Read Lamnso Aysaya 38 Bible Online

Aysaya 38 - Lamnso bible

Aysaya 38

¹Wáa dzə e ghan see shooy, Fòn Hesekiya gbù yàsí, e bèr gheéy fó kpu. *Ŋgaà ntum Nyùy woo Aysaya, wo dzəə̀n wan Amot nèn dù, e yèn wun, e sùúy sho jii, NYÙY TÀR suuy a ji wù náŋsín á vinyo vee wun lav, e sìysì, bìʼ á fo bó yòʼ dzə̀ wù waà lùŋ. Wù waà lo, e kpu.

²Hesekiya yú bey, e nèn bìnkìr, a leéy wún lav, a bùnrì NYÙY TÀR.

³Wù‑uù bunrì, diy e ŋàŋ, lón jii, «Éè NYÙY TÀR, ku kuùmé mo mò‑oò ghán e wò mbòv shilív shimòʼón, yii vinyo a dzə̀ ve ví gheen wò».

⁴NYÙY TÀR kfən sùŋnín e Aysaya, e sùúy sho ji

⁵wù du á fo Hesekiya wùn, e yòŋ sho a jii, «Mo woo NYÙY TÀR wo tàr won Davir‑iì ghvə́mé, m yù ne bunrì yé, a m yèn ne mo à sə́ʼər mensíy. Ke m yíi yiì lèn ki dzə̀ jii, m yíi dzə̀sì dzəʼə̀m yé, áà kfən shìíy viyá nshòv sitàn e ghvə̀m.

⁶M yíi fəə́r vèn à ŋkàlaʼ rə̀n fo fòn woó Assiriya kiwo, a m wíy a kìŋsìn ŋkàlaʼ yee shoon.»

⁷Aysaya kfən sùúy e Hesekiya jii, «Kisəəm ke NYÙY TÀR yíi dìn e fòn ji wun wíy yiì kinyo ke wù kàʼàn kí kíne.

⁸NYÙY TÀR yoŋ a ji fòn leéy á kindzə̀ə́ndzəm ke shùy ye yì sí nəə, ke kí gbu e ŋkèʼ se sí kóʼ e Ahas lav. Wun sí lo, e siìr a kindzə̀ə́ndzəm kee shooy, é kí kfə́n é bàm ŋkèʼ e ghvə̀m.» Á bèy, kí nèn kù kòóy réŋréŋ bey.

⁹Hesekiya woo fon woó Juda‑aà jòy, e bònén, e nèn sàŋ bunrì rə̀n, a yí dzə̀ jii:

¹⁰Mò‑oò rəm ji m sà sí lo, e kpu bèn, a m dzə̀ə́ ntìntìn wìr a, rəm ji m sà sí lo, e səy aàŋkfəə́ wòŋ bèn, e màysì vishiíy vém, a sì fó a?

¹¹M kfə́n a rə̀m jii, «Bó m yòʼ dzəə́ wìy a dzə e wòŋ wìr ve tíne, e bóo shov lav NYÙY TÀR é si. Mo m kù sí wìy a dzə kém, a dzə̀ é wòŋ fo vinyo vidzə̀m vi kfə̀yìn ne, bo bó m yòʼ dzəə́ wìy shov wir msòŋ é si.

¹²Nyùy sèn ne kiyoy kém, kù mo nshìy shòʼóy kibàn kfə́, e kùr vicí. Dzəʼə̀m yémé kù sì moo ji m boòtí bootín. Yí rèŋ ne, e mày, kù mo á bá ndzə̀y, maysì, á kaàrí. Mo yì rán, jí, kù sì mo Nyùy màyìrìn ne dzəʼə̀m yém.[65]

¹³Mò‑oò shiiyì, m kù rə̀m a dzə̀ vinyo ve ví kooy mo, ndzə ràn. Nyùy bvə̀ʼtí ne vighvə́r vém, kù moo ji bvə̀ʼtí bvərə̀ʼ. Mo yì rán, jí, kù sì mo Nyùy màyìrìn ne dzəʼə̀m yém.[66]

¹⁴Mò‑oò tóŋ sə́mo, a jì ndzəy moo ye shinə̀n, tóŋé, a jì ndzəy, kù moo ji kónsi kibìŋ. M yòʼ‑oò dzəə́ yú fóo nàn sí, e leéy yúv, e lon sə́mo. Tóŋ yémé kù‑uù dzə̀ jii, ‹Éè NYÙY TÀR, m dzə̀ é mvə̀m nyar, ku sə̀ mo.

¹⁵Éè mǒ vèné, m fèn‑ee yoŋ ji ka?› Wù yiì ne kinyo ke wù‑uù kàʼàn ji wun yii e mò. Mo dzəʼə̀m yémé kù siìn nyár nyár, bo m kù sí wìy a dòmsì vishiíy dómsin.»[67]

¹⁶Éè NYÙY TÀR, kù fó wò dzəʼə̀m e wíri, kù yii wò, é bo m wáa ŋèʼ.[68] À fèr ne mo, m bónén ŋkuuŋkùŋ, e siìr dzəʼə̀m yém, yí kfə́n fó.

¹⁷Rúrú, m yèn ne ji mò‑oò sorkìr e nyar bèy, a yì‑iì dzə̀ á kinyo ke juŋ ki fo mò. NYÙY TÀR, à kòŋ ne mo é ŋàŋ, e kìm mo fo kpúu. Ké ru kí, à bìn ne ndzə̀m e mǒ vinyò ve bi ví.

¹⁸Wír ve á dzəə̀n áàŋkfəə́ wòŋe yòʼ dzə̀ á kfə̀n a beèrì wò. Wír ve á kpukin nee yòʼ kfə̀n búri wò. Aŋkfəsàyi yòʼ kfə̀n dzəə́ yoy, tiir e wò wùn ji à wíy a tiy vèn áwune.

¹⁹Kù jòʼ wír ve tíne cáʼ ve dzə̀ á bùrí wò réŋréŋ mo m búri, aàtàrí kù sí yéʼey wón mo à yii tíy vèn à wír vée.

²⁰NYÙY TÀR lùŋèr ne mo, bìʼ bey, e dù, e meé mo vèr wíy a dzə atin, vèr wíy a kùm lúŋ nshì, a sùyrì wun sho e wun lav cù.

²¹Mo Hesekiya‑aà gbuùn yàsí, Aysaya lò, e yòŋ e wír ve vé‑eè kér fóne jii, á taʼ á nyaàŋgùv woo fèr e mentuʼ me *fig mè, e wìy sho, e wày e fòn kivav, é wù fiʼ bònén.

²²Hesekiya nèn lò, e dzə̀r jii, «Kisəəm ke kí yíi dìn ji m yíi koʼ e NYÙY TǍR lav ki dzə̀ ka?»