Read Lamnso Aysaya 33 Bible Online

Aysaya 33 - Lamnso bible

Aysaya 33

¹Lòné dzə̀ wón, ven ve vèn laar wíri, aá yòʼ‑oò ghàn ne laàr ven. Lòné dzə̀ wón, ven ve vèn kár menàŋ e wírí bàm, aá yòʼ‑oò ghàn ne kàr e věn bàm. Vèn yíi laàr, kén kí mayì, aá laar sá ven. Vèn yíi kar, méen mè mayì, aá fiine sá ven.

²Éè NYÙY TÀR, kii wò, ku shàm ver. Vèr kù sí leey a dzə̀ wò. Kishiíy ké ndzə kidzə̀m, kú a dzə kóy wór wo tavíné, ŋgeʼ si lóo koóy ver, à kù sə̀ ver.

³Wíri yú mo jì yè wámkirì, á wàa leʼkír. À ŋáʼay, din vikuʼùy vé, vitúm vi bvəə̀rí,

⁴wír vée wàa kuúy vifá vév, kù mo ŋguùmé sí sòóy vav se vici. Á wàa gbù kintáŋ é kitu ke vifa fèn réŋréŋ mo ŋguùmé sí gbù e kitu ke yi.

⁵NYÙY TÀR dzə̀ e gháʼtín, a wù dzə́ kfə́ é yuv. Wù kù wíy lèm Sion, aá wáa tinén vinyo fo e nsànloŋ, a yiì vinyo vee réŋ ví fó.

⁶Mo vèn wíy a dzə e Sion, NYÙY TÀR kù wíy a dzə kikfə́vsì kén. Wù kù wíy a sə ven, e dù, e jòʼsì, a bùʼ ven e vifií ve ru ví wùn à kiíyi. Rúrú, ghvə́m ye Sion ghvə́m NYÙY TÀRí dzə̀ bùʼ wov wo ghaʼán.

⁷Á leéy, e yèn, antav veé Sione bèʼèy ne wó e kitu, a toŋ e mentàrnín. Vé ntume lòn ne nyaáŋ ntéŋ, a dìy, a jeetí.

⁸Dzə́ə sí kù sí tíynin kisáŋ, a wìr yòʼ kfə̀n mum ji wun shaa shó. Wíri yòʼ kfə̀n dzəə́ tíy aàŋkàʼmé ve áwune‑eè kàʼàn, nyaysì wír ve vé‑eè tiimen vinjen nyáysin, a bó wìr yòʼ kfə̀n dzəə́ yén wír, a síi rúné.

⁹Nsay kù sí diy moo wír wo wù dìyìn kpú, vitaáví ví máy. Vicí vé *sidar veé Lebanon vi yùm ne, a tiy moo wír wo wù bùʼùn kinyo, a woomé. Nsay ye borín yee Sharon sì ji wóʼ lèn, vicí veé Bashan wùn à veé Gwan Karmel vi sòóy ne vidzə̀m.

¹⁰NYÙY TÀR suuy jii: «Ké lèn ki, m yíi ŋaʼáy, e yiì kinyo. M yíi lò, e dìn lèn ji m dzə̀ e gháʼtín. M yíi lò lèn, e koʼór yír yém.

¹¹Antaŋ ve vèn báa kù dzə̀ ji mvə́y, a vinyo vidzə̀m ve vèn yii vi dzə̀ ji vishaárín veé sum. Kiyoy ke kí fəə́ fo věn shuù ki kù dzə̀ ji və́y, a wú kù yíi tòn ven tónen.

¹²Vèn wíy shwi, e rèŋ moo vighvə́r ve ví shwiin, á wáa fèr shiŋgíy shó. Vèn wíy shwi moo tám se vici vé njoŋ se á gwàrìn, e wày və́y shó.»

¹³Ven ve á dzəə̀n é ndzəywoŋ, vèn kiíy kinyo ke m yiìn kí. Ven ve á dzəə̀n fó mentsə̀m, vèn bínsí viŋgaʼnìn ve vinyò ve m yiìn ví.

