Read Lamnso Aysaya 43 Bible Online

Aysaya 43 - Lamnso bible

Aysaya 43

¹Yii bèy, vèn yú kinyo ke NYÙY TÀR suuy ki lèn, NYÙY TÀR wo wù‑uù bomen ven vee rám Jakov, wun wo wù‑uù yiìn, é bo ven vee Isray wáa dzə ji kitúm. Wù suuy jii, «Lá vèn yòʼ a fàn, m tìn ne ven fó vikwàn. M kì ven é yír yir, a vèn dzə̀ wír vém.

²A vinyo vi lò, a sùm ven mo rùn ndzə́v, e mèé e wìr kilòŋ, bo m kù yíi a dzə vèsən, a kìŋsìn ven. Vèn lóo tosín e mvə̀m ndzə̀v, bo bó m yòʼ yíi biimé, é yí gháʼ ven. Ŋgeʼ si lóo bav ven, kù mo báv və́y wír, bo bó yòʼ dzə̀ və́y ŋgeʼ və̀ne tòn ven, a bó yòʼ dzə̀ kiliímé ki kùm ven.

³Dzə̀ mo NYÙY TÀR woo Nyùy won, Ŋgaà wo Ranén woó Isray, wo wù luŋèr ven. M lì ne wír veé Ejiv, e tìn ven shó. M ku kfə̀n tàŋ ven fo kpúu, e fò wír veé Etiopia[79] wùn à veé Sebàa.

⁴A kù dzə̀ m yiì lì wír ámóʼó ji m fiʼ tàŋrí ven shó, bìʼ fo m wayin ven e mǒ shiliv, a m kòŋ ven é ŋàŋ, e lì ji wír ve a dzə̀ m kù bùʼ. M kù wíy lì vitúm, e taŋ ven shó fo kpúu.

⁵«Éè wìr vem, lá vèn yòʼ a fàn, m dzə̀ vèsən. M yíi siìr rám yén ye yí dzə́ e mbìv yee fo shùy yii tó, aá kfə́n é bàm, e kù baʼtí sa ve á dzəə̀n fo shùy yii nəə, e siìr e bàm.

⁶M wíy yòŋ e vitúm ve ví dzə́ e mbìv yee kuy vi jii, ‹Vèn maʼti wír vémé, aá lo›, e yòŋ e ve ví dzə́ e mbìv yee tsə́n ví jii, ‹Vèn wáa yen fóo səə́r wír vém.› Vèn báʼtí wón vém vee vilume fó virə̀ʼ vee kwaʼda, a wìy sho, e kù bàʼtí sa vee vikìyí, a wìy sho fo ndzəywoŋ.

⁷Wìr dzə̀m wo dzəə̀n ji wóom féyì feyì, vèn siir é bàm, wir dzə̀m wo mò‑oò yiìn, á dzəə́ ji wù wáa dzə, a burí mo. Áwune vin ve mò‑oò bomen, e nàŋsín ji á wáa ghvəm mo.»

⁸Nyùy suuy jii: «Vèn wiy e wír vémé, aá báʼtí é kibàʼ ke nsaʼ, áwune ve dzəə̀n amfìr, fə̀m mo á kér sí, á dzə̀ ji vindzə̀mer, fə̀m mo á kér vituʼùr.

⁹Vitúm vidzə̀m vi ku bàʼtí kirə́ʼ kimòʼón. Wír veé kitu ke nsay adzə̀me ku bànén, aá tar vinyo. Wìr fo áwune wo wù‑uù yòŋèn kinyo ke kí kooy kìn dzə̀ la? Wír feyì feyì wo wù‑uù yiysin kinyo, é bo kí bvəə́shí, a koóy dzə̀ la? Aá fèy‑iì lo yòŋ rú, kí koóy, á wìy ó aànjen véví, aá bínsí. Aànjene fèy dzə̀ rú, á naàrì kinyo ke vé‑eè yòŋèn ne, kí koóy réŋréŋ.

¹⁰«Éè wìr veé Isray, dzə̀ ven vin ve dzə̀ á fèr kinyo kee kùm mo e wír ámóʼó. Vèn dzə̀ wír vém lìm ntayi ve m shoʼon. M shòʼ ji vèn kiíy kinyo kee kùm mo, e wày shilív e mǒ wùn, a kiíy kijuŋ ji kù jòʼ mo Nyùy. Nyùy wùmòʼ yòʼ‑oò ghàn ne a dzə, é bo m wáa dzə, a bó wùwun yòʼ wíy a dzə.

¹¹Kù jòʼ mo cáʼ wo m dzəə̀n NYÙY TÀR. Wìr wùmòʼ yòʼ dzə̀ shó wo dzə̀ wù lùŋèr ven.

¹²Mò‑oò yìysí mo m wíy bòyìr ven, e nèn kù yiì kíwun, e fìʼtì, á kiíy ji yiì a mo, a bó nyùy kitum wùmòʼ wo vèn kér e věn mvəm yòʼ‑oò ghàn ne yiì kee bey. Ven vee wír veé Israyi dzə̀ anjen kinyò ke mò‑oò yiìn. Yoŋ mo woo NYÙY TÀR.

