Read Lamnso Aysaya 47 Bible Online

Aysaya 47 - Lamnso bible

Aysaya 47

¹NYÙY TÀR yoŋ jii: «Éè kitum kee Babilon, wò woo wan ntoʼ ntay, vèn sésín é kibvə̀r, a dìy. Éè wàn ntoʼ ntay wìr veé Kaldea, màʼtì kàvàʼ, e sèsín a dzə̀ fó nsay, a dìy. Á yòʼ dzəə́ wìy a yòŋ wò ji wán wo á kér moo wúm, wán wo á bomrì bòmrìn.

²Ké lèn ki, shaà ri, e gvə̀ʼə́m e tiy, a jò kibán ki. Shóʼóy ndzə̀y sé viŋgòn se à sùmèn kitú sho si, e wòvtí see fó tsən, é táŋ sé se shwin sí yénsín, áà wáa tum ndzə́v sí e wuú nsay.[85]

³Á wíy kweèy ndzə̀y fo wò wùn, áà wáa ghan e wóŋé ndzə, é wìr dzə̀m yén kinshóʼ ké. Feyì feyì, m kér fó wìy siìr ŋkfə́tír, e màʼ ŋgeʼ e wò woo Babilon kitu, là nyaʼ.»

⁴Rúrú, Ŋgaà Lùŋèr wor kù dzə̀ NYÙY TÀR woo Taà Mànjòŋ, á mo yír rəə́ dzəə̀n, a dzə̀ wun Ŋgaà wo Ranén woó Isray.

⁵«Éè wò woo wan ntoʼ ntay woó Kaldea, leéy kirə́ʼ kí fó mesənér, e lìr sho, lirì, à wàa dzə kisə́sə. Kèʼ fo lèn, á yòʼ dzəə́ yiì a yòŋ wò ji yeè vitum.

⁶Mò‑oò shwìíy kilòŋ é ŋàŋ vèr à wír vémé, e nə̀ʼsì áwune, kù moo ji bó yòʼ dzə̀ə́ a wír vém bey. Mò‑oò màʼtì, ven veé Babilone tón áwune é shùu rər, yii bèy, a bó vèn yòʼ‑oò lo shàm mendzən mev. Jòkìnyàʼ, vèn yií, wír vee ŋgày sé wìri wáa yen ŋgeʼ, yì wáa shaà vitaáví vév.

⁷Mbátír, wò woo wan ntoʼ ntay, à dzəv nsaŋ, suuy jii, ‹M kù wíy gòʼ ji yeè kitum, e dù, e mày.› Mo vifií vé ví kù sí tíy a dzə̀ é kwàʼtì fèn, à yòʼ dzəə́ kuúme ŋgeʼ se yii yée bvəə́shi, e kèm.

⁸«Ké lèn ki, ku yuùrí kinyo ke m suuy ki. Wò və̀n, wo à kù taʼ ké ji bo à kì néŋ, yí a dzə̀ kitú, kwaʼtì ji bó yòʼ dzə̀ féyì, á wìy tòn wò. À kù dzəv a dzə̀ nsaŋ ji kù jòʼsì wò ji kitúm ke tavín kí, a bó kitúm ke a dzə̀ kí dzə̀v kiwó ké ki yòʼ dzə̀. À sév ji bó yòʼ dzə̀ kí kòóy ji à wáa dzə wiiy ŋkfə, kìn ji wiíy wo wóné kpukin ne, e mày.

⁹Vinyo ve à sévti vìn vi yíi koóy wò kishiíy kimòʼón vidzə̀m. À yíi lày kifá kidzə̀m, kù moo wiíy wo wù ranen wán, e ràn lúm. Vinyo vìn vi kér fó yìi cuùrì e wò kitu, fə̀m mo à sər fú wo tavíné, shwéŋ vinyo e dzəə sí dzəə sí.

¹⁰«Ven veé Babilon, vèn‑eè yéʼ, kwaʼ feyì ji yii yén ye bií kiŋsìn ven, a bó wìr yòʼ dzə̀ shó wo dzə̀ wù yèn ven. Vifií ve vèn kwaʼ ji á kér, kiiy jeéyjeéy fó vinyò vi yiì ne, vèn jáy dzə́ə, a dzə̀v nsaŋ ji vèn dzə̀ féyì, a wìr wóo dzə̀v kiwó kén yòʼ dzə̀.

¹¹Yii bèy, ŋgeʼ ye tavín yíi koóy ven, a bó yòʼ dzə̀ sə́m yéné tèér. Kinshùʼùm ke tavín kí lo, e sàsìn, e sùm ven. A vèn fèn tàŋrí vitú moó le, bo vèn yòʼ yíi bòy fo fo. Á lo, e ghiʼ ven é kimbùmmbúm, a bó vèn yòʼ wíy kiíy mo kí ghanen.

¹²«Ŋwàay, vèn kú a tiír rì vifií e věn shìv, a tiír e fù wo vèn‑eè sər, e kèʼ fo meterí, kìn vèn‑éè bémér aŋgaà vén vibàn, e tèér ŋgeʼ ye yì nyoorì ven.

¹³Ven veé Babilon, ntir se á wayin e věn kitu si càʼár ne kitú kén. Aŋgàa ŋgàŋ véné shaa ri fo mbìy, a kìŋsìn ven. Áwune ve á shwéŋ fú a dzə̀ fo mejiy mè, bónen, tar mbìv se mè sə́ŋnin sho, ŋwee wo fíyi lóo fəə, aá sí yoóyi kinyo ke kí lo, a koóy.

¹⁴Rúrú, áwune dzə̀ kév ji kinshaàrì ke və́yí kù wíy koomé. Áwune yòʼ wíy yu fóo bòyìr kitú kév fo və́y woo shooyi. Wú yòʼ wíy a dzə fo tèr moo və́y wo wìr dzə̀ʼə̀mèn é kitu wo, a yor ji wúné fiʼ lùm.

¹⁵Á mo ké aŋgàa ŋgàŋ vén kí wíy a dzə, áwune ve á lim vèn áwune, tóm ven, e kèʼ fo kèʼ. Ké lèn ki, á sí rəm a dzə̀ vitú vév, tuʼtìn tùʼtìn, a wìr wo dzə̀ wù tìn ven fó ŋgeʼ yòʼ dzə̀.»