn yén ri búʼú kinyo ke kí kooyin vitúm ve vèsən‑eè leey ji ví sə́ vèsən kí. Vitúm ve vèsən‑eè mbaàn ji á boyir á vèsən fo fòn woó Assiriya wo. Àshè, ké lèn ki, bo vèsən yíi yèe késən, e bóo bòy?› »