Read Lamnso Aysaya 28 Bible Online

Aysaya 28 - Lamnso bible

Aysaya 28

¹Ŋgeʼ dzə̀ ye ŋkàlaʼ ye yì bòŋèn moo ntáráʼ, ŋkàlaʼ ye yì dzəə̀n é mbìv kùy mboʼ ye nsay yee fó borin kijuŋ, e dù, e mày. Ŋkàlaʼ ye amfoòkìnó veé ram Efrayime kóʼor wún shó. Vijuŋ və́ ve ghaʼán ví kfə̀n ne ji kibuushì ke kí yúmé, kí sòóy.

²Vèn yuúrí, NYÙY TÀR lèm ne kintav ke wìr.[59] Wù wíy wìy e njà kinsəm, e wìy moo mentíy meé mvə̀m kiŋkò ke wuu me mè ketì virə́ʼ, e wìy moo kiŋkò ke wuu ke kí keèsìn, kúŋé lí virə́ʼ. Wù wíy wìy e menshév mè wùn, é wù saʼti kifá kidzə̀m e ŋkàlaʼ, é kí wáa neŋ e nsay.

³Ntáráʼ wo amfoòkìnó veé Israyi kóʼor wún shó və̀n, wíri wíy a nyèŋrì e wuú,

⁴é vijuŋ ve ŋkàlaʼ vi may moo kibuushì ke kí keesin, ŋkàlaʼ, a yì dzə̀ é mbìv kùy mboʼ yee fo nsay borin kijuŋ. Ví yíi mày moo tútúʼ woo koóm é shùu kimgbù ke wuu, tútúʼ wo wìr shóv e si, wù kòy, e màʼ màʼàn é shuù.

⁵Wíy lòo dzə e ghan fóo fèy, é wír NYÙY TÀR ve á wíy ber ashàri yén vikuʼùy və́. Wun woo Taà Mànjòŋ wíy a dzə ntáráʼ wov wo wù kér vikuʼùy.

⁶Wù wíy yeʼéy vilìmbìy, é ví wáa tinén nsaʼ se wìr dzə̀m, kù mo wìr yeʼeyin. Wù kfə̀n wíy fo vitaáví e wír ve á shiy kay yeé kitume, fo aŋgàa vibàné gvə́ytí, e nə̀ə́ kay, e ghìʼ e rə́r sí.

⁷Kí foy kí dzə̀ jii, atàá cù wùn aàŋgàa ntum Nyùyi kù sí ghán, fénkir bìʼ meluʼ me á noon, mè wáa jivír vifií vév. Á sí ghán, tuŋkìr tùŋkìn, a kù sí caacà meluʼ áwune. Á yòʼ dzəə́ yén ntum ye Nyùy Tàr din aáwune é njà kinjeenjèm, a bó áwune yòʼ dzəə́ kiiy móo tinén, e shù kinyo kee tìítiy.

⁸Rúrú, áwune nò ne, e màʼ e vidàŋ vidzə̀m fo á kì dzə́. Virə́ʼ vidzə̀m vi kù sì lóm lóm, a bó mbìv ye yì ráné yòʼ dzə̀ə́ sho.

⁹Áwune ndzə́kir kùm mo, té lám jii, «Ŋwàáy, wù kér ka ke dzə̀ wù yèʼéy ver shó? A dzə̀ yù la kinyo ke wù jív ji wun suuyì? Yéʼéy rəə́ kù dzə̀ yé a yeʼéy a dzə̀ wón ve á shoʼon fó vin sho.

¹⁰Wù rer vinyo rérin là nsàv, yoŋ ŋgoo kinyò rə̀n, wù yàʼáy, e dù e rə̀sə.»

¹¹Ŋwàáy, NYÙY TÀR wíy suŋnín e wír vìne, a wù wíy shaà a dzə̀ fo vitúm vi, vitúm, a ví súŋnin a dzə̀ lám se sən sí.[60]

¹²A wù‑uù ló a suŋnín aáwune, a yoŋ jii, «Kirə́ʼ ke a dzə̀ wìr meèmè fó ki kìne. Wír ve á dorkiné kú a wìy, a meèmè fo. Dzə̀ kirə́ʼ ke a wìr taʼ, e dzə̀ʼə̀m ji nyaáŋ, wù dù fó.» NYÙY TÀR suúy bey, áwune tén fó yuurí.

¹³Á bèy, ji NYÙY TÀR wíy a dzə fo áwune moo kinyo ke á rer rèrìn là nsàv. Á yoŋ ŋgoo kinyò rə̀n, á yàʼáy, e dù e rə̀sə. Bìʼ bey, á lóo tiír kiwuú, aá kú a bàyrìn, a gbùkìr gbùkìn. Á wíy a lemkír, a lì e vitam, aá wáa koorí áwune.

¹⁴Á bèy, ven vee vilìmbìy veé Juda ve vèn dzəə̀n é Jerusalem fèn, ven ve vèn shéʼ mo shéʼén, vèn yuúrí ntum NYÙY TÀR, a yì dzə̀ jii:

¹⁵Vèn dzəv nsaŋ ji vèn‑eè yiì ne kilìʼ vèn à kpúu, e yiì nsìysì vèn à woŋ aŋkfəə, kwaʼ ji a kinyo ki fə̀m meè moo ndzə́v, a sùm virə́ʼ, bo bó yòʼ dzə̀ kí kùm ven. Oomboò, vèn sévti ji kimboʼtì kén kí yíi kìŋsìn ven, é ŋkàʼmé won kimboʼtì téʼtín ven fó ŋgeʼ.

