Read Lamnso Aysaya 30 Bible Online

Aysaya 30 - Lamnso bible

Aysaya 30

¹NYÙY TÀR suuy jii, «Lòné dzə̀ wó wìr ve á tsə́y kóy vèr áwune. Áwune bá antaŋ a dzə̀ vév, bó yòʼ dzə̀ vém, gwar *mensaŋ wùn à wíri, a bó yòʼ dzə̀ mo m sìysìn. Á bèy, á nen kù a jay jay e wùmǒʼ kitu.

²Lòné dzə̀ wó wìr ve á sə́y e Ejiv, a bó á yòʼ mbaa mo ji á sə́ ntir. Áwune taʼ ji bo fòn woó Ejiv kì kiŋsìn áwune, é Ejiv wáa dzə kikfə́vsì kév.

³Yii bèy, kiŋsìn ye vèn kwaʼ ji fòn wov yíi kìŋsìn vené yíi bìnkìr e nshoórmé, é kikfə́vsì kén kee Ejiv ki maʼ ven máʼan.

⁴Fə̀m mo vitú vén vé saʼ vi duùn ne, e dù bàʼ e Tsoan, vé ntum véné tósín, e dù mèé e Hanes,

⁵bo, ven vee wír veé Juda adzə̀me wíy shoór a dzə̀ kitú. Vèn wíy shoór, bìʼ fo vèn wayin vifií é kitum, a bó yòʼ dzə̀ kí sə̀ ven. Kitúm, a bó noshìndzə̀v yòʼ dzə̀, e shaà ji kí yii, é vèn wáa woomé, e kfən ji wír ve wíri sí taʼ kinyè kév ntéŋ.»

⁶Ntum Nyùy yee kùm nyám seé Negev rə̀ne. Wìr shaa e Negev, wù kù yèn a dzə̀ ŋgeʼ, a ghan, a fàn. Dzə̀ kirə́ʼ, a kù dzə̀ fo abvərə̀ʼə́ dzəə̀n, kìn dzə̀ woo lumèn, kìn woo wiíy, a kù dzə̀ sá fo vifíy wùn à yó se ndzəʼ símóʼ sí dzə̀kìn. Vé ntum veé Judàa béʼ bùʼ e vitu ve vimbèʼbìy, kù shaa dzə́ə a dzə̀ fó fo, wiy e vifá vév veé kilùm vi aàkamerí ndzə̀m, du ji á shwí wíri shó, a bó yòʼ fə̀m dzə̀ ve dzə̀ á sə̀ áwune.

⁷Kinyèmbàmsìbaà kí yòʼ dzə̀ e Ejiv. Ntom ye áwune fó yòʼ kér mvə́m, á nsàv ye m yoŋ áwune ji kigàgǎʼsòŋ ke kí beéme a dzə̀ fó si.

⁸NYÙY TÀR wáa suúy e mò woo Aysaya jii, «Ké lèn ki, dù, e yèn wír vìyi, e sàŋ vinyo ve m yooyin ví é kiwàŋ ke tiy, aáwune yéné. Sáŋ sá e vàv ŋwàʼ ye dzə̀ á kaàrí. Ku sàŋ, e lèm, é kí wáa dzə fo ji kisəəm ke kí gòʼòn kàŋ mòʼón.»

⁹Rúrú, áwune dzə̀ wír ve á tsə́y kóy wùn à Nyùy, áwune adzə̀me kù dzə̀ aŋgàa kimboʼtì, ŋwáy yéʼéy se NYÙY TÀR ŋwáyín.

¹⁰Áwune lo, á wàa kàntì vé sii jii, «Lá vèn dzə́ə a yen vinyo, a suúy.» Á lo, á wàa suúy aàŋgàa ntum Nyùyi jii, «Vèn yén vinyo, mo ví fə̀m dzəə̀n rú, lá vèn dzə́ə a suúy e vèr. Vèn kú a fèr vinyo e vèr a dzə̀ ve vèr koŋ a yu, a fèr vinyo, a dzə̀ ve vèr kér shií shó.

¹¹Vèn bin ndzə̀m é kinyò ke vèn wayin ji á yii. Vèn maʼti dzə́ə ye vèn yii vinyo sho. Lá vèn yòʼ dzə́ə a lì vinyo ve Ŋgaà wo Ranén woó Isray, a ghiʼ ver shó.»

