Read Lamnso Aysaya 42 Bible Online

Aysaya 42 - Lamnso bible

Aysaya 42

¹NYÙY TÀR suuy jii: «Vèn yén, ŋgaà wom lìm və̀ne, wun wo m tómé.[76] Dzə̀ wun wo m shoʼon, a shilív shém shí tíy a dzə̀ é wùn wó. M fò ne Kiyoy kém, kí wáa shìy wun, a wù wíy dànèr vitúm, aá wáa ker sáʼ yee réŋ.

²Wù wíy a lò kisúŋnìn ji weè, a wù yòʼ wíy a nàn jí. Wù yòʼ wíy a yòr e mentàrnín.

³Wù wíy yen nsàŋ, a yì sí bvə́ʼəmè,[77] é la wù yòʼ màysì, e bvə̀ʼtí. Kikaʼày kí wíy lòo shwi ji làʼrì làʼrì, é la wù yòʼ màysì, e ndzə̀mér. Wù kù wíy a yu kinyo kimòʼón ji wun yii, é wíri wáa ker sáʼ yee réŋ.

⁴Wù yòʼ wíy a weèy, a màʼ wún, kù bey, e meé mo wù wíy tuúy sáʼ yee réŋ é kitu ke nsay, a vitúm veé ndzəywoŋ vi kù sí shiy ji á yú yéʼéy a dzə̀ rə́.»

⁵NYÙY TÀR kù dzə̀ wun wo wù‑uù bomen yúv, e sàŋrì moo kibàn ke tamén kí. Wù‑uù nàŋsín, e bòm nsay wùn à kifá kidzə̀m ke kí dzəə̀n shó ki. Kù yii wun, é bo wìr dzə̀m wáa ŋèʼ, a kù fó wun vitaáví e kifá kidzə̀m keé kitú ke nsay ki. Wun woo NYÙY TÀR wo kù jòʼsìn wun ji Nyùy nén a suúy e ŋgaà və lìm jii,

⁶«Dzə̀ mo NYÙY TÀR, a m lì ne wò ji à tuúy sáʼ yee réŋé. M yíi fo wò vitaáví, a leéy fo wò. M yíi lèm wò ji kilaa ke *mensàŋ me vèr à wíri, áà wáa dzə kikaʼày ke kí kaʼày vitúm.

⁷M lèm ne wò ji à mvəʼti sí se amfìr, e kfə̀n lèm ji à fəə́r vé sháŋé fó lav sháŋ, aá boy fó virə̀ʼ ve á dzə́ sho, a ví sə́n ji dzə̀v.

⁸«Dzə̀ mo wo kù dzəə̀n ji NYÙY TÀR, á yír yém. Bó yòʼ dzə̀ féyì, m màʼtì, é ghvə́m ye á kì yíi fo e mòó kfə́n e wìr wo sən, a bó yòʼ dzə̀ féyì m biìmé ji nsùyrì wo á kì yíi a sùyrì mo shó du e mebvə̀m mè.

⁹Vèn leéy, vinyo ve mò‑oò suuyin ji ví wíy koóy vi kòóy ne. Ké lèn ki, m lo, a fèr ven vinyo ve fíy ve ví kfə̀n lo, a koóy. Mo‑óò fer e vèn, é bo ví fəm kèʼ a koóy.»

¹⁰Vèn wáa yòv luŋ wo fíyi, a sùyrì NYÙY TÀR. Ven ve á dzə́ e ndzəywoŋ, vèn wáa yòv, a burí wun. Ven ve á danèr vikóŋ e rìbà ndzə̀ví wáa burí NYÙY TÀR, é kifá kidzə̀m keé rìbà ndzə̀v kí wáa burí sa. Vitúm vidzə̀m veé ŋguùŋè rìbà ndzə̀v ví kú a sùyrì wun.

¹¹Wír ve á dzə́ e ŋkà se laʼ seé virə̀ʼ vé woʼ sií nan jí, a burí NYÙY TÀR. Ntèʼ seé rám Kedar si kú a yòv, a burí wun. Wír ve á dzə́ e Selàa kú a yòv yòv kisheʼrì. Á kú a fuŋ yòv fo vitu ve agwan.

¹²Wìr dzə̀m kú a burí NYÙY TÀR, a koʼór yír rə́. Á kú a fìʼtì vikuʼùy və́ vitúm ve sàŋbóy vidzə̀m.

¹³NYÙY TÀR lo, wù ŋàʼáy moo ntav wo wù du e shùu rər. Wù lo, wù wàa nəə́ e shùu rər, a yu tím. Wù lo, wù yìysí, e bùʼ shirəə́ ji sí wàá tsəə́m, a ghiʼ aŋgaà və́ vibàn, a wù yòʼ mvəʼ sí, yén wír.

