Read Lamnso Aysaya 27 Bible Online

Aysaya 27 - Lamnso bible

Aysaya 27

¹Wíy lòo dzə e ghan fóo fèy, é NYÙY TÀR soŋ nyùy rə rə̀r, a yì njímé, a dzə̀ ye wiy, a bó yòʼ dzə̀ yì bvə̀nkír. Wù wíy lì, e yuyrí nyám yee Leviyatan[56] sho, nyám, a yì léʼ, tóykir moo yó. Wù kù wíy yuyrí kigàgǎʼsòŋ keé rìbà ndzə̀v kin.

²Wíy lòo dzə e ghan fóo fèy, é NYÙY TÀR suúy e wíri jii: «Vèn wáa yòv luŋe kùm súm vitiír vé *vayin, súm wo tútúʼ koom sho kijuŋ.[57]

³Mo woo NYÙY TÀR, kù dzə̀ mo nshìy woó súm vitiír vən, a wáyri mo mendzə́v shó ghán sidzə̀m. Kù kiŋsìn mo e shùy wùn à vitsə́ʼ, fo wìr nəə́ shó, e ghèʼ.

⁴Kinyo ke a dzə̀ kí yiì, m shwìíy kilòŋ bìʼ súm vitiír vən ki yòʼ dzə̀. Kù dzə̀ cáʼ ji a vimbìn wùn à vitiír vé njoŋ vi kì kúy fo, bo m sheèmé fo, e dzəə̀nè, e tòn vidzə̀m.

⁵A dzə̀ ji aŋgàa vibǎn wìr vémé wáa tàʼ ji m kiŋsin áwune, bo áwune kér fo vèr áwune tár shuu. Áwune kù kér fó tar shuu vèr áwune.»

⁶Ké rám Jakov, wíy lòo dzə e ghan se sí wiyì, é yí kfən kèʼ, a kuy. Kitúm kee Isray kìn ki kfə̀n wíy tokír, e fo vibuushì, é báŋ se kí koom si rún kitú ke nsay.

⁷Òó mbaà, NYÙY TÀR ku yòʼ tsə̀m rú wír veé Isray, mo wù‑uù tsəmen wír ve vé‑eè tsəmen áwune á? Wù ku yòʼ yùyrí áwune, mo wù‑uù yuyrin wír ve vé‑eè yuyrin áwune á?

⁸NYÙY TÀR‑iì sə̀r áwune sə́rin, mo a yì‑iì dzə̀ á kù sə̀r, e fə̀ə́r, e tsə̀nsí e kwaʼ nsàm. Wù‑uù jùm áwune e dòʼshwíiy və, a wù lum moo shwér woó kirə̀ʼ ké woʼ kí.

⁹Rám Jakovi‑iì du bèy ji á fiʼ làʼ njò ye á kér wùn à Nyùy. NYÙY TÀR wíy lòo jì ji wù wáa sù njò yev ŋkuuŋkùŋ, aáwune ku nèn bvə̀ʼə́y sə́y se kiy cù anyùy kisaŋe, e gwàtì wúr sé nyùy woo *Ashera, e kètì virə́ʼ ve á ton kiláy, yii cu sho, a bó kfəʼ kifa feyì yòʼ wíy gòʼ, a tiy.

¹⁰Ŋkà se laʼ se á kìŋsìn e káyi sí sí tíynin e vifə̀m,[58] a wìr dzə̀m woo fó léʼ ne, e màʼày fó. Ŋkà se laʼ sìn si sì moo wóʼ fo nyám si ghán, taʼ yí. Kù dzə̀ fó, fo sí sí meemè, sooy tám se vici.

¹¹Sí sooyì, tám se vici sí yúm, béʼkirì, é vikìy wáa wìy, a siv ji meŋkaʼ. Rúrú, wír vìne ter fo vinyò e kúmé, a NYÙY TÀR wo wù‑uù bomen áwune yòʼ wíy sham áwune. Wun wo wù‑uù bomen áwune yòʼ wíy dìn shammèndzə̀n aáwune.

¹²Wíy lòo dzə e ghan fóo fèy, é NYÙY TÀR fétí sáŋ, e fə̀ə́r mvə́y. Wù wíy baʼtí ven vee wír veé Isray wir mòʼón mòʼón, e kèʼ fo ndzəv yee Yufret, e dù, e meé e yeé Ejivi.

¹³Kishiíy kin ki wíy gheén, aá tóŋ loŋ kiyaʼ, e nèn baʼtí wír ve vé‑eè màʼàyìn, á láy e nsay Assiriya, e kfə̀n baʼtí ve vé‑eè fəərin, e dù sho e Ejiv, aá wiy adzə̀m, a sùyrì NYÙY TÀR é Jerusalem, e wun gwan wo ranén.