Read Lamnso Aysaya 21 Bible Online

Aysaya 21 - Lamnso bible

Aysaya 21

¹Sáʼ Nyùy yee kùm nsay wòʼ yeé ŋguùŋè rìbà ndzə̀ví rə̀ne. Nsay wòʼ féyì feyì ye dzəə̀n Babilon. Sáʼ rə̀ne dzə̀ jii: Kinshùʼùm ki lo, e sàsìn, e bvəy fo woʼ, kirə́ʼ a dzə̀ kitúm, aá yii fan fànèn. Kí lo, e bvəy moo kiìkir wo wù kar virə́ʼ é Negev.

²NYÙY TÀR‑iì dìn kinyo e mò é njèm, kí wáa jivír mo. Mò‑oò yèn, e kfə̀n yù a Nyùy suuy jii, «Ven ve á fiinè wíri, vèn fiine, e dù e kindzəʼ, ven ve á laar virə́ʼ, vèn laar, e dù e kindzəʼ. Ven vee wír veé Elam, vèn ghíʼ ŋkàlaʼ e rə́r sí. Ven vee wír veé Media, vèn gim fóo, e tàr, bìʼ fo mo woo NYÙY TÀR, m yíi màyìr kónsí ye Babilon yiìn, vitúm vi wáa konsí.»

³Á bèy, mo woo Aysaya yén vinyo vìn, wúné tiíné mo, nyár ye m yúu wáa dzə moo yé wiíy wo wù lúmé. Vinyo ve m yuun, e kfə̀n yèn ví jívir mo, yii, a m fanè.

⁴Bó m yòʼ fə̀m dzəə́ kiiy kinyo ke dzə̀ m wàa kwàʼtì. M kù sí yaʼ yàʼàn, a yii fan. Lóo dzə e ŋkuùr wo m kì yíi a yu vijuŋ, kinyo ke NYÙY TÀR kì yiìn, m yén ki kù a yiì, m wàa fàn fànèn.

⁵Mò‑oò yèn a vé saʼ wùn à vé rərí lo, á bàʼtí é ŋkàʼ, e sàŋrì gham, a dzə sho, a yikír, a nonín. Shintàm shi lóo dàr, shirəə́ shi nèn kòʼ jii, «Amfòómé, vèn ŋáʼáy cér, e bàʼtí aŋkèe rərí.»

⁶Rúrú, kinyo ke NYÙY TÀR‑iì suuyin e mò kí dzə̀ jii, «Leéy ŋgaà ŋkiy, e tsə̀ə́r e kày ye yí giŋ ŋkàlaʼ. Tsəə́r, é wù kóʼ ŋkiy, a jàŋ kinyo ke wù yéné.

⁷Wù yén *viténtén vé rər a səŋ nyám se ŋkoʼ sibaà sibaà,[40] kfə́n yén ŋgoo vimbèʼbìy, kìn ye akamer e vé koʼó kitu wo, wù kù shoòshí kijuujùŋ, e lì ghán, e tàr kidzə̀m.»

⁸Á bèy, ŋgaà ŋkiy nèn yiì lò, e sùúy kfə́ jii, «NYÙY TÀR, m kòʼ ne ŋkiy fèn ntàmda. M kù tíy fo vé‑eè tiirin mo, m tíy e shùy, tíy vitsə́ʼ.

⁹Ké lèn ki, m yèn wír a wù wiy e kitentén, kiténtén, a səŋ nyám se ŋkoʼ sibaà.» Á dzə́r shó, wù bìnèr jii, «Á tòn ne Babilon, wù sə́ʼsí səʼsín. Á bvə̀ʼtí ne mebvə̀m me áwune‑ee cu, mebvə̀m mee anyùy vév mè dù ne e kibvə medzə̀m.»

¹⁰Éè wìr vém veé Juda, ven ve á buʼun mo á bùʼ saár, kinyo ke m fèrìn e vèn kin ki dzə̀ ke m yuun fo NYÙY TÀR, Nyùy wìr veé Isray woo Taà Mànjòŋ.

¹¹Sáʼ Nyùy yee kùm Dumàa[41] rə̀ne. Yí dzə̀ jii: Wìr fúŋ fo agwan veé Seir, dzə́r e mò woo Aysaya jii, «Ŋgaà ŋkiy, kee kùm ndzə vitsə̀ʼ kí dzə̀ ji ka? Yì lo, e fo ghay e ndzə ye ranén a dzə̀ é ghàn ka?»

¹²M bínér jii, «Ndzə sí ráné, ráné, é vitsə́ʼ ví nèn kfə̀n lì ghay. A vèn dzəə́ kér kinyo kée dzər, bo dzə̀ á dzə̀r, dzə́rí, á kfə̀n siì dzə̀r.»

¹³Sáʼ Nyùy yee kùm woŋ woo Arabiàa[42] rə̀ne. Yí dzə̀ jii: Ven vee mbèʼŋkùm woó Dedan, vèn aàkamer véné yíi a lìr e mvə̀m aŋkun ve á dzəə̀n é woʼ.

¹⁴Ven vee wír veé Tema, vèn li mendzə́v mè, e nòór wír ve á léʼ rə́r fo áwuné wòŋe shó. Vèn noorì, vèn fò áwune viyíkìr.

¹⁵Áwune nyéŋ a dzə̀ nyùy rə̀r, nyùy, aá shóʼ ne, a taamé áwune shó. Áwune bòy bòyìn fó kinte, kinte, aá daá ne, bér maʼ. Áwune nyèŋ a dzə̀ fó shùu rər se sí barin áwune.

¹⁶NYÙY TÀR kfə̀n‑eè shaà fó mbìy, a suúy e mò woo Aysaya jii, «Wíy a dzə e bǎm kiya, kù mo wìr lìm yii táŋ vishiíy və́ vé lìm, aá laar kifá kidzə̀m ke wír veé Kedari kóʼor wún shó.

¹⁷Vé rər veé Kedari wíy ber wír ashàr. Fə̀m mo dzəə̀n vintav ve wíri ve á kiìn móo màʼ mvən. Kù suuy mo woo NYÙY TÀR woo Nyùy wìr veé Isray vinyo vìn.»