Read Lamnso Aysaya 37 Bible Online

Aysaya 37 - Lamnso bible

Aysaya 37

¹Fòn Hesekiya yú kinyo kìy, e nèn saàsì ndzə̀y sə́, e lò, e màʼ a dzə̀ vinsàʼ ve ndzə̀y, e dù e NYÙY TǍR lav.

²Wù dù, e tùm Eliakim woo taà ntoʼ wùn à Shebna woo ŋgaà saŋ woó ntoʼ, aàtàá cù vee ŋgày sé wìri, aá máʼ vinsàʼ ve ndzə̀y, áwune dù, e yèn *ŋgaà ntum Nyùy woo Aysaya woo wan Amot.

³Á dù bèy, e sùúy e wun ji Fòn Hesekiya suuy a jii, «Kishiíy ké lán ki dzə̀ ké ŋgeʼ ki, a kfə̀n dzə̀ ké kinyàm, à ké nshoórmé ki. Vèsən sì moo wán wo wiíy loòn ji wun sí dzəə, vitaáví ví búŋ, wù kpú é bvə̀m.

⁴Mfòómé woó Assiriya kì wìy, a kuùrì Nyùy wo wù dzəə̀n shó, kuùrì bèn mo tàr wov woo fon kì tsənsin ji wù wàá wiy, e kuùrì. M lón ji NYÙY TÀR woo Nyùy wò ku yuùrí a liy sìn, e nyèr áwune. Á bèy, á bùnrì fo kibér ke wìr ke kí dzə̀ə́ sho ki.»

⁵Mo vé ntum Fòn Hesekiyàa duùn, e yèn Aysaya,

⁶wù bìnèr jii, «Vèn du, e sùúy e fòn ji NYÙY TÀR yoŋ a jii, ‹Lá à yòʼ a fàn bìʼ kinyo ke à yuun, a wír fòn woó Assiriyàa yoŋ, kuu mo ji yòʼ dzə̀ á m sə̀ wò.

⁷Yuúrí, m yíi way kiyoy kímóʼ kí e fòn woó Assiriya wùn, é wù yú leŋ wúmóʼó, e nèn a kfən e bàm e wun wòŋ. Wù kfə́né, é m nèn yiì, aá yúyrí wun a dzə̀ e wun nsay.› »

⁸Mfòómé woó Assiriya nèn lò, a kfən e bàm, a wù yú ne ji fòn woó Assiriya lò a ne fo Lakish. Wù lòo kfən, e yèn, a fòn sí maʼ Libna e rə́r sí.

⁹Fòn woó Assiriya nèn lò, e yù ji Tirhaka woo fon woó Etiopia[64] waà sí nəə a wun e rə́r sí. Wù yú bèy, e nèn tsə̀nsí vé ntume fo Fòn Hesekiya wùn, a suúy jii,

¹⁰«Vèn du, e yòŋ e Fòn Hesekiya woó Juda jii, ‹À yéʼti ké a dzə̀ e nyùy wò wùn. Á yen fo nyùy wò bóʼtí wò ji bó yòʼ dzə̀ Jerusalem tò e fòn woó Assiriya kiwo.

¹¹Kí à yù ne mo afon veé Assiriyàa rə́si lóvti e vitúm vi, laar vidzə̀m láarin ŋkuuŋkùŋ? À kwaʼ ké ji dzə̀ nyùy wò bòyìr wò à?

¹²Anyùy veé ŋkà se laʼ see Gosan wùn à Haran, à Resev, e lì vé wìr veé Eden e Telassari‑iì lo yù fóo bòyìr vitúm vìn a? Aày, atàr vérí‑iì laàr virə́ʼ vin vidzə̀m.

¹³À kwaʼ ji yì‑iì kòóy ka afon veé ŋkà se laʼ see Hamat wùn à Arpad, à Sefarvayim, à Hena, e lì fon woó Ivva. Áwune bèékír lèn?› »

¹⁴Fòn Hesekiya dù, e sə̀ ŋwàʼ fo vé ntumé kiwo, e yòŋ, e nèn kòʼ shó e NYÙY TǍR lav, e neèr e NYÙY TǍR si.