¹³M dzə̀ Nyùy, a m kù wíy a dzə Nyùy. A m màʼ kiwó, e ghàr wír sho, bo dzə̀ fə̀ə́r la wun fo mǒ kiwo? A m ŋàʼáy ji m sí yii kinyo, bo dzə̀ sə̀r la mo.»

¹⁴NYÙY TÀR, wun woo Ŋgaà wo Ranén woó Isray, wun woo Mfə̀ə́r won suuy jii: «M wíy tsənsí shúu rər é Babilon bìʼ ven, aá ton fó, e sàʼtì shuu se kày seé ŋkàlaʼ sidzə̀m. Tonè, é kinseŋ kév ké nsiì ki binkir é toŋ, tóŋ yé a toŋ bèn, é virə́ʼ ví wáa sə̀ʼ.[80]

¹⁵Dzə̀ mo NYÙY TÀR, mo woo Ŋgaà wo Ranén woo Nyùy won. Yì‑iì bòm mo ven veé Isray, a m dzə̀ Fon won.»

¹⁶Jí sìn si dzə̀ sé NYÙY TÀR, wun wo wù‑uù ghemen dzə́ə é rìbà ndzə̀v, dzə́ə ye dzə̀ á ghàn shó, e fəə̀sín fo mvə̀m ndzə̀v ye wiyí.

¹⁷Dzə̀ wun wo wù‑uù laàrìn vé rər veé Ejiv ve vé‑eè kóʼ nyám se ŋkoʼ, e laàr wùn à *viténtén vév vé rər ví, e laàr bèn, á wáa neŋnín, a bó yòʼ dzə̀ áwune kfə̀n lò e yuv. Wù ku laàr bèn, kù mo wìr ndzə̀mér kfəə̀ làm.

¹⁸Wun woo NYÙY TÀR suuy jii, «Lá vèn yòʼ a jivír ghán, a kwàʼtì a dzə̀ vinyo ve ví shaàn ne, kìn ji vèn wáa shooshí vinyo, a dzə̀ veé fiirí.

¹⁹Vèn leéy ri, e yèn, ké lèn ki, m lo, e yiì kinyo ke fíy ki. Kí kù sí yénsinè, bó vèn yòʼ yéné à? M lo, e ghem dzə́ə, é vèn wáa shaà sho, a dzə̀ é kirə̀ʼ ké woʼ kí, e kfə̀n yiì, é ndzə́v sí wáa leŋ fo.

²⁰Nyám se kwaʼ si wíy a sheʼrí ndzə́v ye m wíy yiì, é yí wáa leŋ e kirə̀ʼ ké woʼ e gháʼán. Akoosàʼ, e lì amàshìnə̀n vee moo *ostrish[81], aá wáa ghvəm mo, a ghvəm, bìʼ ndzə́v ye m wíy fo ji wír vém ntayi fiʼ kòóy mendzə́v mé a no.

²¹Dzə̀ wír ve mò‑oò bomen ji vém féyì, e lèm ji á wáa fìʼtì vinyo ve m yii, aá suyri mo fó fo.»

²²«Éè rám Jakov, abaày, bó vèn yòʼ fə̀m‑eè lo ghàn sùyrì mo. Bó ven vee wír veé Israyi yòʼ kfə̀n‑eè taʼ ji m méʼ ven.

²³Vèn dzə̀ a wíy áànjìi ji á ton, e cù mo shó a? Vèn kù yúy kitú a dzə̀ é cù, a bó á yòʼ ghvə́m mo. M yoʼ dzə̀r cu e vèn e nín ye yí wáa ghaʼ ven, kìn ji m rə́ʼə́y ven e kibeʼèy kí ji vèn wáa cù mo e kiláy kee *frankinsen ki.

²⁴Fo kén kí, vèn yòʼ fə̀m yún vifá ve ví rəm, rəʼtìn ji á fó e mò, a bó vèn yòʼ fə̀m yii cu ye vèn yii e mò e vimfom ve nyàm vi mo m kì taʼ ji á yii. Vèn ló kén, e kù a rəʼə́y mo rə́ʼə́yín e vinyo vén ve bi ví. Njiìn won kù kfə̀n ne, a bùmèr kitú kém búmerin.

²⁵Yii bèy, mómò, m kù dzə̀ kém ji Nyùy wo m laysìn ajay vén, sə́ʼsi, a m laysìn, a dzə̀ bìʼ yír yém. A bó m yòʼ dzəə́ wìy a kuumé ajay vén.

²⁶«Vèn din ri e mò ji vèn yòʼ kér jay, é vèsən tar. Vèn neer vinyo vén ví fó si, aá fiʼ yèn ji vèn dzə̀ là njò.

²⁷Tàr won wo wù‑uù tòmbìy neèr kitúm kén kù‑uù yiì ne kinyo ke bi kí. Wír ve á sánri kinyo kém e vèné kù yii kinyo, a dzə̀ ke mò‑oò shaʼnin fó áwune.

²⁸Bìʼ bey, m wíy shoór vilìmbìy vén vee mǒ lav cù, e laàr rám Jakov moo wír ve á shwiin mo shó ji m ku laàr ŋkuuŋkùŋ, é wíri wáa nyè sèʼsì e kibér ke wìr veé Isray ki.»