Read Lamnso Aysaya 46 Bible Online

Aysaya 46 - Lamnso bible

Aysaya 46

¹NYÙY TÀR suuy jii: «Ké nyùy woo Bel wùn Nebo ki kù mày ne bèn. Á lì ne aŋkùvtu vév, e kùr e vimbèʼbìy ví ndzə̀m, a dù sho. Á lì ne mebvə̀m mèn, a rəʼə́y nyám sho, a sí dór ne, a làv làvìn,

²a bó yòʼ dzə̀ áwune yù fóo tin mebvə̀m mev, e tin, fo á du shó e kwaʼ nsàm, mo áwune kù sí du sa fo. Ké anyùy veé Babilon ki kù mày ne bèn.

³«Éè kiber ke rám Isray, ven vee rám Jakov, vèn yuúrí kinyo ke m suuy ki kijuŋ. Kèʼ mo vèn‑eè kèʼèn, a dzə ji kitúm, m kù leey fo vèn. Kù li mo ven, ghán sho.

⁴Kù dzə̀ mo və̀n wo m wíy a leéy fo vèn, e meé mo vèn wíy dzə̀nkìr, e koŋrí, é vitú vi fə́r. Kù‑uù fèr mo ven ji kitúm, a m kù wíy a geʼsín e vèn. M wíy a tom ven, ŋgeʼ si nəə ven, é m boyir ven.

⁵«Dzə̀ la, wo dzə̀ vèn lì, a fìʼsìn vèr wun, a yen ji vèr wun dzə̀ réŋréŋ? Wír feyì feyì, wo dzə̀ vèn lì, a fìʼsìn ji vèr wun wáa dzə réŋréŋ, ŋgaàŋ dzə̀ la?

⁶Wír ámóʼó lo, á kùúy kisha ke mbàm ke baar kí wùn à ke fəvír kí, kuuyì, á nèn tàʼ taà kilàm, e làʼ, wù fèr shibvə̀m sho. Wù fer maysì, ŋgaà shibvə̀m nèn a tsəm e si wo, a ghvəm.

⁷Vé beʼe shúr shibvə̀m shìn, neer e mbèʼ, á nèn dù, e tùúy. Á du, tiir fo á kì naŋsin ne, la shí yòʼ kfə̀n wàʼ fo fo, wìr wàa wìy, a mbaà aàgháʼka vəə́, a bó yòʼ dzə̀ shí bìnèr, a bó yòʼ dzə̀ shí yù, e sə̀ wun.»

⁸«Ven ve vèn lo, á wàa ŋway mo, vèn kuúmé kinyo ke m yiìn e vèn kí. Vèn kwaʼti shó kijuŋ, e làa yòʼ kfə̀n a moònìn.

⁹Vèn kuúmé vinyo ve mò‑oò yiìn fó yàŋgùʼ ví. Dzə̀ mo Nyùy, a wùmòʼ yòʼ kfə̀n dzə̀. M dzə̀ Nyùy, a wùmòʼ wo dzə̀ á lì, a fìʼsìn vèr wun yòʼ dzə̀.

¹⁰M lo, m fèr kèʼlo kinyò, e fèr mo kí wíy dù, e mày. Kinyo ki lo, kí wàa jì ji kí wìy a koóy, a mò‑oò yoòyí ne fo yàŋgùʼ. Lóo yooyí, m wàa shìvìr jii, ‹Jì yem kù wíy a tiy fo, a m kér fó wìy yiì kinyo ke m suuyin kidzə̀m.›

¹¹M jàŋ ne wír fo mbìv yee fo shùy yii tó, wír feyì, a dzə̀ ji lùŋ wo wiy. M jàŋ wun ji wù kù wíy a yiì vinyo vidzə̀m ve m kér e mǒ kwàʼtì. Rúrú, m yòŋ ne kinyo ke kí wíy koóy, a m kér fóo yiì, é kí koóy. M wày ne kinyo ke kí wíy koóy, a m kù wíy yiì kinyo ke m wayin.

¹²«Ven ve á yuun kinyo ke m suuyin, e tàv kitú, e tèn, vèn yuúrí. Ven ve á leey yii yém yee réŋ kwaʼda kwaʼda, vèn yuúrí.

¹³M kù sí lo, e yiì, é yii yém yee réŋé fəə́sín lèn lèn, e bòyìr ven. Rúrú, m kù sí lo, e lùŋèr ven lèn lèn, m yòʼ dzə̀ kwaʼda. M wíy lùŋèr wír veé Sion, e bùʼ wír veé Isray e vikuʼùy vém ví.»