¹⁵Hesekiya nèn a bunrì NYÙY TÀR jii,

¹⁶«Éè NYÙY TÀR woo Taà Mànjòŋ, Nyùy wìr veé Isray, wò wo a dzə́ e kàvàʼ e *vifá veé yuv ve ví kér vav si ví nsàn. Kù dzə̀ wò Nyùy vèn mòʼón wo à sáʼ vitúm veé kitu ke nsay vidzə̀m. Kù‑uù bòm wò yúv wùn à nsay.

¹⁷Éè NYÙY TÀR, mvə̀ʼtì vituʼùr vé vi, e yuùrí. Éè NYÙY TÀR, mvə̀ʼ sí yée, e yèn búʼú. Yuúrí jí se Sennakeriv si, jí se wù tsənsin ji á shur wò sho si, wò woo Nyùy wo à dzəə̀n shó.

¹⁸Éè NYÙY TÀR, kí dzə̀ rú. Afon veé Assiriyàa sə̀ʼsí ne vitúm vinín, woŋ wóví wáa tiynín kisáŋ.

¹⁹Áwune màʼ ne anyùy ve vitúm vìn vi‑iì ghvə́mé e və̀y, e laàr adzə̀m, bìʼ fo yì‑iì dzəə̀n vifá là mvə́m, vifá, a fér wír e kicí kí, kìn e tíyí.

²⁰Éè NYÙY TÀR woo Nyùy wor, ku sə̀ ver fo wír veé Assiriyàá wo, é vitúm veé kitu ke nsay vidzə̀m vi fiʼ kìíy ji kù dzə̀ wò wo à dzəə̀n NYÙY TÀR.»

²¹Á bèy, Aysaya woo wan Amot nèn tsə̀nsí ntum e Fòn Hesekiya, a yì dzə̀ jii, NYÙY TÀR woo Nyùy wìr veé Isray suuy a jii, mo à tóŋ, mbaa wun kùm Sennakeriv woo fon woó Assiriya,

²²bo wun woo NYÙY TÀR suuy kfə́ shó a jii: «Wír veé Sione leey wò ntéŋ, té lám e wò. Wír veé Jerusaleme yén mo à léʼé, a tiy fo bàm, a mèʼ kitú.

²³Sennakeriv, wìr wo à shéʼ, kuurì dzə̀ la? Wìr wo à súŋnin sho kitávín dzə̀ la? À fə́ti sí a dzə̀ vèn la? À kù yòʼ kì ji dzə̀ Ŋgaà wo Ranén woó Isray a?

²⁴À tùm vé lìm vé, á wíy, e shèʼ NYÙY TÀR, aà raʼsì wún ji *viténtén vé ve rər ví dzə̀ vigháʼán, aà sə̀ŋ ne, e kòʼ shó e vitu ve agwan, e kóʼ shó feyì e ntoò agwan veé Lebanon. À sévti ji à bàʼtì ne vicí vee fó, vicí vee *sidar ve darkìn ví, kfə̀n bàʼtì vicí vee dzəʼə̀y ve juŋ vi. À dzəv nsaŋ ji wò‑oò kòʼ é kǒv Lebanon, fə̀m mo wú‑uù rə̀ŋsìn, à kóʼ féyì, e mèé e loògwan.

²⁵À tùŋ ne ndzə́v sí é vitum, túŋ feyì, nó mendzə́v kisáŋ. Wò‑oò nə̀ə́ Ejiv vèn à mànjòŋ wò, ndzə́v see fó si yúm e wò sar wuù.

²⁶«Wówò, à yòʼ‑oò ló ne yù a? À yòʼ‑oò ló yù ji mò‑oò wày ne wáyín fó ŋgùʼ a? Yì‑iì sìysì mo vinyo ve ví kooy lèn vìn fo yàŋgùʼ. Kù‑uù sìysì mo, é bo à yii, é ŋkà se laʼ se tavkín sí kerkir, e bìnèr kay sév se bomén sí, é sí du é vifə̀m.