¹⁴Á bèy, wír ve á jáy vinyo e Sione kù sí dzə́ fan fan, a ve á méŋ Nyùyi kù sí yaʼ yàʼàn. Á gháynin jii, «Wìr fo vèsən wo a dzə̀ wù gòʼ wùn NYÙY TÀR dzə̀ la? NYÙY TÀR, a wù din kitú kfə́ é njà və̀y wo wú koóme virə́ʼ.»

¹⁵Kù dzə̀ kfə́ə wìr wo wù yúnin Nyùy, ghán e wun mbòv, suuy kinyo a dzə̀ ke ru kí. Wír, a wù ŋwáy seʼ mbóʼmé ŋwayín, tén fó a sə kòyàr. Ŋgaàŋ yòʼ kóŋ yu kinyo kee ji á yúyrí wír, kù fə́ti wó rə́ fətín fó kinyò ke bi kí.

¹⁶Kfə́ə wìr vee béne kù wíy a dzə akiŋsìn, a dzə ji nyaáŋ moo wír wo wù lìrìn é kirə̀ʼ ke tavín kí, é mvə̀m vilála. Á wíy a fo viyíkìr vév foón, a tu mendzə́v mev tuún, é bo á wáa no.

¹⁷Vèn wíy yen fon e sí yéné, a wù wiy, din viwìr və́, e kfə̀n yen nsay mo yì néŋ bèn ji moòr, e dù, e meé e ndzəywoŋ.

¹⁸Vèn wíy a kuumé mo vé‑eè rə́si yii vinyo ve ví wáa bemér ven. Vèn wíy a dzətí jii, «Wìr wo wù sov vifá, táŋé, bèé? Wìr wo wù fiʼ nshwì bèé kfə́? Wìr kfə̀n dzə̀ shó wo wù shwéʼ virə́ʼ, táŋ virə́ʼ vér ve tavkín ví á?»

¹⁹Vèn yòʼ dzəə́ wìy a yen wír ve dzəə̀n vé kigùynìne é si. Wír, aá súŋnin lám wo səné, a bó vèn yòʼ yú. Wìr lo, wù wàa suŋnín mo wù bév a dzə̀ kimbev, la vèn yòʼ fə̀m a yu nsàv.

²⁰Vèn leéy ri Sion, e yèn, ŋkàlaʼ yee fo vèsən yii du ŋkàʼ. Vèn wíy a yen Jerusalem moo kirə́ʼ kee nyaáŋ. Jerusalem wíy a dzə moo kibàn ke á tamen, ke bó yòʼ dzə̀ kifá ki sàʼ. Kibàn, a bó yòʼ dzə̀, á shòʼ vicí ve á tamen shó, a bó yòʼ dzə̀ á yù fóo tiiné akfəə̀ ve á sə̀ŋrìn shó.

²¹Rúrú, NYÙY TÀR wíy a dzə e Sion, é vèsən wáa yu vijuŋ ve vikùʼùy və́. Wù wíy a dzə moo kirə́ʼ kee fo ndzə́v se kuʼkìn wùn à se terí sí léŋé. Yii bèy, a bó yòʼ dzə̀ màkìkoŋ woo wo rə̀r shaà shó, a fə̀m dzə̀ kikóŋ ke á yii kiy kìyìn.

²²Rúrú, kù dzə̀ NYÙY TÀR wo wù kwaŋrì vinyo vesən. Dzə̀ wun ŋgaà saʼ wòsən, a dzə̀ fon wòsən, a wù kù wíy a sə vèsən fó ŋgeʼ sidzə̀m.

²³Ven vee wír veé Juda, ké lèn ki, á bvə̀tì ne akfəə̀ vén, kicí ké cícíwàr ke vé‑eè kurin shó ki səʼsì, a bó cícíwàri yòʼ kfə̀n dzəə́ lév sho.[62] Yii bèy, vèn kù wíy jàv vifá ve á faàsìn fó kwaʼ rər, a fə̀m dzə̀ antèŋ, bo á kù wíy a ker yéev yee mbìv.

²⁴Wìr woó Juda e mòʼón yòʼ kfə̀n wíy a kàn ndzə jii, «M və̀ne, a m dzə̀ é nsòv,» bìʼ fo á wíy tsə̀ʼ ŋgeʼlàʼ fo wìr dzə̀m wo wù dzə́ fo kitu.