Read Lamnso Aysaya 3 Bible Online

Aysaya 3 - Lamnso bible

Aysaya 3

¹Rúrú, féyì feyì, NYÙY TÀR woo Taà Ndzə, wun woo Taà Mànjòŋ sí lo, e yiì, é wír veé Jerusalem wùn à veé Judàa tátí, e lày kifá kidzə̀m ke á yoy, tiir sho. Mendzə́v mè yíi mày, é vifá ve yi vi may sá, é la kfə̀ʼ kifa yòʼ bèr.

²NYÙY TÀR yíi buúr vintav ve wíri ve á yéʼti sho, fə̀m vé rərí, aàtǎr saʼa. Bó *ŋgaà ntum Nyùy yòʼ kfə̀n wíy a dzə, a bó á yòʼ kfə̀n wíy a ker sa wír wo wù shwéŋ ŋgám, à ŋgày sé wìr si,

³aàmfòómé ve á wám vé rər kishóv mtàne, à kfə́m sé wìr si, à vé ntir ve á tír fone, à vén vé fù ve tavkíné, à wír ve á kiìn lím kiwoo, e lì wir dzə̀m woo ŋgaà si.

⁴Á bèy, NYÙY TÀR suuy ji wun yíi màʼtì, é wáa saʼ a wónlè ve á yóʼ ne kìíy fo kí binè áwune. Atǎr saʼ véví yíi a dzə a wón abór ve dzə̀ə́ anjìʼ.

⁵Wìr yíi a tay a wùmòʼ woo wír, é ŋkar wáa nyàvrì e yìmòʼ yee ŋkar, é wìr wáa nə̀ʼsì a ŋgaà və shùu lav. Wónlèé yíi lò, a kay ŋgày sé wìr, áàtànfóneèrshwíné wáa fo a sáʼ e vilìmbìy vi.

⁶Wíy lòo dzə e ghan sin, é fə̀r tá woo ŋgàywìr fo koy, a lon wun jii, «Mo à kér ndzə̀y, a vèr yòʼ kérí, á saʼ rì kfəə́ ye yí sàʼkìn ne, e mày rə̀ne.»

⁷Á bèy, é fə̀r və̀y nèn sàyín jii, «Nyaa mò, bó yòʼ yíi nàvtì mo vinyo vén mo ŋgaà ŋkuv kùv ŋkuv. Bó m yòʼ kér ndzə̀y, kìn viyíkìr mo vèn yoŋè. Bó yòʼ dzə̀ féyì vèn lì a dzə̀ mo ji kilìmbìy kén.»

⁸Rúrú, vilìmbìy veé Jerusalem wùn à veé Juda vi bàyrìn ne, e gbùkìr. Wír vìne kù sí tsə́y kóy wùn à NYÙY TÀR é vinyò ve á suuy wùn à ve á yii vi. Á kù sí tún vikuʼùy vé NYÙY TÀR túnén e kúmé.

⁹Vinyo ve áwune buʼtì vi kù din aáwuné si. Á kù buʼtì vinyo e wírí si, kù mo wír veé Sodome‑eè buʼtì e ŋgèŋgèr. Lòné kù dzə̀ wóv, a ŋgeʼ sìn si kù ghàn wó yév.

¹⁰Ké wìr ve á yúnin Nyùy, á ku sùúy aáwune á ji á yíi a ker a vishí ve juŋ vi, aáwune kù yíi sòʼ a sóŋ, bìʼ vinyo ve juŋ ve vé‑eè yii e wír ámóʼó.

¹¹Lòné dzə̀ á wó wìr ve á méŋ Nyùy. Liì kisaŋ wo áwune‑eè yiìn e wíri kù wíy kfən aáwuné kitu.

¹²Ke NYÙY TÀR suuy ki dzə̀ jii, «Wónlè ve terií lò ne, a tay wír vém, a sáʼ wìr vémé kù sí lo a dzə̀ fo vikìy. Éè wìr vem, vilìmbìy vén ví sí tuʼùr ven túʼurin, jívir ven fo vèn wáa ghan e mǒ mbòv.»

