Read Lamnso Aysaya 39 Bible Online

Aysaya 39 - Lamnso bible

Aysaya 39

¹Wáa dzə e ghan fóo fèy, Merodak‑Baladan woo fon woó Babilon, wo yì‑iì dzəə̀n wan Baladan yú ji Fòn Hesekiya‑aà yú a ntéŋ, a wù bònén a ne, e nèn sàŋ ŋwàʼ, e tsə̀nsí sho wùn à fómo fó ghaŋ.

²Vé ntume dù, Fòn Hesekiya səə́sí áwune, e nə̀ə́ sho e wun kitàv, e dùŋrì vifá vidzə̀m aáwune, a ví dzə̀ jii, *kisha ke mbàm ke fəvír kí wùn à ke baar kí, à virə̀ʼtìn ve vifa vi, à meŋgvə́r me shavín mè, e bóo lì vifá və́ vé rər. Bó kifá kímóʼ kí yòʼ‑oò lo bèr é ntoʼ, kìn é kitum, ke Hesekiya yòʼ‑oò lo kwèʼ, e dìn aáwune.

³Aysaya woo *ŋgaà ntum Nyùy nèn dù, e yèn Fòn Hesekiya, e dzə̀r shó jii, «Wír vìne wìy a dzə̀ fó feé, aá wìy bèy, e sùúy e wò ji ka?» Hesekiya bìnèr jii, «Á wìy fo wòŋ wúmóʼó kwaʼda feyì. Á wìy fo Babilon.»

⁴Ŋgaà ntum Nyùy kfən dzə̀r jii, «Áwune kì yèn a dzə̀ ka e wò ntoʼ?» Hesekiya bìnèr jii, «Á kì yèn kifá kidzə̀m kee mǒ ntoʼ. Kifá ki yòʼ dzə̀ shó e mǒ vitàv ke m yoʼ lò kwèʼ, e dìn aáwune.»

⁵Aysaya nèn sùúy e Fòn Hesekiya jii, «Yú kinyo ke NYÙY TÀR woo Taà Mànjòŋ suuy ki.

⁶Á kiíy ji ghán sí wíy wìy, se á wíy kuúy kifá kidzə̀m kee wò ntoʼ, kifá kidzə̀m ke atàr vée‑eè kéŋ, lemè, e wìy shem lán. Aá kuuy bèy, e dù sho e Babilon, é la kifá ki yòʼ bèr. Á mo NYÙY TÀR suuyì.

⁷Á wíy lì sa wón ve dzəə̀n vitó vé ámóʼó, e dù sho, e sòŋ, aá wáa lìm e fòn woó Babilon ntoʼ.»

⁸Fòn Hesekiya nèn bìnèr e Aysaya jii, «Ntum NYÙY TÀR ye à tiisin e mò dzə̀ e juŋ.» Wù‑uù binèr bèy, kwaʼ ji mo wun yíi a dzə sho e tin, bo kù sì ji nyaáŋ yíi a dzə sa e wun wòŋ.