¹⁶Bìʼ bey, NYÙY TÀR woo Taà Ndzə suuy jii, «Vèn yuúrí, m neèr ne tíy é Sion ji kinsə̀ŋ. Tíy, aá múmrí ne, e bìnsí ji dzə̀ á yíwun, yíwun feyì ye a dzə̀ yí tòm kór lav, lav ye m bóm e Sion, a wìr wo wù wáy shilív e mǒ wùn yòʼ wíy a gìr.

¹⁷M bóm kém, kù mo á yii bóm kirə́v, fiʼì. A dzə̀ jii, m wíy a tinén vinyo e nsànloŋ, a yiì kinyo a dzə̀ ke réŋ kí. Fo kén kí, wuú mentiyi wíy kèr kirə́ʼ kén ké kilìr, kirə́ʼ ke á bomen a dzə̀ e kimboʼtì ki. Yí wíy teér kirə́ʼ kén ké kibeèy, kibeey ke dzəə̀n aŋkàʼmé kimboʼtì.

¹⁸Á wíy ŋway kilìʼ ke vèn‑eè yiìn vèn à kpúu, e bvəə́r nsìysì wo vèn‑eè yiìn vèn à woŋ aŋkfəə. Kúŋ wíy mee, lóo sùm virə́ʼ, lóo dù, é wù leér ven ŋkuuŋkùŋ.

¹⁹Kúŋ wíy a fəə, a fə̀m dzə̀ é ghàn ka, é wù kú a leér ven. Ke kí dzəə̀n kí dzə̀ jii, wù wíy a fəə mo kijàvndzə ki dzəə̀n, a fəə e shùy, a fəə vitsə́ʼə́.» A vèn yù ntum rə̀n, e kìíy nsàv, bo tímé kù‑úù kpú fo věn bvə̀m.

²⁰Kí vèn kì ŋgàn see jii, kikún kí tsə̀mér, a bó yòʼ dzə̀ wìr yù fó neèm, e nàsì shwín, bvə̀ràŋgí dór, a bó yòʼ dzə̀ wù kfə̀vsí wír, e tàrnín.

²¹Rúrú, NYÙY TÀR wíy ŋaʼáy réŋréŋ mo wù‑uù ŋaʼayin é Gwan Perasim. Wù wíy shwiíy kilòŋ mo wù‑uù shwiiyin é mboʼ yeé Gibeon. Wù wíy yiì kinyo ke wù yii, é kí wáa dzə jeéy fo ke vèn kwaʼtì ki, e yiì lim rə́, é yí wáa dzə kfə́ jeéy.

²²Á bèy, ven vin, vèn kér fóo yàr lám wó a té e mǒ wùn. A vèn dzə̀ là fóo yàr, bo vikwàn ve vèn ló a rèŋ vi lo, e dzə̀r. Kí dzə̀ jii, m yù ne kimaysì ké kinyò ke NYÙY TÀR woo Taà Mànjòŋ, kinyo ke wun woo Taà Ndzə sìysìn ji wun lo, e laàr kitúm kén kidzə̀m.

²³Vèn fó vituʼùr ví, e yuùrí. Vèn sə́ʼə́m, e yuùrí kinyo ke m suuy ki.

²⁴Ŋgaà sùm yii kóm súm, a wù kóm ne, wù kfə̀n a ruvtí, a kom ghán sidzə̀m à? Wù yii binèr nsay, tsə́yri, wù kfə̀n a ruvtí, a bìnèr, a tsəyrí à?

²⁵Wù yii kómé, la wù yòʼ nèn màʼ sáŋ yee *wit e ŋgoo si, e màʼ yee barli e wǔn kirə̀ʼ, e nèn màʼ ŋgoòy shiper e kor se sum a?

²⁶Kù sə́ NYÙY TÀR woo Nyùy wòsən ŋgaà sùm, é bo wù wáa kiíy kinyo ké a yiì e súmé, a yiì e ŋgoòy kifa.

²⁷Kí nén a dzə jii, bó ŋgaà sùm yòʼ yii li a dzə̀ kibur, e bó a buʼ *dill sho, a bó wù yòʼ yii li a dzə̀ kár ye səŋ nyám si, e bó a buʼ *kummin sho. Wù kù yii li a dzə̀ shicirìn, e bó a buʼ dill sho, li a dzə̀ mbàŋ, búʼ kummin sho.

²⁸Á yii jo saár jóon, e bó a fəə́r meŋkfəŋ, a fèr vifá sho, ŋgaà sùm lóo buʼ sáŋ buʼún, la wù yòʼ yiì, é yí kpú, e dù e meŋkfə̀ŋ. Wù lo, wù wàa tsəəné kár ye səŋ nyám si, yí wàa shaà e kitu wo, a nyèŋ, yii bèy, a bó wù yòʼ jo sho jóon.

²⁹Yéʼéy ye m fó e vèn rə́ne lò a dzə̀ fo NYÙY TÀR woo Taà Mànjòŋ. Wù dzə̀ ŋgaà ntir wo wù fiirin, e shaà aŋgàa ntir adzə̀m. Vifií və́ ví shoò é ŋàŋ.