Read Lamnso Aysaya 25 Bible Online

Aysaya 25 - Lamnso bible

Aysaya 25

¹Éè NYÙY TÀR, à dzə̀ Nyùy wom, a m yíi a wùʼsì wò, a koʼór yír yé, bìʼ fo à yiìn ne viŋgaʼnìn ve vinyò. Vinyo, a dzə̀ ve wò‑oò sìysìn ne, e kèʼ fo yàŋgùʼ, e kù nèn yiì kíwun réŋréŋ mo wò‑oò suuyin.

²À kètì ne ŋkà se laʼ se wíri yéʼti sho, e siìr ji vikfə́r ve tiy, e sàʼtì ŋkà se laʼ se á bonen, e kìŋsìn sìn, sí dú é vifə̀m. À laàr ne ŋkà se laʼ se vitúm vi bàʼrìn virə́ʼ vév ve tavkín ví fó, a bó yòʼ dzə̀ á kfə̀n dzəə wìy yù fóo bàʼrì, e siìr e bàm.

³Bìʼ bey, vitúm ve tavkín ví yíi a binsí vikuʼùy vé. Wír veé vitum ve ví nyárnin vìne yíi a fàn wò.

⁴NYÙY TÀR, à kù‑uù sì kirə́ʼ ké kilìr ke vé kitàne, kirə́ʼ ké kilìr ke aghéʼncey, aáwuné mvə̀m ŋgeʼ. À kiŋsìn áwune moo táv wo wú kiŋsìn wír fo wuú kinsəme, kiŋsin moo kindzə̀ə́ndzəm ke virə́ʼ ví lóo lùm, wìr beè é sar wo. Wír ve á nyárninèe táy wíri, kù moo kinsəm ke kí tsə́y kirə́v ké lav.

⁵Táy moo lum yeé kirə̀ʼ ké woʼ kí. Yii bèy, NYÙY TÀR, sə̀r wò luŋ nsiì fo vitúm vìn ví shuù. Luŋ feyì wo vé kiŋàʼa sí yov ji á tòn ne ver. Rúrú, à sə́r kàŋ mòʼón moo mbàʼ ye yì fəən, e sə̀r lum.

⁶NYÙY TÀR woo Taà Mànjòŋ wíy baʼtí ŋkàʼ é Gwan Sion, ŋkàʼ, a dzə̀ wó vitum vidzə̀m. Nyàm wíy a dzə kimfom ke nyàm, a dòŋ rún é vighvər, é shiluʼ shi wáa koo shiyuúmén é shuù.

⁷Dzə̀ é Gwan Sion fèn fo Nyùy wíy bvə̀r ndzə̀y sé kpu fo wìr dzə̀m wùn, e tsə̀ʼ nsòvkìtu kpu wo wù sə́ti vitúm vidzə̀m moo gùmlur.

⁸NYÙY TÀR woo Taà Ndzə wíy laàr kpú, é yí may ŋkuuŋkùŋ. Wù wíy sòr mensíy fo wìr dzə̀m si, e sù wír və́ fó liy se á shur áwune shó virə́ʼ vidzə̀m. Á ŋkàʼmé wo NYÙY TÀR yiìn.

⁹Kishiíy kin ki wíy gheén, é wíri wáa yòŋ jii, «Vèn yén, Nyùy wor və̀ne, a vèr kù‑uù yoy, tiir a dzə̀ ji wù wíy lùŋèr ver. NYÙY TÀR wo vèr‑iì tiir vifií vér shó və̀ne. Vèsən kú a sheʼrí, a yu vijuŋ ji wù lùŋèr ne vèsən.»

¹⁰Rúrú, NYÙY TÀR kù wíy a kìŋsìn Gwan Sion. Yii bèy, wù wíy sèn wír veé Moav, e nyèŋrì áwune e wuú, kù mo á nyèŋ viŋgà ve á kuʼun é bii.

¹¹Áwune veé Moavi wíy a nàn wó e yuv, a toŋ ji wù sə́ á áwune. Aá wíy a nàn moo yé wìr wo wù láʼ ndzə́v, seŋ e wóo. Yii bèy, é NYÙY TÀR tátí áwune wùn à wó ye á nanèe, e shòór, é kiŋkoʼòrwùn ke áwune rə́si kér ki may.

¹²NYÙY TÀR wíy səʼə́r virə́ʼ vé wìr veé Moav ve tavkín ví, e kètì, é ví keesi, a neŋ e nsay bèn e kibvə̀r.