Read Lamnso Aysaya 36 Bible Online

Aysaya 36 - Lamnso bible

Aysaya 36

¹Wáa dzə, a sì ji kiyá nshòv sikweè e ghvə̀m mo Fòn Hesekiya‑aà saʼan ne, Fòn Sennakeriv woo fon woó Assiriya nəə́ rə́r é ŋkà se laʼ se bomén seé Juda, e tòn fó.

²Fòn woó Assiriya lò, e tsə̀nsí mfòóme rə̀r və wùn à vé rərí agháʼán fó Lakish ji á du á e Jerusalem, e nə̀ə́ a Fòn Hesekiya e rə́r sí. Wùn áwune dù, e mèé fo, e tìím e nshwǎn ndzəv wo wú sə́y fo kisə̀m kee fó kùy, a wú dzə̀ é ghaa dzəə ye yì du e kirə̀ʼ kee fo á yii su ndzə̀y.

³Á bèy, Eliakim woo wan Hilkia wo yì‑iì dzəə̀n kitú ke atǎr ntoʼ, wùn à Shebna woo ŋgaà saŋ woó ntoʼ, à Joa woo wan Asav wo wù‑uù fiʼtì sáʼ fòn nèn fəə̀ ji wùn à mfòómé wàá tárnín.

⁴Mfòómé dù, e sùúy aáwune vee atǎr saʼ veé Juda vìne jii, «Kii vèn, vèn ku dù, e tiìsí e Hesekiya ji fòn wo wiy woo fon woó Assiriya dzə́r a jii, ‹Hesekiya, à tìír vifií vé a dzə̀ feé, e bó a kwàʼ ji dzə̀ à tàm wòsò?

⁵À kwaʼ ji shuu wo kumèné dzə̀ vifií a? Wú dzə̀ vitaáví ve dzə̀ ví màʼ rə́r a? À yèʼtí a dzə̀ e lá wùn, bó a tav kitú wòsò?

⁶Kí à yèʼtí a dzə̀ e Ejiv wùn. Ejiv kù dzə̀ kinsàn ke mbàŋ ke a wìr yèʼtí sho, kí sòv kiwó kfə́. Á kinyo ke dzə̀ kí kòóy wír wo wù yéʼti a dzə̀ e Farao woo fon woó Ejiv wùn.

⁷Aà lò, a suúy e mò ji vèn tíy a dzə̀ e NYÙY TÀR woo Nyùy wón wùn, bo nyùy və̀n yòʼ dzə̀ wun wo wówò woo Hesekiya‑aà kètìn virə́ʼ və́ vé cù wùn à kíy sə́ sé cù si a? Wò‑oò ketì, suuy e wír veé Juda wùn à veé Jerusaleme ji á kù kér a fó a cù Nyùy cáʼcáʼ a dzə̀ é mbìy kiy cù woo fen.› »

⁸Mfòómé nen kfə̀n a suúy e wír Hesekiyàa jii, «Hesekiya ku yù á mum ye tàr wor woo fon woó Assiriya táʼ mùm wun sho. Kí dzə̀ jii, tàr wor lo, e fo wun a nyám se ŋkoʼ ansə̀kì abaà, a wù fèy kér vé koʼo.

⁹Ŋwàay, bó yòʼ dzə̀ Hesekiya fə̀m tàm wùn à shimfòómé shé tàr wor lìm shi gheéy. Mentàsìn mè dzə̀ ka e wun, a wù yéʼti a dzə̀ e Ejiv wùn ji wun fiʼ kòóy *viténtén vé rər wùn à vé koʼo?

¹⁰Tàr wor yoŋ e Hesekiya ji wù sà kwaʼtì ji wun wìy, a laàr woŋ və̀n bèn, a NYÙY TÀR yòʼ kì fó fo a? Kù sùúy a wun woo NYÙY TÀR e tàr wor lìm ji wù nəə́ á rə́r, e laàr woŋ və̀n.»

¹¹Eliakim wùn à Shebna, à Joa suúy e mfòómé woó Assiriya jii, «Kii wò, á suŋnín aàŋgàa lìm vée, a dzə̀ é Lǎm Aramayik, vèr yú lám woo shooy. Lá à yòʼ a suŋnín e vèr é Lǎm Hibru, fo wír ve á dzə́ e kitu ke kày yeé ŋkàlaʼa wáa yu.»

