Read Lamnso Aysaya 29 Bible Online

Aysaya 29 - Lamnso bible

Aysaya 29

¹NYÙY TÀR suuy jii, «Lòné dzə̀ wó ŋkàlaʼ yee Ariel[61], ŋkàlaʼ feyì feyì ye Fòn Davir‑iì liìn ji kirə́ʼ kfə́ ké dzə. Vèn koŋ, á kù shaà fo mbìy, a yi ŋkàʼ sén mo kiyá ki dzəə̀n.

²Yii bèy, m wíy màʼ ŋgeʼ e vèn vee wír veé Arielí kitu, é ŋkàlaʼ e dzə̀m wáa dìy, a konsí. M wíy siìr fó, é fóo kfə́n mensə́ mensə́ moo kíy cù.

³M wíy fəə́r vé rər, aá giŋ ven, e tàr, e bàʼrì virùmèn e věn ghaa kày, a ghiʼ ven e rə́r sí, e kfə̀n gìm ŋkàlaʼ yen e vifá ve rər vímóʼ ví, a tsəy kay ji á fíʼ kèr.

⁴Á wíy sèn ven é nsay, é vèn nèn a suŋnín moo wír wo wù súŋnin e mvə̀m nsay. Vèn wíy a suŋnín, é jì wáa lày làyìn é mvə̀m kibvə̀r. Jì yen wíy a koo moo ye ŋkfəsày wo wù súŋnin fo mvə̀m nsay, a koo moo ji néŋ wír e mvə̀m kibvə̀r e sar nsay, səmrì kinyo fo fo.»

⁵Yii bèy, shúu rə́r aŋgàa vibàn wo wiyí wíy kfən ji kibvər ke kí kpuun, é shúu rə́r vintav ve vé rər véné wáa dzə moo mvə́y se shwéri feer feèrín, é kinyo ki sasin, e nə̀ə́ áwune.

⁶NYÙY TÀR woo Taà Mànjòŋ wíy màʼ ŋgeʼ aáwuné kitu e kimbùmmbúm. Wù wíy tsənsí kishèv, é nsay wáa sə̀ʼsì, é kiyor ke tavín kí wáa koʼ. Wù wíy fəə́r shwér wo tavíné, e fəə́r kinsəm, à və́y wo wú koóme virə́ʼ kooméné.

⁷Vitúm ve ví ghíʼ ŋkàlaʼ Ariel vi wíy ŋeemé, e lày. Vitúm vidzə̀m ve ví ghíʼ áwune, ghíʼ virə́ʼ vév ve tavkín ví yii, a wír vee fóo yén ŋgeʼ. Ví wíy ŋeemé, e lày moo njèm ye yì shí wír, e ŋeemé, e lày moo kinjeenjèm ke kí wìyìn e wìr si vitsə́ʼə́.

⁸Njèm lo, yì kù bòʼtí wír. Yì lo, yì shì wír wo jìŋ yárí ji wù kì yíkirì, wù yií yimènè, jìŋ kù a kom vitó fo fo kómén. Yì lo, yì shì wír wo kilòŋ kí yúmé ji wù kì nó mendzə́v, wù yií yimènè, síi kù a kaarí kaarín, kilòŋ kí wàa yum. Á mo kí wíy koóy vitúm vidzə̀m ve ví funèn ŋkàlaʼ yee fo Gwan Sion dzəə̀n.

⁹Éè wìr veé Juda, vèn ku shaà fo mbìy, a yuŋsí, a dù duùn fó mbìy. Vèn shaa fó mbìy, a yiì moo wír wo wù fìrìn ne ŋkuuŋkùŋ. Vèn baákirì, a bó á yoʼ nò a dzə̀ meluʼ, fénkirì, a bó á yoʼ kùmrì abàr.

¹⁰NYÙY TÀR səə̀vì ne ven e mbuùné ye juŋ. Wù sə̀tí ne sí yén, ven vee aŋgàa ntum və́. Wù sə̀tí ne vifií vén, ven vee vé sii.

¹¹Á bèy, vinyo vidzə̀m ve Nyùy lo, wù ghèm ndzə ji á tiísí ví kfə̀n ne e vèn moo jí se sí dzəə̀n é ŋwàʼ, a bó yòʼ dzə̀ á yù fóo mvə̀ʼ. Kí nén a dzə moo ŋwàʼ wo wìr liìn, e fò e wìr wo wù kiìn móo yòŋ, e sùúy sho jii, «Yòŋ ŋwàʼ və̀ne, e fò e mò.» Yii bèy, ŋgaàŋ bínér jii, «Bó yòʼ dzə̀ m yù móo yòŋ, bìʼ fo á fìnèrìn ne.»