¹²Bìʼ bey, NYÙY TÀR woo Ŋgaà wo Ranén woó Isray nén a suúy jii: «Vèn tèn ne kinyo ke m suuyì, e wày vifií a dzə̀ é nə̀ʼsì wùn ǎ dzəə sé kisaŋ símóʼ sí, e kù a yeʼtí a dzə̀ é vinyò fèn.

¹³Ké ru kí, kinyo ke bi ke vèn yii kìn ki kù yíi màʼ ven máʼan. Vèn sì moo kirə́v ké lav ke kí kaʼamen, e yèʼém, e fəə̀ é ndzə, bér gbu, a kí kù sí lo, e sàsìn, e keèsì lèn lèn.

¹⁴Kí wíy keèsì, kù moo ji bvə̀ʼə́m ntòn mbóm, wo wù lo, wù bvə̀ʼə́y, a bó yòʼ dzə̀ á kfə̀n bòŋ kifá fo fo, kìn dzə̀ ke dzə̀ á fə̀ə́r káy və̀y shó fo kiy, kìn ji á sér mendzə́v shó fo ntòn.»

¹⁵Ke NYÙY TÀR woo Tàr wor, wun woo Ŋgaà wo Ranén woó Isray suuy ki dzə̀ jii: «A vèn kfə̀n fo mǒ wùn, e dzə̀ʼə̀m ji nyaáŋ, bo m yíi bòyìr ven. A vèn neèm e mǒ sar, e yèʼtí e mǒ wùn, bo m yíi tavír ven. Yii bèy, a bó vèn yòʼ fə̀m taʼ, e yiì bèy.

¹⁶Vèn kwaʼ feyì ji ábáy, vèn yíi koʼ nyám sén sé ŋkoʼ, e leʼ, a m suuy kém jii, eè, bo vèn kér fó yìi leʼ. Vèn‑eè kwaʼ sa feyì ji vèn yíi dzə̀v nyám, é sí wáa fer virə́ʼ férín. Ke m suuy ki dzə̀ jii, wír ve á jum vené yíi tav e kileʼ, e shaà ven.

¹⁷Ŋgaà won vibàn wíy tiím e mòʼón, e taʼár ven wír nsə̀kì, áwune tiim atàn, é vèn sám wír adzə̀m. Kimaysì kí dzə̀ jii, vèn wíy a leʼ, aá bér ne ashàr, é ku gòʼ shicícíwàr, a tiy e kitu ke gwan.»

¹⁸Ké NYÙY TÀR, wù diy kfə́ féyì ji wun kú a yiì vinyo ve juŋ vi e vèn, diy feyì ji wun kú a sham ven. NYÙY TÀR kù dzə̀ Nyùy wo wù lo, wù tìír vinyo və́ vidzə̀m, ví wàa ghan tìítiy. Bòŋ ké wìr dzə̀m wo wù yoy, tiir a dzə̀ é wùn wó.

¹⁹Rúrú, wír veé Sion, ven ve vèn dzə́ e Jerusalem, vèn yòʼ kfə̀n dzəə́ wìy a dìy. Vèn wíy lòo toŋ e NYÙY TÀR, é wù ku nèn yù tóŋ yén, e shàm ven. Wù yú tóŋ yén, é wù ku nèn sə̀ ven.

²⁰Fə̀m mo NYÙY TÀR yiìn ne, vinyo vi wáa ghaʼ ven, e màʼ ŋgeʼ e vèn, wáa dzə mo sì vén vee viyíkìr, wù kù dzə̀ Ŋgaà Dùŋrì won, a bó wù yòʼ dzəə́ wìy lìtì kitú kfə́ fo vèn. Vèn kù wíy a yen e sí yéné mo wù danèr ven.

²¹Vèn yíi lòo dù e dzəə, lo ji á bin e koy yìyí, kìn e wó ŋkoòvìi, é ven yú jí rə fó bàm, a yì suuy jii, «Dzəə̀ yee réŋ rə̀ne, vèn bin shó.»

²²Kù é ghan fóo fèy, é vèn nèn a kuúy mebvə̀m men medzə̀m, me á shèŋrìn e *kisha ke mbàm ke fəvír kí, kìn e ke baar kí, a màʼày moo vifá ve ví kóʼoyì, a yen feyì ji vifá ve lom vi.