¹³NYÙY TÀR nànèn ne e lav nsaʼ ji wun wáy á nsaʼ wíri é kibàʼ. Wù nànèn ne ji wun sáʼ á nsaʼ yev.

¹⁴Wù kòʼór atǎr wòŋ wùn à vilìmbìy ve wìr və́ ví, a saʼ áwune jii, «Ven vin, vèn laàr ne súm wóm vitiír vé *vayin. Vifá ve vèn faàsìn fo aghéʼncey ví kù dzə̀ə́ e věn melav.

¹⁵Fò la ven vitaáví ji vèn wáa nyàvrì e wír vémé, a dòm áwune, aá wáa fə̀m vitú e kibvə̀r, é vèn wáa nyèŋrì. Súŋnin mo woo NYÙY TÀR woo Taà Mànjòŋ, wo m sáʼ kifá kidzə̀m.»

¹⁶NYÙY TÀR suuy jii, «Vikìy veé Jerusaleme kóʼor wún é ŋàŋ. Á kù ghán e kilòŋ kí yuv, kív sí, e bó a leéy wír sho, shóʼ kiwuú, tiir e kímóʼ kí kitu, kù ji lùmèn yén, ghán, a visháráŋ vé sùsù ve á səŋrin é wuù ví sháʼá.

¹⁷Bìʼ bey, m kù wíy yiì, é mesítír mè sə́ kitú ke vikìy veé Jerusalem, e yiì, aá shóʼtí ndzə̀y sév, aáwune wáa ghan e woŋé é ndzə.»

¹⁸Kí dzə̀ jii, ghán see shooy si wíy gheén, é NYÙY TÀR faasi kifá kév ke juŋ keé kilùm kidzə̀m. Wù wíy faàsì mfuy se áwune wáy e wuù, e faàsì vikátáʼ, à vifá ve sùsù ve á wáy e kilòŋ ví.

¹⁹Wù wíy kweèy ayèreŋ fo áwuné vitùʼùr, e faàsì mfuy se áwune wáy e koy, à ndzə̀y se á sə́ti sí sho si.

²⁰Wun woo NYÙY TÀR wíy shoʼtí tán se ndzəmén sí fo áwuné kitu, à visáʼ ve á səənè e koy vi. Wù wíy tiiné vikuúví fo áwuné mentìntìn, e tatí aŋkùv vév virə̀ʼtìn ve bìʼ, e kuúy kuuyín, wùn à shív se áwune ghán sho e wùn sí.

²¹Wù wíy kweèy andzə̀ŋgwáŋ ve á wayrin é wo, à ve á tòʼtìn yúy e wàyrí shoo,

²²e kweèy ndzə̀y sév see jeéy sí, à vikúm vév ve da vi, à vee fó yuv ví, à vibam veé wo vi,

²³e lì ndzə̀y sév se sí yénsinè, à se á baan e làv woo fèm si, à see ndzə́m é kitu si, e bóo lì se áwune lo, á sə̀tí sí sho.

²⁴Kimaysì kév kí wíy a dzə̀ jii, kirəm ke bìʼ ye rəʼtìn kí yòʼ dzəə́ wìy a koʼ fo áwuné wùn. Kù sí wìy a koʼ kishaŋ moo ké kimfòy ke kifa. Áwune yòʼ dzəə́ wìy a ker vikuúví vé a kur ndzə̀y shó. Á kù sí wìy a kur a dzə̀ áàkfə̀ə́. Vitú ve vé‑eè rə́si náŋsin vi lo, e feesí vidzə̀m. Ndzə̀y se juŋ se vé‑eè rə́si maʼà, á sí lò, a màʼ a dzə̀ vinsàʼ. Kee vijuŋ ve wùn ve áwune‑eè rə́si kérí, lèn, wú sí lo, e ŋòv e dzə̀m, aáwune wáa woomé.

²⁵Á wíy yuyrí vilum veé Jerusalem adzə̀m. Fə̀m vé rər ve á ghaamen ne, aá yúyrí yuyrín é shùu rər.

²⁶Wír veé Jerusaleme wíy a toŋnín, a dìy. Á wíy a dìy, a sesín e kibvə̀r mo ŋkàlaʼ yev kfənen ne e vifə̀m.