Read Lamnso Aysaya 35 Bible Online

Aysaya 35 - Lamnso bible

Aysaya 35

¹Wóʼó wíy a yu vijuŋ, é nsay ye yì yúm yumén wáa yu sa. Nsay ŋgaŋ wíy a sàvnìn, é vikwiíy ví wáa kuy fo, a bòʼrì.

²Vibuushì ví wíy saàm fo kijuŋ, é kishéʼrì ke ghaʼán kí gbu, é yòv wáa koʼ. NYÙY TÀR wíy yiì, é vifá vi teʼ, e rə̀ŋsìn e woʼ moo kóv woó Lebanon, e yiì, é nsay yee fó bór moo yeé Gwan Karmel, e bor moo Mboʼ Sharon. Wíri wíy a yen vikuʼùy vé NYÙY TÀR, a yen mo Nyùy wòsən dzəə̀n e gháʼtín.

³Ven ve á sí weʼèr wó, vèn ku wày ŋàŋ. Ven ve shwín sí sí shwáʼsin shwàʼsín, vèn tiím e věn shwin.

⁴Vèn suúy e wír ve á kù sí kér melív a dzə̀ é woo jii, «Vèn tiím kitávín, lá vèn yòʼ a fàn kifá. Vèn yén ri, Nyùy wòsən sí wiyì. Wù wiy ji wun kwaŋ vinyo vén vee ŋkfə́né, wiy ji wun siir ŋkfə́tír e wír ve á nəʼsì vené. Wúnwun kitú kfə́ wíy wìy, e bòyìr ven.»

⁵Á bèy, áàmfìri ku nèn a yen virə́ʼ, áànsəərìi wáa yu vinyo.

⁶Aŋkivkìri wíy a liynín moo njà, é vindzə̀mer vi wáa yòv e kishéʼrì ki. Rúrú, Nyùy wíy yiì, é nsay shaʼam é woʼ, é mendzə́v mè wáa mee fo fo, é ndzə́v sí wáa leŋ leŋén é nsay ye yumér.

⁷Kirə́ʼ ke kibvər ki tonnìn sho ki wíy kfən e visə̀m vé ndzəv, é ntòŋ sé ndzəv sí wáa meekír, a sə̀v nsay ye yì kaʼkin. Virə́ʼ ve akoosàʼa‑aà rə́si fo vi wíy kfən e vishàʼshaʼ, é ŋkiʼ wùn à joò wáa kuy fo.

⁸Á wíy waʼ kimà ké dzəə fó wáʼán. Dzə́ə, aá wíy a yòŋ ji dzə́ə ye yì du fo NYÙY TÀR dzəə̀n. Wìr dzə̀m wo wù kér *kifàn yòʼ wíy tiír kiwuú kfə́ é dzəə fen. Kù jòʼsì wír Nyùy ve á wíy a shaà sho. A wìr fə̀m dzə̀ kiyúŋ moó le, bo bó yòʼ dzə̀ wù wìy jày dzə́ə.

⁹Dzəə̀ rə̀n dzə̀, a bó yòʼ dzə̀ bvərə̀ʼ wìy bàv fo, a bó yòʼ dzə̀ nyàm ye beemén yìmòʼ wìy shaà fo. Kù jòʼ wír ve NYÙY TÀR bòyìrìn ve á wíy a shaà e dzəə fen.

¹⁰Wír ve NYÙY TÀR tinen fó vikwàné wíy a kfənkír e bàm. Á wíy a kfənkír, a nəə́ Sion e yòv e shuù, a vijuŋ vee là may vi wíy a dzə aáwuné wùn. Áwune kù sí wìy a ker a dzə̀ kishéʼrì, a yu vijuŋ. Mendzən mè wíy tin kiwuú fo áwuné bàm, é shwéme búŋ fo áwuné shuù.