²³Á bèy, é NYÙY TÀR tsə́nsí sá wuú, é ŋgoòy se vifa se vèn wayin sí fəə́, é vifá ve nsay fəər vi faŋkir, e kfə̀n a dzə nyanyày. Wíy lòo dzə e ghan fóo fèy, é nyám sén sí wáa bun bunén é mvə̀m yi.

²⁴Ambòŋ wùn à vimbèʼbìy ve ví lim súm wón ví wíy a yi vifá, a dzə̀ ve juŋ vi ve ŋgaà lìm tayin, e shìy, a fo sho.

²⁵Á wíy lòo yuyrí aŋgàa vibàn vén é mfòn, lóo sàʼtì virə́ʼ vév ve tavkín ví, é woŋ wóné wáa rə̀sìn, a ndzə́v sí wíy a leŋ fo virùmèn, a leŋ fo agwan ve darkìné.

²⁶Á bèy, rán ye yí lo fo ŋwee wíy a ran réŋréŋ moo ye yí lo fo shùy, é shùy wáa ban, é virə́ʼ ví wáa ran kàŋ saàmbà, e shaà mo ví yii ráné, kù moo ji á tàtí rán shùy yee kishiíy saàmbà kishiíy kimòʼón. Kin ki wíy a koóy, a dzə̀ é ghan se NYÙY TÀR wíy a kur vileémé vé wìr və́, ve wù‑uù lemerin, a kuv.

²⁷Vèn leéy, NYÙY TÀR və̀sə kwaʼda, a wù wiyì. Dòʼshwíiy və shwí moo və́y, a kikfə́m ke kindzəʼ ki dzəm, kóʼó. Kisúŋnìn kfə́ kí kù sì nyár nyár, a kinyo ke kí fəə́ fo wun shuù ki ton virə́ʼ é njà və̀y.

²⁸Kiyoy kfə́ kí meé fo shuù moo ndzə́v ye yí runen, a meé e wìr kilòŋ. Wù siy vitúm ji wun laar, kù mo wìr sìy kifá, e laàr mvə́y, a wù yíi way áwune é kfəə̀, a sə̀ŋ, a dù sho e kisəə.

²⁹Fo kén kí, vèn wíy a yòv luŋ, kù mo vèn yii yov vitsə́ʼə́ ve vèn yí ŋkàʼ woo bìʼ Nyùy. Vèn wíy a yu vijuŋ, kù moó ghan se vèn kum vifá, tóŋ loŋ, kóʼ e NYÙY TǍR gwan, wun woo Kilán ke kí kiŋsìn Isray.

³⁰NYÙY TÀR wíy yiì, é wíri yú jí rə mo yì súŋnin kitávín, e yiì, aá yén mo wù maʼ ŋgeʼ, kù moo ji wù nàn ne kóy və́, a səʼə́r e wírí kitu. Dòʼshwiíy wíy a kiv wun kívín, a wù wíy laàr virə́ʼ mo laàr və́y, kìn wuú ye yí ló, kúŋ virə́ʼ, kìn kinsəm, e bóo lì mentíy.

³¹Wír veé Assiriyàa wíy yu jí NYÙY TÀR, a wù sí taáme ji wun lo, e wuŋ áwune e ŋkoó, é wúné wáa beemé áwune beémén.

³²NYÙY TÀR wíy lòo dzə̀v áwune ji wun maʼ ŋgeʼlàʼ, a dzə̀v wír, aá wáa kùm nshùm wùn à lúŋé, é kiléŋléŋ kí kú a dù moo ké kindzə̀v. Á mo NYÙY TÀR wíy nàn kóy və́ wo tavíné ji wun funen áwune shó.

³³Rúrú, e kèʼ fo yàŋgùʼ, NYÙY TÀR‑iì bàʼtí ne kirə́ʼ kee fo á wíy tòn dzə́n fòn. Wù tùŋ ne kíy, wú fáŋ, e kfə̀n shoò, e fiì meŋkaʼ sho, və́yí wáa shwi, a bò. Kiyoy ke NYÙY TÀR kí dzə̀ moo kiliímé ke və̀y, a kí wíy sə̀ʼ meŋkaʼ mèn, é mè wáa shwi.