¹²Wù lòo dzə, e lì, e dù sho fo wìr wo wù yòʼ kiìn móo yòŋ, e sùúy sho jii, «Yòŋ ŋwàʼ və̀ne, e fò e mò,» bo ŋgaàŋ kù du, e bìnèr jii, «Bó m yòʼ kì móo yòŋ.»

¹³NYÙY TÀR woo Tàr wor suuy jii, «Wír vìne wiy ji á cu mo, a kù dzə̀ fó shuù, áwune ghvə́m mo a dzə̀ e shúu. Yii bèy, a melív mev mè dzə̀ a dzə̀ fó səné. Áwune cu mo kisáŋ, bìʼ fo á jumrì nsər a dzə̀ se bomen wír, a yeʼéy.

¹⁴Bìʼ bey, m kù yíi shaà fo mbìy, a yiì vinyo ve ví wáa shaà ve a dzə̀ wìr msòŋ yiì, m lóo yiì, é shuu wóví wáa ma. Kitan ke vifii kí wíy koo afií vév, é la akiíy véví yòʼ dzə́ə a kiíy jeéyjeéy fó vinyò.»

¹⁵Lòné dzə̀ wó wìr ve á mum ji á liti ntir ye á kérí fo NYÙY TÀR. Áwune ve á bin, yii vinyo a dzə̀ fó mesənér, kwaʼ ji bó yòʼ dzə̀ wìr yèn áwune, kìn ji wù kiíy kinyo ke áwune yii.

¹⁶Ven vee vé ntir vee viyúŋ, vèn kwaʼtì vinyo tsə̀ə́tsəŋ. A dzə̀ á lì nsay mbóm, a fìʼsìn wùn à wìr wo wù bóm vifá sho à? Bó yòʼ dzə̀ féyì laŋ mbóm tùn e ŋgaà mbom və ji bó yòʼ fèr wò mo. A yòʼ dzə̀ kifá ke á bomen bómén kí nyè lám e ŋgaà mbom və ji wù yòʼ kì kifá ke wù yii.

¹⁷NYÙY TÀR yòʼ yíi siìr kóv woó Lebanon ji súm é bǎm shintàm à? Wù yòʼ yíi siìr sa súm, é sí kfə́n ji kóv a?

¹⁸Wíy lòo dzə e ghan fóo fèy, wìr lóo yòŋ ŋwàʼ, é nsəərì e dzə̀m wáa yu. Mfìr e dzə̀m wíy a yen virə́ʼ, e làa yòʼ dzə́ə a ghaà virə́ʼ gháan.

¹⁹NYÙY TÀR wíy yiì, é wír ve vé‑eè nyavrì aáwuneé kfə́n, a sheʼrí, e yiì, é vé kitàne wáa yu vijuŋ, bìʼ Ŋgaà wo Ranén woó Isray.

²⁰Rúrú, á wíy sèn wír ve á taá aámóʼó kitu, yii, aá yén ŋgeʼ. Wír ve á shéʼ Nyùyi yòʼ kfə̀n wíy a dzə sho, aá kù wíy laàr wir dzə̀m wo ntaŋ və kù dzəə̀n ji wun wáa bùʼtì vinyo.

²¹Wír ve bi víne nəə e làv nsaʼ, á wàa suúy vinyo ji á bívír ámóʼó shó, du e mvə̀mlaʼ, á wàa way vitám ve wìr ve á mum ji á wáa tinén kinyo e nsànloŋ. Á lóo tàʼ ji á tínén kinyo ke alànjò é nsànloŋ, áwune wàa tinér.

²²Bìʼ bey, NYÙY TÀR wo wù‑uù bòyìrìn Abraham wáa suúy kùm wír veé Isray jii: «Rám Jakovi yòʼ dzəə́ wìy a woomé, a bó áwune yòʼ dzəə́ wìy a fàn e dzəə ye wìr kpú, e rə̀.

²³Aáwune yíi lòo yen ŋgwàʼ sév se m bomen, sí wáa kuy aáwuné mvəm, é bo á wáa ghvəm yír yém, a lèm e ránén. Á yíi a ghvəm mo woo Ŋgaà wo Ranén wo Jakov‑iì ghvə́mé, a leéy mo woo Nyùy wìr veé Isray, é shuu wóví wáa ma.

²⁴Wír ve vifií ví bvəərin ne bvəə́ríné dzəə́ wìy a ker vifií, a kiíy jeéyjeéy fó vinyò, é wír ve á fó teéy bìʼ kinyo ke á yòʼ kiìné wáa sheʼrí ji vé‑éè yéʼéy kinyo.»