Read Lamnso Aysaya 4 Bible Online

Aysaya 4 - Lamnso bible

Aysaya 4

¹Kí kooy bèy, é vikìy aníne wáa taŋ lumèn e mòʼón, a lon wun jii, «Ku lì ver ji vikìy vé. Kù yíi a tùr ver ké yíka wùn à ké ndzə̀y kí. Ku wày ver é lav, é woómé see ji vèr dzə̀ là alúm si may fo věr wùn.»

²Wíy lòo dzə e ghan fóo fèy, é NYÙY TÀR yii, é tám kici wo fíyi tó, a dzə kifá ke kí din vijuŋ wùn à vikuʼùy ví. Nsay wíy fəə́r vifá ve yi nyanyày, é shúu wáa ma wír veé Isray ve á wíy bòy fo ŋgeʼlàʼ. Aáwune wáa yu wún bìʼ vifá ve nsay yev fəərì.

³Fo ké wìr ve á wíy ber e Sion, a dzə̀ ji wir dzə̀m wo wù wíy bòy, e gòʼ e Jerusalem, á kù wíy a yen ji dzə̀ rú wír vee jeéy ji dzə̀ vé NYÙY TÀR. Kù dzə̀ ji wìr dzə̀m wo NYÙY TÀR saŋen yír sév ji á wíy lùŋ, a dzə sho atin e Jerusalem.

⁴Á wíy a yen bèy, a NYÙY TÀR sú ne lóm se wìr veé Jerusalem, e *kfə̀mrí áwune fó kinjuyrì, e sù mensə́ fo áwuné wo. Wù wíy yiì kin, e shaà fo ŋgeʼlàʼ ye wù maʼ e wírí kitu, bìʼ yii yév, e màʼ, kù mo və́yí laàr kifá.

⁵NYÙY TÀR wíy fəə́r kindzə́ʼ, é kí wáa koʼ moo mbàʼ e shùy, a tiy e kitu ke Gwan Sion, a sùm wir dzə̀m wo wù baʼtin fó, a cù Nyùy. Lóo dzə vitsə́ʼə́, é wáa koʼ kiliímé ke və̀y, a kàʼày fó, a sì vikuʼùy vé NYÙY TÀR, a ví sum fó e dzə̀m, kiŋsìnè.[6]

⁶Ví kù wíy a dzə ji kikfə́vsì ke kí téʼtin ŋkàlaʼ fo shùy wáa tòn, kiŋsìn fó, fo wuú wáa tsəm, é kinsəm ki wáa kètì virə́ʼ.