¹²Yii bèy, mfòómé bìnèr aáwune jii, «Vèn kwaʼ ji fòn tùm mo ji m tiísí ntum rə̀n a dzə̀ e vèn à fòn won cáʼcáʼ à? M súŋnin sa e wír ve á dzə́ e kitu ke kàyi. Áwune dzə̀ ben, aá kù yíi a yi sa jáŋ yév, a no mejiiyì mev moo ven.»

¹³Á bèy, mfòómé nèn tùm é yuv, e jàŋ kitávín é Lǎm Hibru jii, «Vèn yuúrí kinyo ke fòn wo wiy wo dzəə̀n fon woó Assiriya suuy e vèn kí.

¹⁴Fòn suuy jii, ‹Vèn wáa yen fo Hesekiya bóʼtí ven. Yòʼ dzə̀ Hesekiya, wù fə̀ə́r ven fo mǒ kiwo.

¹⁵Lá vèn yòʼ biìmé, é Hesekiya bóʼtí ven. Wù táv ji NYÙY TÀR kù yíi teʼtín a vèn áwune, a wù yòʼ yíi biimé a ji ŋkàlaʼ rə̀n nəə́ e fòn woó Assiriya kiwo.

¹⁶Lá vèn yòʼ a yuurí kinyo ke Hesekiya.› «Fòn woó Assiriya suuy jii, ‹Vèn fəə́ á fo ŋkàlaʼ, e gbù wun, é wìr mòʼón mòʼón nèn a dzə ji nyaáŋ e wun laʼ, a kfər báŋ se sí loòn fo wun kitiír ké *vayin, a kfər sa *fig wo wù kù lo a dzə̀ fo ŋgaàŋ kici, e kfə̀n a no mendzə́v, a kù dzə̀ fo wun ndzəv ye tuŋéné.

¹⁷Vèn kù wíy a dzə bèy, e dù, e meé mo wun waà wíy wìy, e lì ven, e dù sho e nsay ye yì dzəə̀n moo yéen. Nsay, a dzə̀ ye vifá ve yi vi kúy sho, a súm sé vitiír vé vayin si néŋ fo néŋén. Dzə̀ nsay vifa ve yi, a kfə̀n dzə̀ ye melùʼ.

¹⁸Vèn wáa yen fo Hesekiya bóʼtí ven, é vèn wáa kwàʼtì ji NYÙY TÀR yíi fəə́r a ven fo mǒ kiwo. Anyùy veé vitum, a fə̀m dzə̀ kiné kí, vé‑eè ghàn ne fə̀ə́r kitúm kév fo fòn woó Assiriya wo a?

¹⁹Anyùy veé Hamat wùn à veé Arpadi bèé lèn? Anyùy veé Sefarvayime bèé lèn? Veé Samariàa‑aà lo fə̀ə́r áwune fo mǒ kiwo a?

²⁰Dzə̀ viné vee anyùy fo anyùy vitume, ve á fəərin ne vitúm vév fo mǒ kiwo? A dzə̀ NYÙY TÀR ghàn kfə́ é le, bóo fəə́r Jerusalem fo mǒ kiwo?› »

²¹Yii bèy, wíri ku gòʼ gòʼòn kisə́sə, la wìr yòʼ bìnèr kinyo e mfòómé woó Assiriya və̀y, bìʼ fo Fòn Hesekiya kì shìvtìn ne ji wìr wáa yen a fó yìi mvə̀ʼ shuu.

²²Á bèy, Eliakim woo wan Hilkia wo yì‑iì dzəə̀n kitú ke atǎr ntoʼ, wùn à Shebna woo ŋgaà saŋ woó ntoʼ, à Joa woo wan Asav wo wù‑uù fiʼtì sáʼ fòn nèn dù, e yèn Fòn Hesekiya e tóŋé shuù, aá sátí ne ndzə̀y sév. Á dù, e fìʼtì kinyo ke mfòómé woó Assiriya kì suuyin kiy.