Read Lamnso Aysaya 31 Bible Online

Aysaya 31 - Lamnso bible

Aysaya 31

¹Lòné dzə̀ wó wìr ve á sə́y e Ejiv ji wír vee fóo sə́ áwune. Lòné dzə̀ wóv mo á yoy, tiir a dzə̀ e nyám se ŋkoʼ see fó sí wùn, yoy, tiir a dzə̀ é *vitentén vé rər, bìʼ fo ví tsəətìn tsəə̀tìn, tiir vifií a dzə̀ e vé rər vee fóo wùn, bìʼ fo á dzəə̀n é mfòn. Áwune yòʼ kfə̀n dzəə́ yéʼti e Ŋgaà wo Ranén woó Isray wùn, a bó á yòʼ kfə̀n dzəə́ diy ji wun woo NYÙY TÀR wáa dànèr áwune.

²NYÙY TÀR dzə̀ kfə́, a wù fìír e ŋàŋ, a dzə̀ kù màʼ wun ŋgeʼ e wírí kitu, a bó yòʼ dzə̀ wù yàʼáy jí rə. A wìr yii vinyo ve bi ví, bo wùn wun kù‑úù yú, kìn dzə̀ wír wo wù tóm ambùʼtìvìnyò.

³Wír veé Ejivi kù dzə̀ cáʼ ji wir msòŋ, bó á yòʼ dzə̀ Nyùy. Nyám se ŋkoʼ sév se á maʼ rə́r shó si kù dzə̀ cáʼ ji nyám bèn, a bó yòʼ dzə̀ anyùy. NYÙY TÀR wíy nàn kiwó ji wun maʼ ŋgeʼ sho e wírí kitu, é wù tátí wír wo á səən wùn ŋgaà wo wù sə́ wun, e màʼ e nsay, e màʼ bèn, e laàr laàrìn.

⁴Kinyo ke NYÙY TÀR suuyin e mò kí dzə̀ jii: «Bvərə̀ʼ yii koó nyám, wù wàa taa e kitu wo, a nyàmkìr. Agàyi fə́m wiy e ŋgoo ji á ghíʼ wun, bo bó yòʼ dzə̀ wù wàa kom mban aáwuné kiyòr. Aáwune fə̀m rəə́me e le, bo bó yòʼ dzə̀ wù wàa fàn. Dzə̀ sá réŋréŋ mo bó yòʼ dzə̀ kifá ki tèér NYÙY TÀR, wun woo Taà Mànjòŋ, fo wù sə́y é Gwan Sion, e lòvtí aàŋgaà və́ vibàné, e fùnèn áwune é gwan foo fèy.

⁵Mo menə́n mè yii féŋ, kár aáwuné kitu ke laʼ, bo kù dzə̀ sá réŋréŋ mo NYÙY TÀR woo Taà Mànjòŋ wíy a kìŋsìn Jerusalem. Wù wíy a kìŋsìn fó, a sə fó, fo á laar. Wù wíy kìm ŋkàlaʼ, fo ŋgeʼ nəə́ áwune.»

⁶Éè wìr veé Isray, vèn ku bìnkìr, e kfə̀n e NYÙY TǍR wùn, wun wo vèn tunen sáʼ rə́ é dzəə̀ kisaŋ.

⁷Vèn wíy kfən, é wìr mòʼón mòʼón maʼay mebvə̀m me vèn‑eè fèrìn e wó yéné, kìn á fèr e *kisha ke mbàm ke fəvír kí, kìn e ke baar kí. Vèn‑eè fer bèy, aá jáy a dzə̀ kinyo feyì.

⁸NYÙY TÀR suuy jii: «Á wíy gwàtì wír veé Assiriya e nyùy rə̀r, nyùy, a bó yòʼ dzə̀ fèr wir msòŋ. Nyùy wíy a gwàtì áwune, a bó á yòʼ yén ŋgaà ghar. Vé rər veé Assiriyàa wíy a mùm ji á baʼar nyùy rə̀r rə̀n, yii bèy, á wíy koorí vé rər vév, e siìr ji akwàn.

⁹Vé rər veé Assiriyàa dzə̀ ji tíy, yii bèy, a fáne wíy sùm áwune, aá lón kiwuú fo nshàá. Wúmé wíy kpu fo vilìmbìy vév ví bvə̀m, aá nyéŋ, e màʼày cícíwàr e shùu rər.» Suuy NYÙY TÀR vinyo vìn, wun wo wù dzə́ e Sion, din kitú kfə́ é njà və̀y, dzə́ e Jerusalem, din kitú kfə́ é və̀y wo wú bo.