²⁷Wír vee fóo nén a dzə là kitar. Shúu‑uù mà áwune, á wáa woomé. Áwune‑eè kfə̀n ne ji vikwiíy veé kwaʼ, e kfə̀n ji to se bór se sí fəə́kirì, a dzə moo viŋgà ve ví fəə́ e kitu ke lav, fəə́, lóo tèʼ, shùy nèn tòn.

²⁸«Á bèy, m kì vinyo vé vidzə̀m. M kì fo à dzə́. M kì ghán se à fəə́, à se à nəə si. M kfə̀n kì mo à fáŋ mo.

²⁹À fàŋ ne mo, kiŋkoʼòrwùn ké ki nəə́ e mǒ kitùʼùr. Bìʼ bey, m yíi way ŋgòvìr yem e wò yuy, wáy sháŋ e wò shuù, é m nèn bìnèr wò, áà wáa kfən, a kfən, a kù dzə̀ fó dzəə ye wò‑oò wìyìn fó fo.»

³⁰Á bèy, Aysaya nèn sùúy e Fòn Hesekiya jii, «Kisəəm ké vinyò vìn vidzə̀m ki kíne. E kiya fèn, vèn à wír vée kù yíi a yi a dzə̀ vifá ve ví fəən fəə́n, a bó yoʼ wày wír. Lóo dzə e kiya ke kí wiyì, é vèn wáa yi ve ŋgoòy tumkin, ví fəə́. Wíy lóo dzə e kiya ke kí meen ji taár, é vèn nèn wày ŋgoòy se vifa, e kàv, e bìy súm vitiír vé vayin, e bóo kav báŋ fo fo, a kfər, a yu vijuŋ.

³¹Kù mo gháŋ kitiírí nəə e nsay, kí kòóm báŋ, dzə̀ réŋréŋ mo kibér ke wìr veé Juda ki kfə̀n wíy taʼám.

³²Rúrú, kibér ke wìr ki wíy a dzə e Jerusalem, é shiŋgoo she wìr she shí bòyìn shí wáa dzə e Gwan Sion. Kinyo kìn ki wíy koóy, a kù dzə̀ mo NYÙY TÀR woo Taà Mànjòŋ wayin shií ji kí koóy.

³³«Bìʼ bey, ke NYÙY TÀR suuy kùm fon woó Assiriya ki dzə̀ jii, ‹Wù yòʼ wíy nəə́ ŋkàlaʼ rə̀n. Wù yòʼ wíy nàn mvən rə́, e kìʼ ŋkàlaʼ rə̀n sho. Wù yòʼ wíy meʼ fó e ŋkeè rə̀r, a wù yòʼ wíy shùʼ nsay e wǔn kày ji á fiʼ kòʼ, e nə̀ə́ fo.

³⁴Dzəə̀ ye wù wíy wìy fo fo, kù dzə̀ ye wù wíy kfən sho. Wù yòʼ wíy to ŋkàlaʼ rə̀n. Suuy mo woo NYÙY TÀR.

³⁵M wíy kìŋsìn ŋkàlaʼ rə̀n, e bòyìr. M wíy yiì bèy, bìʼ viwìr vém, à shií wo m kér bìʼ ŋgaà wom lìm woo Davir.› »

³⁶Kú a dzə vitsə́ʼə́, nshìylav NYÙY TÀR fəə́, e dù e wír veé Assiriyàá kilaʼáy, e yùyrí wíri nsə̀kì nshòv sitàn e mwaamé e wiì (185,000). Wíri bvəə́shí, a lò e yuv kijàvndzə, e yèn, a sí néŋnin dzə́n sí.

³⁷Á bèy, Fòn Sennakeriv woó Assiriya nèn kìv kiláʼáy, e kfə̀n é Assiriya. Wù dù, e gòʼ, a dzə e Nineve.

³⁸Wáa dzə e kishiíy kímóʼ kí, a fòn dzə̀ e nyùy və woo Nisrok lav, yii cu, wón və́ vee Adrammelek wùn Shareseri nèn yùyrí wun e nyùy. Á yúyrí bey, e lèʼ, e dù e nsay Ararat. Esar‑Hadon woo wán və wùmòʼ nèn yì vifon, a saʼ e tàr wóv ntaʼ.