Read Lamnso Aysaya 24 Bible Online

Aysaya 24 - Lamnso bible

Aysaya 24

¹Vèn yuúrí, NYÙY TÀR sí lo, e sàʼtì kitú ke nsay,[51] e yiì, é kí kfə́n é vifə̀m. Wù yíi yiì, é mbom téŋkír, é wù táʼár wir dzə̀m wo wù dzə́ sho.

²Kinyo kìn ki wíy a kùm wir dzə̀m réŋréŋ. Kí wíy a kùm taà cù réŋréŋ mo kí kum wír woo və̀y, a kùm wír ve kuʼkìné réŋréŋ mo kí kum akwàn vév. Kí wíy a kùm vikìy veé lav réŋréŋ moo wón ve á lim e lav, a kùm wír ve á yún vifá réŋréŋ moo aŋgàa fiìnè. Kí wíy a kùm wír ve á foor wíri mbàm réŋréŋ moo aŋgàa mfoòmé, a kùm wír ve á sámer wír vifá réŋréŋ moo aŋgàa sam.

³Á wíy sàʼtì kitú ke nsay, é kí sə́ʼsí, e mày, e sù kifá kidzə̀m ke kí dzəə̀n shó súun. Á kinyo ke NYÙY TÀR suuyin.

⁴Éè mǒ vèné, á kitú ke nsay, a kifá kidzə̀m ki yúm ne fo fo, e mày a? Kí sòóy ne, kitú ke nsay ki wáa dzə e nsòvkìtu. Bó nyèé yòʼ dzə̀ə́ e wír ve kuʼkìn veé kitu ke nsayi.

⁵Wír ve á dzə́ e kitu ke nsayi yiì ne kitú ke nsay ki bír birín kidzə̀m. Áwune ŋwày ne yéʼéy Nyùy, e bìvír kitú ke nsay. Á jwìvrì ne sáʼ Nyùy, e yàʼáy *mensaŋ me wù‑uù gwàrìn wùn áwune ji mè kù wíy a tiy fo.[52]

⁶Bìʼ bey, kinyo ke tavín kí lo, e sùm kitú ke nsay. Wìr msòŋ woó kitu ke nsay sí lim ŋgeʼlàʼ njò yev. Á kifá ke kí yiìn, é bo wíri ndzə́mén, é bér ashàr.

⁷Vitiír vé *vayin vi yùm ne, meluʼ mè kéʼ a juukír. Wìr dzə̀m wo wù‑uù nó meluʼ, yú vijuŋ, sì a dzə̀ e shwémé shuù lèn.

⁸Kiléŋléŋ ké nshùm se wíri búʼ, shéʼri ki ŋeèmé ne, e lày. Bó á yòʼ dzəə́ yú shéʼ ye wíri savnìn, leerì. Lúŋ ye á baytì, a kiléŋléŋ kí gburìne sèéy ne.

⁹Bó wìr yòʼ kfə̀n dzəə́ nó meluʼ, yovì, a meluʼ me tavkín mè kù sí kwáyri kwàyrín e vé noó shuù.

¹⁰Ŋkà se laʼ si sàʼkìr ne, a bvəərí bvəərín. Wìr dzə̀m sə́ŋ lav si, e lìr e mvə́ wo.

¹¹Wíri kù sí jaŋ e mentàrnín jii, «Vèr yòʼ dzəə́ kér meluʼ.» Vijuŋ ve wìr ve vé‑eè savnìn vi ŋeèmé ne, e lày, ndzə́ʼ ye wíri‑iì yú vijuŋ, ndzə́ʼə́ə máy fó kitu ke nsay.

¹²Ŋkà se laʼ si kù sì vifə̀m vifə̀m, shuu se kày se vé‑eè kivtin sí sí néŋnin sisaʼkìn.

¹³Rúrú, á kinyo ke kí wíy koóy vitum veé kitu ke nsay vidzə̀m. Kitú ke nsay ki wíy a tiy kisáŋ, a tiy moo kicí ké *oliv ke á kòyìn ne báŋ si fó fo, a tiy moo súm vitiír vé melùʼ wo á kòyìn ne tútúʼ fo fo.

¹⁴Wír ve á beriné wíy a fuŋ yòv, a yu vijuŋ. Á wíy a yòv e mbìv yee fo shùy yii nəə e vitaáví ví vidzə̀m, a waamé jii, «NYÙY TÀR shaà vitaáví.»

¹⁵Kí nén a dzə jii, ven veé mbìv yee fo shùy yii tó, vèn wáa koʼór yír NYÙY TÀRí. Ven ve á dzə́ e ŋguùŋè rìbà ndzə̀v, vèn wáa kwa yír NYÙY TÀRí, wun woo Nyùy wìr veé Isray.

¹⁶Á kù sí yú, a wíri yov luŋ kitú ke nsay kidzə̀m, yov, búri NYÙY TÀR shó, wun woo là nsem. Yii bèy, m ló kém, e wèʼ wèʼèn moo wír wo yàsí rèŋèrìn ne. Vijuŋ vi yòʼ dzə̀ e mò gheéy. Aŋgaà lám bàá lò ne kév, e kù a yu kinyo ji kimboʼtì ke boʼtín kí.

¹⁷Wìr msòŋ e dzə̀m wo wù dzə́ e kitu ke nsay, vèn yuúrí, rìʼí lo, e sùm ven. Á tùŋ ne bií, e wày vitám, e kaàrí ven shó, e tàr.

¹⁸Wìr yíi lòo mùm ji wun léʼ kiléŋléŋ ké rìʼ vən, é wù gbu a dzə̀ é bii. Wìr fə́m lóo mùm ji wun‑éè ŋaŋri, e fəə̀ fó bii, é wù nəə́ a dzə̀ é kitam. Yúví mvə̀ʼ ne shuu, e lèm e rə́, kinsə̀ŋ ke nsay ki sə́ʼ.

¹⁹Kitú ke nsay ki sàʼkìr ne, e kfə̀n é vifə̀m. Á tòʼtí ne kitú ke nsay e vibàr vibàr, a kí sí səʼsì sə̀ʼsìn kidzə̀m.

²⁰Kitú ke nsay ki sí rə́vkir rə̀vkín moo mfoòkìnó, səʼ moo táv wo shwéri karì. Vinyo ve bi veé kitu ke nsay vi dzə̀r ne e ŋàŋ, a kitú ke nsay ki yíi gbù, e làa yòʼ ŋaʼáy.

²¹Wíy lòo dzə e ghan fóo fèy, é NYÙY TÀR maʼ ŋgeʼ e vifá veé yuv ve ví kér vitaáví[53] ví kitu, e màʼ sa aàfoné kitu, áwune ve á dzəə̀n é kitu ke nsay.

²²Nyùy wíy baʼtí áwune, e way e bii moo vé sháŋé. Wù wíy fìn áwune é sháŋ woó sar nsay. Aáwune dzəʼəm fó, ntàm wíy darì, é wù maʼ ŋgeʼ aáwuné kitu.

²³Ŋwee wíy a ban, a làʼrì làʼrìn, a bó shùy yòʼ kfə̀n wíy a ban, a lùm. NYÙY TÀR woo Taà Mànjòŋ wíy a saʼ e Gwan Sion e Jerusalem, é vilìmbìy ve wìr və́ ví wáa yen rán wun woo Nyùy.