Read Lamnso Aysaya 45 Bible Online

Aysaya 45 - Lamnso bible

Aysaya 45

¹Vinyo vìn vi dzə̀ ve NYÙY TÀR‑iì suuy e Sayrus wo wù‑uù yoʼon ji fon və. «M màʼ ne kiwó, e tòm wò sho. M wíy tom wò, áà ton vitúm, e sə̀ sáʼ fo afone. M wíy ghem shuu se ŋkà se laʼ, é sí wáa tiynín sirə́, mo à méʼ fó, kí yòʼ wíy koóy ji símóʼ sí goʼ sifinèn.

²Mómò, m wíy shem e wò mbìy, a kèr agwan, aá wáa kfən e mboʼ, a bvəʼtí shuu se kày see kisha kee *brons ki, e gwàtì mfìn sév see kisha kee kiy ki, é sí béʼkír.

³M wíy yiì, áà yov bùʼ wo vé‑eè lèmèn é kitàv fó mesənér, bùʼ, a dzə̀ wùwun wo vé‑eè lìtìn é virə̀ʼ ve tavkín ví. À yovì, áà nèn kìíy ji dzə̀ á mo NYÙY TÀR, mo woo Nyùy wìr veé Isray wo m yoŋ wò e yir.

⁴Mo bó à yòʼ fə̀m‑eè lo kìíy mo, m yoŋ wò e yir, yoŋ e meŋkfəm, lem wò ji à wáa sə rám Jakov yee aŋgàa lìm vém, áwune vee wír veé Isray ve m shoʼon.

⁵Dzə̀ mo NYÙY TÀR, a bó Nyùy wùmòʼ yòʼ kfə̀n dzə̀, e shaà mo. Nyùy wùmòʼ yòʼ kfə̀n dzə̀, e shaà mo. Fə̀m mo à yòʼ‑oò lo kìíy mo, m kù távir wò távírín,

⁶é wìr dzə̀m fiʼ kìíy ji Nyùy wùmòʼ yòʼ kfə̀n dzə̀, e shaà mo, wìr msòŋ e dzə̀m woo kèʼ fo shùy tó, e meé fo yì nəə. Kù dzə̀ mo NYÙY TÀR, a bó Nyùy wùmòʼ yòʼ kfə̀n dzə̀.

⁷Kù‑uù yiì mo və̀n, é bo rán wùn à ndzə ye sənér wáa dzə. Kù maʼ mo kisəəvì e wíri, a kù maʼ mo ŋgeʼ. Dzə̀ mo NYÙY TÀR, a yii mo vinyo vìn vidzə̀m.

⁸M wíy yiì, é kinyo kém kee tìítiy ki sum nsay moo wuú ye yí keesì fo yuv, ló e nsay. Kù mo nsay yú wuú, viŋgà ví wàa tèʼ, kù dzə̀ mo kinyo kee ji Nyùy luŋer wíri kí ku ràmtìn kitú ke nsay kidzə̀m, é kinyo kee ji wìr yii réŋ kí tátí sá, a ràm. Dzə̀ mo NYÙY TÀR, a yii mo, é bo vinyo vìn vi wáa koóy.»

⁹Lòné dzə̀ wó wìr wo wù sə́ kóy wùn ŋgaà mbom və. Wír, a wù kù dzə̀ kfə́ ji kíŋ ye á bomen bómén. A dzə̀ nsay mbóm dzə̀r e wìr wo wù bóm kíŋ ji wù sà yii a dzə̀ ka á? A bó yòʼ dzə̀ nsay mbóm màʼ lám ji wìr wo wù lim e mbóm yòʼ kér wó yée lìm sho réŋ.

¹⁰Lòné dzə̀ wó wan wo wù yoŋ e kitàr kí jii, «Yì‑iì ghèén ke lá à yòʼ dzə̀ə́ mo.» Rúrú, lòné dzə̀ wó wan wo wù yoŋ e kiyìy kí jii, «Kí‑iì bòŋ ji lá à yòʼ bòŋ bvəm yém.»

¹¹Ké lèn ki, NYÙY TÀR, wun woo Ŋgaà wo Ranén woó Isray, wun wo wù‑uù lèmèn kitúm kee Isray suuy jii, «Vèn lóo tàʼ, e kiíy kinyo ke kí dzəə́ bvəə́shi, a koóy, lá vèn dzə́ə a dzər kinyo e mò kùm wír ve mò‑oò tayin, kìn ji vèn wáa tir mo mo m wáa yiì lim yém.

¹²Yì‑iì bòm mo nsay, e bòm wíri, e lèm ji á wáa dzə sho. Yì‑iì bòm mo yúv, e bòm vifá vee fó, e lèm fo.

¹³Dzə̀ mo wo mò‑oò yiìn yii yee réŋ, e bànrí Sayrus, wù wáa yiì lim yém. M wíy yiì, é vinyo və́ vidzə̀m vi wáa dù e leŋ. Wù kfə̀n wíy bàʼrì ŋkàlaʼ yem yee Jerusalem, e siìr fo, e kfə̀n siìr wír vém ve á dzəə̀n é kwaʼ nsàm, aá kfə́n é bàm. Wù yòʼ wíy a yiì vinyo vìn bìʼ vilaʼày, kìn ji á laámé. Suuy mo, NYÙY TÀR woo Taà Mànjòŋ.»