¹⁴Nyùy suuy jii: «Mò‑oò kfə̀mén, e kù a dzə kisə́sə ntàmda. M kù‑uù sə̀tí shuu wóm, e làa yòʼ a kwè. Ké lèn ki, m lo, a toŋ moo wiíy wo wù lúmé. M yíi a fiʼsín, a toŋ ji shwér a e mǒ wùn.

¹⁵M wíy yiì, áàgwan wùn aàŋkoŋe keesi, e mày, e yiì, é viŋgà wùn à kifá ke teʼèn kí yúm kidzə̀m. M wíy yumér ndzə́v sidzə̀m, e yiì, é fóo kfə́n é nsay ye yumér.[78] M wíy yumér sa vishàʼshaʼ vidzə̀m.

¹⁶«M wíy dànèr wír vém vee amfìr, aá ghán é dzəə ye á yòʼ‑oo shaá ne sho. M wíy a dànèr áwune, a dù sho e nshwàn wo á yòʼ‑oo tiír ne kiwuú shó. M wíy tsə̀ʼ ndzə ye sənér fo áwuné kitu, aá yén rán, e siìr virə́ʼ vév ve ví dzəə̀n vikóŋkóŋ vikóŋkóŋ, é ví kfə́n é leŋ, a dzə ji fèm. Á kinyo ke m wíy yiì bìʼ áwune, a bó m yòʼ wíy màʼày áwune.

¹⁷Yii bèy, m wíy meŋ wír ve á tiir vifií a dzə̀ e mebvə̀m mè wùn, kìn dzə̀ mee tòn é kilàm, kìn me semén mè. M wíy shov wír adzə̀m ve á ghvə́m mebvə̀m ji anyùy vév, e shoór bèn, aá wáa woomé ŋkuuŋkùŋ.»

¹⁸NYÙY TÀR suuy e wír veé Israyi jii: «Ké lèn ki, ven vee ansəərì, vèn fó vituʼùr ví. Ven vee amfìr, vèn leéy, e fíʼ yen kinyo ke m taʼ ji vèn yii kí.

¹⁹Mfìr wùmòʼ kfə̀n dzə̀ la, e shaà Isray woo wír wom lìm? Nsəərì wùmòʼ kfə̀n dzə̀ vəné, e shaà wun woo ŋgaà ntum wo m tumen? Rúrú, mfìr wùmòʼ kfə̀n dzə̀ la, e shaà ŋgaà wo m tayin táyín. Wìr wóo fìr moo ŋgaà lìm NYÙY TÀR dzə̀ vəné?

²⁰Wù lo, wù yèn vinyo vinín, yii bèy, a wù yòʼ gwarìr kímóʼ kí. Vituʼùr və́ ví dzə̀ virə́, yii bèy, a bó wù yòʼ yú vinyo.»

²¹NYÙY TÀR nàn yéʼéy rə́ wùn à nsər sə́ sí, sí wáa taa e kitu ke vifa vidzə̀m. Wù nàn bèy, e shií woo ji á wáa yen vitaáví ve ví dzəə̀n shó, a ghan e mbòv wó.

²²Yii bèy, wír veé Israyi víne ve á shoŋen áwune, e sùm kifá kév kidzə̀m. Á koò ne áwune wir dzə̀m, e fìn ámóʼó é sháŋ, e wày ámóʼó é bii sí. Á faàsì ne vifá vév, a wìr wóo fəə́r áwune fó ŋgeʼ yòʼ dzə̀. Á sùm ne kifá kév kidzə̀m, a wìr wóo fo sáʼ ji á siir é bàm yòʼ dzə̀.

²³Wìr feyì fo vèn wo wù yíi a səə̀m vinyo vìn dzə̀ la? Kèʼ fo lèn, wìr wo wù lo, e bonén, e shooshí, e yuurí kijuŋ dzə̀ la?

²⁴Yì‑iì fò la rám Jakov aàŋgàa vibàné, é bo á shóŋ áwune? Wìr feyì feyì wo wù‑uù yiìn, é bo á kuúy vifá ve wìr veé Isray dzə̀ la? Bó yòʼ kù‑uù yiì NYÙY TÀR a? Dzə̀ wun wo vèsən‑eè tenen fó yunén, e kù a jay jayín. Dzə̀ wun wo Isray‑iì tenen fó a ghan e wun mbòv, e tèn fó yunín yéʼéy rə́ wùn à nsər sə́ sí.

²⁵Á bèy, dòʼshwiíy kív NYÙY TÀR, wù màʼ ŋgeʼ e wír veé Israyí kitu. Wù‑uù yiì, áwune yén ŋgeʼ rə̀r ye tavín. Wù‑uù yiì, ŋgeʼ rə̀n súm áwune mo sùm kiliímé ke və̀y, yii bèy, a bó áwune yòʼ‑oò ló a gwàrìr. Yì‑iì tòn áwune é njà və̀y, yii bèy, bó á yòʼ fə̀m‑eè lo yèʼéy kinyo fo fo.