¹⁴NYÙY TÀR suuy e wír vəə́ jii, «Kéŋ wìr veé Ejivi wíy a dzə yén, e lì káv wìr veé Etiopia[84], é wír veé Sabeyàa wáa dzə wír vén kibàm, wír, a dzə̀ viŋgáʼ ve wíri. Vitúm vìn vi wíy a jùmrì ven, kù moo wír ve á koon é kwaʼ rər, aá daa e věn bàm aàsháŋé wuù. Á wíy a gbù e věn si, a ghvəm ven, a shòŋrì jii, ‹Nyùy kù dzə̀ a dzə̀ vèn áwune cáʼ, a bó wùmòʼ woo Nyùy yòʼ kfə̀n dzə̀.› »

¹⁵Rúrú, Nyùy wìr veé Isray, wò woo Ŋgaà Lùŋèr, à dzə̀ Nyùy, aà yii vinyo e dzəə ye bó yòʼ jòʼ wir msòŋ, wù kìíy.

¹⁶Wìr dzə̀m wo wù fer mebvə̀m kù wíy a woomé woomén. Á wíy tatí áwune adzə̀m, e shoór, aá wáa beʼ dzə̀rkìtu, a ghan, a tùʼtìn.

¹⁷Yii bèy, NYÙY TÀR wíy lùŋèr ven vee wír veé Isray, a luŋèr ye wù wíy lùŋèr vené kù wíy a tiy fo, e dù, e jòʼsì. E wìy dù, e mày, vèn yòʼ wíy a woomé, a bó vèn yòʼ wíy a tùʼtìn.

¹⁸Jí sìn si dzə̀ sé NYÙY TÀR. Dzə̀ wun Nyùy wo wù‑uù bomen yúv wùn à nsay. Wù‑uù lì ghán, e bònen nàvtì feyì ji ví fiʼ wìy shìíy. Wù yòʼ‑oò lo bòm nsay ji yì wáa tiy kisáŋ. Wù‑uù bòm ji wíri fíʼ a dzə sho. Kù dzə̀ wun wo wù yoŋ jii, «Dzə̀ mo NYÙY TÀR, a bó Nyùy wùmòʼ yòʼ kfə̀n dzə̀, e shaà mo.

¹⁹Mò‑oò lóo suúy kinyo, la m yòʼ a suúy e kilìtì, kìn é kirə̀ʼ kee fo bó yòʼ dzə̀ wìr yù. Bó m yòʼ‑oò lo ghàn sùúy e rám Jakovi jii, ‹Vèn wáa tàʼ mo fó kirə̀ʼ ke bó yòʼ dzə̀ á yèn.› Dzə̀ mo NYÙY TÀR, a m suuy a dzə̀ suuyrú, naarì kinyo, a dzə̀ kee tìítiy.

²⁰«Ven vee vitúm veé kitu ke nsay, vèn bánén. Wìr dzə̀m wo wù bòyìn fó rər se sí tònèn woŋ, vèn báʼtí. Á ku kòʼtí e mǒ mentsə̀m, e neèr vinyo, aá tar. Wír ve á béʼ mebvə̀me yòʼ kì kifá ke á yii, áwune ve á ghvə́m mebvə̀m, a bó yòʼ dzə̀ mè sə̀ áwune.

²¹Vèn wiy ri e nsaʼ yen, e naàrì. Vèn kfəynin, e rə̀tì, e fə̀ə́r kinyo ki. Vinyo ve ví kooy lèn, yì‑iì yìysí la fó ŋgùʼ? Feyì feyì, yì‑iì yoòyí la fó yàŋgùʼ? Bó yòʼ‑oò yoòyí mo woo NYÙY TÀR a? Nyùy wùmòʼ yòʼ kfə̀n dzə̀ shó, e shaà mo və̀n. M dzə̀ Nyùy wo wù yii vinyo tìítiy, a m dzə̀ Mfə̀ə́r, a bó Nyùy wùmòʼ yòʼ kfə̀n dzə̀.

²²«Éè wìr dzə̀m woó kitu ke nsay, vèn wiy, e yèn mo, é m wìy lùŋèr ven. Kù jòʼsì mo ji Nyùy, a bó wùmòʼ yòʼ kfə̀n dzə̀.

²³M yì ne kilìʼ e mǒ yir, suuy kinyo, a m kì rú ji á mo kí wíy a dzə, a bó yòʼ dzə̀ kí wìy shaà fo ghaŋ. Kí dzə̀ jii, wìr dzə̀m kù wíy tsəm e mǒ si, a binsí mo woo Nyùy e shuu wóví.

²⁴Wíri wíy a yòŋ kee kùm mo jii, ‹Vinyo vee réŋ wùn à vitaáví ví kù lo a dzə̀ fo NYÙY TÀR cáʼcáʼ.› » Wìr dzə̀m wo wù ban NYÙY TÀR kù yíi wìy, é wù yii, aáwune wáa woomé.

²⁵NYÙY TÀR wíy sù njò rám Isray, aá luŋ adzə̀m, a sheʼrí, a burí wun.